Adamyň ýöreýşinden köp zatlary bilmek bolýar. Dogrusy, munuň üçin synçylyk gerek. Şeýle-de birje gezek görüp, adama baha bermeli däl. Synlaýan adamyňyz howlukmaç bolmagy mümkin. Ýa ýadaw bolsa-da adamyň ýöreýşi üýtgäp biler. Ýöne eger uzak wagt syn eden bolsaňyz ýa-da köpden bäri tanaýan bolsaňyz, onda ýöreýşine serediň-de, tanyş-bilişleriňiziň häsiýetiniň nähilidigini biliberiň.
Eger haýaljakdan ýöreýän bolsa, ol köpüň ünsüni özüne çekmegi halamaýar. Utanjaňdyr we salykatlydyr. Özüniň eden hereketleri barada oýlanyp gezýändir.

Böküp ýöreýän ýaly ýöreýiş, adamyň ýeňlesliginden habar berýär. Beýle adamlaryň «ýüpüniň üstünde odun goýarlygy» ýokdur. Beren sözünde-de aňsat-aňsat tapylmazlar. Olar gezelenç etmegi, dynç almagy, şatlyk-şagalaňy halaýarlar.

Ädimi ýygy ädýän adamlaryň ýöreýşi, olaryň talapkärdiklerini aňladýar. Beýle adamlar işine jürdür. Islendik işi ýüregiňe jüňk bolar ýaly ýerine ýetirýärler.

Eger synlaýan adamyňyzyň ädimi açyk bolsa ýa-da ädiminiň arasy uly bolsa, daş-töweregindäkiler bilen oňat gatnaşykdadyr. Olar maksadaokgunly, işeňňir we göwnaçykdyrlar.

Eger äwmän ine-gana ýöreýän bolsa, onda tanap goýaýyň, ol adam arkaýyndyr, sabyrlydyr. Dargursaklyk edýän däldir.


ÇEŞME: «Mugallymlar gazeti». 2012-nji ýylyň 16-njy apreli.

228

40

4

12

0

Mowzugy VIP edenler: