Seÿitmyrat Geldiÿew / Sähere ýazylan hat.


Salam, Säher!
Häzir gije, menem saňa hat ýazýan.
Aman-esen ördümi ak güneşem?!
Berkidilen ugry bilen gatnaýan,
Awtobusda talyp gyzlaň gülüşem
Eşdilýärmi?!
Eşdilýändir, bilýärin.
Şeýle bolýar dynç gününden özge gün.
Gizlejegem bolman gyzlar gülýänin,
Perişde deý alyp barýar özlerin.

Howa nädýär?!
Azyrag-a gowşandyr,
Aý, nä güýz-dä, mundan beter näm etsin?!
Sen çigregiň bilen baglary gandyr,
Ýadaw baglar kellesini sämetsin.

Ýanýodany syrýan gyzlar ýaglygyn 
Saranyp, ir bilen geçip giderler.
Guşlaňam hemmesin oýar, barybir,
Basym gündogara uçup giderler.

Sary ýapraklara... olara degme,
Kyn bolar säherde bagdan daş düşse.
Ýokuş degýär ahyr, bakman islegňe,
Durmuş sypan ýaş başyňdan saç düşse.

Aý, hawa, bularam esasy zat däl,
Güýz bolsa sowuk bor, ýapragam düşer.
Ir bilen Günüňem dogmagy ýat däl,
Awtobusam gatnar, gyzlaram gülşer.

Bilýän, gowulyklar öz içimizde,
Olary iş bilen amal etmeli.
Gündizler şatlygyn paýlap geçende,
Ýagşy arzuw bilen daňa gitmeli.

Ýaz ýaly ýumşapdyr ýelek ýassygym,
Säher, sag bol!
Görüşýänçäk, hoş indi!
Ýarygije kapyýaly hat ýazyp,
Müýnsüz arzuwlarma arzuw goşuldy.

Ir bilen oýanmak – ömürden utuş,
Ýürek islegimi ýerine ýetir:
Meň okaýan şäherime hem tutuş
Eziz Watanyma bereket getir! 

160

15

2

8

0

Mowzugy VIP edenler: