Danalygyň syryny bilmek isleýän bir syýahatçy onuň gözlegine çykypdyr. Tutuş ülkäni aýlanypdyr. Adamlar bilen söhbetdeş bolup, taryhyň we edebiýatyň baý hazynalaryny içgin öwrenipdir, emma gözleýän zadyny tapyp bilmändir.
Bir gün ýürekdeş dosty oňa ýurduň patyşasynyň geňeşdary bolan, danalygy bilen il içinde meşhurlyk gazanan bir ýaşulynyň bardygyny habar beripdir. Muňa begenen syýahatçy öz maksadyna ýetmek üçin dananyň gözlegine çykypdyr. Näçe külpetleri başdan geçiren syýahatçy ahyry bu meşhur adamy tapypdyr. Oňa danalygyň syryny bilmek isleýändigini aýdyp, kömek etmegini haýyş edipdir. Dana kişi içine bir damja ýag guýlan çemçäni onuň eline berip: “Şu ýerdäki saraýa aýlanyp, täsin syrlaryny çözmäge çalyş, ýöne eliňdäki ýagy dökäýmegin” diýip, berk tabşyrypdyr.
Syýahatçy ýola düşüpdir, saraýa aýlanyp, täsin hakykatlary içgin synlap, syrlaryny çözmäge çalyşypdyr. Soň dana kişiniň ýanyna dolanyp gelipdir. Dana: “Hany, gören-eşideniňden habar ber!” diýipdir. Syýahatçy oňa ähli gören-eşidenleri, akyl ýetiren hakykatlary barada aýdyp beripdir. Gürrüňiň soňunda dana kişi ondan ýagly çemçäni sorapdyr. Syýahatçy geň galyp, çemçedäki ýagy dökenini şonda bilip galypdyr. Pähimli ýaşuly oňa ýüzlenip: “Sen menden danalygyň syryny soradyň. Diňle, oglum, danalyk – saraýlara aýlanyp, hakykata göz ýetirmekdir, emma çemçäňdäki ýagy hem dökmezligi başarmakdyr” diýipdir.

182

15

7

7

0

Mowzugy VIP edenler: