<h2>"Maýyp ýigide aşyk bolan gyz"</h2>

1-nji bölümi...

Tutuş aýnadan ýasalan eýwanly uly jaýyñ daş-töweregi güllere beslenen bag-bakjalyk, onuñ düýplerinden akyp gelýän suw ýaplarynyñ, şildiräp, göz gamaşdyryjy. Günüñ şöhlesi suwa düşüp, agaçlaryñ arasyndan ýol ýasap geçip durdy. Tomusa golaýlap gelýän ýaz paslynyñ myýmyk şemaly agaçlaryñ başyny iki ýana ýaýkap, saýraşýan guşlar bilen hezil edip oýnaýan ýalydy. Howlynyñ içi dym-dyrslyk ýaly bolsa-da, şildiräp akýan suwuñ sesi, agaç başlarynyñ şüwwüldisi, guşlaryñ jürküldisi bilen garyşyp, janyñy heýjana getirýän, ýaramly seslerden diñläp, doýar ýaly däldi. Tawus kakasydyr-ejesini işe ugradandan soñ, ähli edilmeli işlerinden dynyp, howlynyñ içindäki daşy owadanlanyp ýasalan agaç sekä geçip oturýardy-da, el telefonuñ aýdymyny açyp, el işleri bilen boluberýärdi. Kämahallar goñşy gyzlar ýanyna üýşýärdi. Her kim bir gürrüñ tapyp, degişip-gülüşýärdiler. Tawus joralaryny gaty gowy görýärdi. Ata-enesiniñ ýokary işde we ýokary wezipelerde işleýändikleri bilen baglanşykly baýlygyna buýsanyp-baýrynyp, ulumsyrap baranokdy.

Onuň ata-enesiniñ berýän terbiýelerine laýyklykda özüni pes päl, sada, ýeri gelende agras bolmalydygyny, gyz maşgala magsus bolan häsiýetleri bilen özüni oñat, göreldeli alyp barmagy başarýardy. Joralary ony sylaýardylar. Gerekli maslahatlar bolsa, ondan sorap, bilmeýän zatlaryny öwrenýärdiler. Tawus elmydama gitjek ýerine joralary bilen gitmegi halaýardy. Bir gün Tawus jorasy Gunça bilen ýupek-sapak almak üçin dükanlara aýlanmaga bazara gelipdi. Aýlanyp ýörkäler Gunçanyñ mata topbagy ünsüni çekdi. Ol özüne köýnek tikinmek üçin matany saýlap bilman köp eglendi. Tawus oña mata saýlaşmakda maslahatçy hökmünde seredip durdy. Birden köýneginiñ etegi çekilen ýaly duýuldy. Yzyna gañrylyp seretse, bir kolýaskada oturan görmegeýje, maýyp ýigide gözi düşdi.
- Bagyşlaweri, uýam, dykylşygrak bolansoñ atdanlykda basaýandyryn diýdi-de, ol oturan kolýaskasynyñ tigirlerini yza çekip, ýoly bilen boluberjek boldy.
- Zyýany ýok bolýan zatdyr diýip, Tawus ol ýigide ýylgyrdy we eteginiň hapalanan ýerini kakyşdyrdy. Kolýaskaly ýigit müýnürgeýän şekilde sag elini ýüregine ýetirip, ýene ötünç sorady-da, öñe tarap gidiberdi. Tawus mähirli ýylgyryş bilen ol ýigidiñ yzyndan garap durka, Gunçanyñ silkeläp diýen ýaly beren soragyna aýñalyp gitdi.

Tawus Gunçanyñ söwdasynyñ çaltlaşmagyna howlukdy. Ol şol ýigide ýene-de sataşyp, onuñ bilen tanyşasy geldi. Eger ýene gabat geläýse, ondan adyny soramaklygy ýüregine düwdi. Gunçanyñ bolsa şol arkaýynlygydy. Ol matany alandan soñam, şol matañ üstünden daňynar ýaly reñkdeş ýaglygyñ gözlegine çykdy. Tawusyñ bolsa, ol ýigit ünsüni özüne çekipdi. Azajyk-da bolsa sojagaz pursat Tawusuñ göz öñünde şekiĺli surat bolup añynda gaýtalanyp durdy. Ol Gunçanyñ yzyna düşüp, ýörmekden ýadady.
- Gunça, sen arkaýyn aýlanyber joram, meniñ ýüpek-sapaklarym üçinem gezim etjek bolsak, wagt ýitireris. Senem, menem işimiz bitensoñ demir satylýan dükanyñ ýanyndaky agajyñ kölgesinde bir-birimize garaşaýarys diýdiler-de, aýrylyşmak bilen boldular. Tawus almaly zatlaryny jemleşdirip, Gunça garaşmaly ýerde kölgelap daş-töweregine esewanlyk bilen garaňjaklap durdy. Birden ýene ýañky ýigidiñ öz gapdalyndan öýlerine tarap barýanyny gördi. Ol ýigit Tawusy gördü-de, ýene, sag elini ýüregine ýetirip, ýylgyrdy-da,"Sag bol, Tawus!"diýip, ellerini galgatdy. Tawus adyny eşidip, onuñ özüni tanaýanlygyny geñirgendi. Pursatdan peýdalanyp, ondanam onuñ öz adyny sorasy geldi. Emma, gyz edähedi oña ýol bermedi. Ol onuñ adyny soramakdan saklandy. Merdan bolsa, Tawusuñ ilkinji nazaryndan özüne bolan aýratyn üns berilýändigini duýsa-da, ony bilmezlige salypdy. Öz ýanyndan özüne bolan gynanç duýgusydyr öýdüp oýlanypdy.

