Bagyşla sen günämi, bagyşla sen, Ýaradan!..
Ozal başda adammyş dört pasyly ýaradan.

Bir mahallar bir ýigit ajap gyzyň ugrunda
Ýanyp, öçüp sebsäpdir. Ot döräpdir bagrynda.

Şeýdip lowlap gelýärkä okeanyň deňinden,
Doňup ýatan okean bugarypdyr deminden.

Ýuwaş-ýuwaş bugaryp, pagyş-para eräpdir.
Şeýdip dünýäň ýüzünde birden Tomus deräpdir.

Derelerden geçipdir, derýalardan geçipdir.
Erän buzuň suwundan gana-gana içipdir.

Ajygypdyr ýaş ýigit. Bir gysyma dönüpdir.
«Iý, miwämden iý!» diýip, Güýz äleme inipdir.

Doýup dürli iýmişden,
Ýüzün tutup ummana,
Aşyk ýigit ýoluna bolanmyşyn rowana.

Bir gapdalda jeňňellik, bir gapdalda derýamyş,
Güýzüň salkyn şemalyn içip gidip barýamyş.

Her deminde gaýtalap magşuk gyzyň adyny,
Labyrdadyp barýamyş ýüreginiň oduny.

Al-asmandan syn edip aşyk ýigdiň halyna,
Güýzi beýläk süýşürip, gyş inipdir äleme.

Öçüripdir ýigidiň ýanyp barýan öýkenin.
Şunça gelmedik bolsa, öýken köýjek ekeni.

Sorup-sorup içine gyşyň beren dermanyn,
Ýigit syryp gidipdir buzly derýaň kenaryn.

Üç jülgeden aşypdyr. Üç dereden aşypdyr.
Dördülenji jülgede söýgüsine duşupdyr.

Şo bada-da jakgyldap, saýraşypdyr bilbiller
Dünýä Bahar gelipdir. Gunçalapdyr bägüller.

Adam
Söýgiň öňünde egip goşa dyzyny,
Şondan bäri ýazyp ýör şol poemaň yzyny!

Kerim GURBANNEPESOW

123

14

2

6

0

Mowzugy VIP edenler: