03:48 Mowzuk

Döwüşli filmleriň pälwan gahrymany

Silwestr Stallone döwüşli filmleriň pälwan sypatly, az gürläp, köp iş edýän aktýorydyr. Ol özüniň soňky “Cop Land”, ýagny “Poliseýleriň ýurdy” atly filminde ýaramaz işlere garyşyp, syýasata goşulan şäher poliseýlerine garşy göreş alyp barmak üçin janyny orta goýan kiçijik şäher şerifiniň roluny ýerine ýetirýär. Filmiň beýleki bir esasy gahrymanynyň rolunda bolsa Golliwudyň özboluşly meşhur aktýory Robert De Niro oýnaýar.

Bir film üçin 18 kilogram

Özüniň soňky “Cop Land” atly filminde 18 kilogram semrän Stallone göz öňünde getirip bolmajak şekilde semiz we oňuşyksyz häsiýetli roly ýerine ýetirýär.
Filmiň gahrymany ýaşlygyndan uly şäheriň gahrymany bolmagy arzuw edýär. Emma gulagynyň agyrlygy sebäpli, maksadyna ýetip bilmeýär. Üstesine hem söýýän gyzyna öýlenip bilmänligi üçin içgini köp içip, göwnüçökgünlige düşýär. Ol uly şäherlerden gelen poliseýleriň kanuna sygmaýan işleri edýändiklerini görenden soň terkidünýälikden el çekýär.

Geň şikaýat

Ozalky filmlerindäkä garanyňda has daýaw Stallone “Cop Land” filminde Robert De Niro, Harweý Keýtel we Raý Liotta ýaly atly aktýorlar bilen surata düşdi.
Stallone döwüşli filmleri özboluşly bir sungat hasaplaýar. Onuň aýtmagyna görä, bu filmler taryhdaky dessanlaryň we migologik gahrymanlaryň XX asyrdaky täze öwüşginine meňzeýär. Stallone soňky üç ýylyň içinde üç gezek agentligini çalşyrdy. Onuň sebäbi bolsa, agentlikleriň Stallonä kireýine alnan ýarag hökmünde garap, döwüşli filmlerde ulanmaklarydyr. Ol döwüşli, ýöne özüniň aktýorlyk stilini hem ýüze çykaryp biljek filmlerde oýnamak isleýär. Ol bu baradaky arzuwyny şeýle beýan edýär: “Maýkl Duglasyň oýnan rollaryny oýnamak isleýärin. “Scent of Woman” (“Aýalyň ysy”) filminde Al Poçinonyň roluny ýerine ýetirmek üçin islän zatlaryny bererdim. “Usual Suspects” (“Adaty şübheler”) filminde bolsa, birnäçe sekund görünsem-de, hoşal bolardym. Bilýärin, tomaşaçylar meni miňa meňzeş rollarda göz öňüne getirenoklar, emma mundan soňra öwrenişseler gowy bolar”.

Döwüşli filmleri dowam etmekçi

Ýaşynyň bir çene barmagyna garamazdan, döwüşli filmlerde oýnamagy dowam etmek isleýändigini aýdan Stallone: “80 ýaşyndaky adamyň tanklaryň garşysyna atylyp çykmagy ýaly arzan epizodlar tomaşaçynyň göwnünden turýan bolsa, bu rollary dowam etmegime böwet ýok. Muňa iň gowy mysal hökmünde Sin Konneriniň “The Rock” (“Gaýa”) filmini görkezip bolar. Film akyl bilen oýnuň dartgynlylygyny bir ýere birleşdirip, döwüşli filmleriň naýbaşysy bolmagyny dowam edýär” diýdi. “Rembony” söýýänler üçinem bir täzelik bar. Ýakynda “Rembo-4” filminiň surata düşürilip başlanjakdygy habar berildi.

Taýýarlan Şatlyk Ataýew