Ol bazardan daşda bolmadyk ýerräkde ýerleşýän owadan howluly öýlerine girip gitdi. Tawus oña göz gytagy bilen ogryn-ogryn seredip galdy. Şol günden soñ Tawus öz-özüni tanamady. Bar küýi-zary şol ýigit barada pikir etmek boldy. "Alla janlarym, ol nähili beýle ýagdaýa düşäýdikä, ol ýigidiñ mähirlidiğini ?!" diýip, içini gepledi. Ýöne ýene-de şol ýigit bilen gabatlaşmagyñ umydynda bolup, geziberdi. Şondan soñ birnäçe gün geçip, näçe gezek bazarlap gelse-de, Tawus Merdana gabat gelmedi. Muña bolsa, Tawusyñ barha ýüregi gysýardy. Ol soña baka görmek üçin şol ýigidiñ öýleriniñ üstünden geçýän ýoldan hemişe howla tarap nazar aýlap geçýärdi. Her gezek görerin diýilýän umyt bilen öýden çyksa-da,Tawus lapykeçlik bilen keýpsiz öýlerine gaýdyp gelýärdi. Merdan hem şol güni bazarda Tawusa sataşandan bäri köp oýlanýardy. Nädip ol oýlanmasyn, çünki, ol bu gün özüne bolan mähirli ýylgyryşa melul bolup, Tawusy görüpdi. Ýigidiñ Tawusy birinji gezek görüşi däldi. Ol ony öñem dosty Durdynyñ ýanyna baranda, Durdy bilen gadyrly salamlaşyp, hal-ahwal soraşyp, gürleşenlerinde Merdanyñ oña syny düşüpdi. Ol dosty Durdynyñ Tawusa bolan aýratyn bir aragatnaşygyñ bardygyny duýup galypdy. Şunça özüne erk etjegem bolsa, Tawusyñ gözelligine gözigidijilik bilen göz aýlaýanyny özi duýman galýardy. Ol:"Aslynda aýdaly, aralykda Durdy ýokmuşynam-da, meniñ şu halyma olar ýaly gözel gyzyñ meniñ bilen işi bolarmy diýsene" diýip, Merdan öz ýanyndan Tawusy özüne çenemekden çekindi. Tawusa bolan garaýşy barada köp oýlanýanam bolsa, ol gaty bir göwün bermekden saklanypdy. Oñaryp bilse Tawusy ýadyndan çykarjak boldy. Ýöne başarar ýaly däldi. Ol ýigit gam çekip, ýüregindäki gussasyny goşgy ýazyp, kagyz bilen syrlaşmana başlady. Onuñ ilkinji goşgusy Tawusa bagyşlanypdy.

Alyp gitdi ýene meni
Sen hakdaky süýji hyýal.
Duşurypdyr saňa meni
Bagtdan paý eçilen ykbal

Gijelerde hemram bolup
Hoş arzuwlar geldi köňle.
Indim dünýä aýdym bolup
Saňa ýazan sazym diňle!

Gündizler bagta howlugyp
Gije yşkyň meýin içdim.
Käteler dertden hopugyp
Däliredim serden geçdim.

Baglandym seniň ýoluňa
Indi bolmaz gitjek ýerim.
Yşkymy ýaýyp äleme
Göçer indi aşyk serim.

Düşün maňa näzli dildar
Sensiň meniň ezizlänim!
Meñ bagtymda dine sen bar
Sensiň şu çaka gözlänim.

Bu goşgynyñ añsat ýerden öz-özünden döräberendigine, Merdan monça bolup, öz ýazan ilkinji goşgusyny ylla bir Tawus gyza okap berýän ýaly göz öñüne getirdi-de, gaýtalap-gaýtalap, sesli okap gördi. Şondan soñam ýigide ylham gelip, birnäçe goşgular ýazyp, öz göwnüni awlap gezdi. Olardan Tawusa okap bermegini öz ýanyndan arzuwlaýardy.
Birdenem, öz bolşundan özi kemsinýärdi-de, Tawus bilen geljegi hakyndaky durmuşy göz öñüne getirýärdi. Tawusy bagtly edip bilmejegine we Tawusyñ özi hakyndaky garaýşynyñ ömrüniñ soñuna çenli wepaly ýar boljagy ýa-da bolup bilmejegi hakynda ýürek gyýyjy pikirleri bilen oýlanyp, öz ýanyndan günde bir netijä gelýärdi. Ol edýân ähli arzuwlarynyñ puja çykaýmagyndan ätiýaçlydy. Sebâbi, birinjiden-ä, ol öz dosty Durdynyñ Tawus hakyndaky duýgusy bardyr öýtmegi, ikinjidenem Tawusyñ özi hakynda garaýyşlary onuñ üçin nämälimdi. Galyberse-de, kemisligine has beter kemsinjegi göz-görtele duýulýanlygydy. Ol öz ýagdaýynyñ şeýle bolmagyny Alladan gelen paý diýip kabul etdi-de, gününe şükür kylyp oturmaly diýilýän pikire uýup, Tawus hakyndaky oylanmalaryny kellesinden düýpgöter aýyrmaklygy çyny bilen ýüregine düwdi.

Dowamy bar...

67

21

2

6

0

Mowzugy VIP edenler: