21:56 Mowzuk

Filosofiýanyň adam bilen baglanyşykly bölümine antropologiýa diýilýär. Adam köp ylymlar tarapyndan öwrenilýär (adam anatomiýasy, adam fiziologiýasy, sosiologiýa, psihologiýa we ş.m.). Filosofiýada adam meselesiniň aýratynlykda öwrenilmeginiň özboluşly sebäbi bar. Her bir adam özüni gurşap alýan daşky dünýä göz ýetirip başlanyndan soň özüniň dünýädäki ornuna düşünmeklige çalşyp başlaýar. Gadymy filosoflaryň beýleki meseleler bilen deň hatarda adam meselesine aýratyn üns berendikleri hakynda taryhy maglumatlar az däl. Emma adam meselesiniň filosofiýanyň aýratyn bölümi hökmünde, has dogrusy, filosofik antropologiýa ady bilen ýüze çykmaklygy diňe XX asyrda bolup geçýär. Filosofiýanyň bu ugruny esaslandyryjylaryň biri M.Şeler filosofiýanyň ähli derňeýän meseleleri ahyrky netijede adam meselesi bilen, adamyň dünýädäki orny baradaky mesele bilen baglanyşyklydyr diýip hasaplapdyr.