19:34 Mowzuk

2019-njy ýylyň iň meşhur hem-de iň gözel ýerleriniň reýtingi düzüldi. Bu sanaw “Trip Advisor” saýtynda mälim edilýär. Birinji orna gadymy Rimiň binagärlik ýadygärligi – Kolizeý eýe boldy. Bu gözel ýer eýýäm iki ýyl bäri yzly-yzyna reýtingiň başyny çekip gelýär. Ikinji orny Parižiň Luwr muzeýi eýeledi. Meşhur fransuz galareýasyndaky Leonardo da Winçiniň “Mona Liza” eseri we beýleki meşhur ussatlaryň sungat eserleri bu ýere gelip görýän syýahatçylaryň ünsüni özüne çekýär. Üçlüge Watikan muzeýleri goşulyp, syýahatçylar ol ýerlerdäki mukaddes hasaplanýan ýerlere baryp görýärler hem-de hepdede bir gezek Rim Papasynyň resmi kabul edişligine gatnaşmaga mümkinçilik alýarlar.

Dördünji orunda Nýu-Ýorkuň Azatlyk heýkeli ýerleşýär. Bäşinji orunda Eýfel diňi ýerleşip, ol ýerden bütin Pariži görüp bolýar. Şeýle hem reýtinge Barselonadaky Sagrada-Familiýa ybadathanasy, ABŞ-nyň Täze Orlean şäherindäki Fransuz etraby, Amsterdamdaky Anna-Frankyň öý muzeýi, ABŞ-nyň Çikago şäherindäki “Willis Tower” gökdiräninde ýerleşýän “Skydeck” synlaýyş meýdançasy we Wenesiýadaky San-Marko meýdançasy girdi. Sanaw öňünden bellenen peteklerdäki maglumatlar esasynda düzülip, olarda barylmaly ýerler görkezilýär.