09:29 Mowzuk

Ölüm ýassygynda ýatyrdy Ene.
Gapynyň agzynda otyrdy Ajal.
Ene balasyna ýüzlendi ýene:
- Getir dutaryňy,
Çal, köşegim çal!

Gözlem ÿumulsa-da çalyber oglym,
Belki ol ýumulan gözlerimi açar.
Çaldy ogly, çaldy, ýene-de çaldy,
Bir aýlap yzyna serpikdi ajal.

Ýene erbetleşdi Enäniň haly,
Ene ýene diýdi: Çal, köşegim çal!
Çaldy ogly, çaldy? Ýene-de çaldy.
Ýene-de bir aýlap serpikdi ajal!

Ýene agyrlaşdy Enäniň haly.
Ýene gaýtalady: Çal, batlyrak çal!
Çaldy ogly, hasam batlyrak çaldy.
Bu gezek üç aýlap serpikdi ajal.

Ýokmyşyn diÿärler Gudrat diyen zat,
Bu Gudraty görse Gudratam gaçar.
Dünýäde hemmeler saz çalýan bolsa,
Meger, basyn alyp gaçardy ajal.

Ýene-de haýallap başlady Ene.
Ene diýdi: Demim bolmanka tamam,
Kyrk ýyllap içimde berk tutup giden,
Bir syrymy sana açaýyn, Balam.

Saza senden beter aşykdym menem,
Çalýana-da aşyk, Saza-da aşyk.
Bir gezek on alty ýaşlyja gyzkam,
On alty depäniň üstünden aşyp.

Gitdim goňşy oba saz diňlemäge,
Çalýardy dutary bir gerçek ýigit.
Palçykdan adamyň şekilini ýasasan,
Şon-da saz bilen jan berjek ýigit.

Ýetende kükürap iň belent perdä,
Name bolanyna özümem haýran.
Ýigidiň gujagyna okladym.....
Şol ýigit hem seniň Atandy balam.

Dünýäden bimyrat ötüpdi Ataň,
Indi şol myrada sen ýetdiň balam.
Tä ömrün ötýänça ýöret bu käri,
Ýedi kowmuna-da öwretgin Balam...

Gürrüňini zordan tamamlan Ene,
Diýdi balasyna: Çal, ýene bir, çal...
Çaldy ogly, çaldy, ýöne bu sapar,
Gaty çyny bilen gelipdy Ajal.

Şonda-da tamasin üzmedi Ene.
Ýene pysyrdady: Çal, ýene bir çal!...
Ýöne doňup galdy oglunyň eli,
Dutar ýere gaçdy... Ýogsam-de weli,
Şu gezek baş alyp gitjekdi Ajal.

(Kerim Gurbannepesow)