08:53 Mowzuk

Üç sany kyn zat: syr saklamak, boş wagtyňy ýerlikli ulanmak, göwnüňe degenlerden saklanmak.

Üç baýlygy aýap saklamaly: adamlara söýgi, tygşytlylyk, ilden öňe saýlanmazlyk.

Üç zatdan gaça durmaly: çagşan jaýdan, ýarak itden, yzgytsyz aýaldan.

Üç zat: adam – ýaý, pikir – peýkam, adalat – nyşanadyr.

Durmuşdaky üçlük: iň syrly zat – geljek, iň ynamdar zat – ýer, ynamsyz zat – deňiz.

Üç zady ütgedip bolmaz: samsyklygy, pes gylyklylygy, ýalany.

Üç ymtylyş: pişik – öýe, it – hojaýyna, çaga – enä ymtylýar.

Adamyň üç häsiýeti: her bir öwünjeň adam nadandyr, her bir nadan akmakdyr, her bir akmak naýynsapdyr.

Üç zady ýerine ýetirmek parzdyr: ajy doýurmak, azaşany ýola salmak, ötegçini myhman almak.

Üç närsäni üç närse bilen, ýagny pikiri dogrulyk bilen, sözi rastlyk bilen, gylyk-häsiýeti sahawat bilen bezän kişi bagtyýardyr.

Üç zady ýok edibem, gizläbem bolmaz: söýgini, ukyny, ölümi.

Nämynasyp dostdan gutulmagyň üç ýoly bar: zyýapatyna barmazlyk, habar almazlyk, zat soramazlyk.

Adamyň häsiýetiniň nähilidigini üç ýerde tanap bolýar: ýolda ýoldaş bolup, goňşulykda ýaşap, ekin şärigi bolup.

Üç zada: nebsiňe, ukyňa, gahar-gazabyňa erk etmegi başar.

Üç ýerde kän eglenilmeýär:agyr ýatan hassa soralanda, şum habar eltilende, dilege barlanda.

Dostuňy hem, duşmanyňy hem üç zatda: uzak ýolda, hasratda we kesel çagyň synap bolar.

Üç sany howandaryň bar: Taňryň, eneň-ataň, ýanýoldaşyň.

Ogluňa terbiýe bermegiň üç ýoly: ogluň bäş ýaşaýança, ol seniň üçin patyşa bolsun, bäş ýaşdan on bäşe çenli ony hyzmatkär tutun, on bäşden soň bolsa, ogluň bilen dost bol.

Üç bezeg: ynsanyň bezegi akyllylykdyr, akyllylygyň bezegi pähimlilikdir, pähimliligiň bezegi bolsa mylakatlylykdyr.

Üç sany duşmanyň bar: gaharyň, ertire goýan işiň, nähak ynjydan dostuň.

Dostuň wepadarlygynyň alamaty üçdür: öz nebsini dostuna pida eder, malyny oňa bagyşlar, onuň syryny gorar, paş etmez.

Üç gowulyk: öküziň şahlysy, gyzyň saçlysy, ýigidiň başlysy.

Iti üç günläp ýallasaň, ol seni üç ýyllap ýadyndan çykarmaýar.

Üç hili adam betbagt bolýandyr: akmagyň garamagynda işleýän akylly, ejize güni galan güýçli, nadana güni galan sowatly adam.

Üç adamdan aşyňy gysganma: myhmandan, ýetimden, çagadan.

Keramatly üç ýol: dogruçyl bolmak, gahara erkiňi bermezlik, mätäçden zadyňy gysganmazlyk.