Rugsatmy su yere bir "Rubagylar çemeni" goysam.
Sözleriñi aýlap-öwrüp bermeli,
Çäjin al-harmanyñ sowrup bermeli.
Dil ujundan bir zat diýip goýbermän,
Ýüregiñi ile çöwrüp bermeli.
Öz janyñdan bölüp, jan berdiñ maña,
Orun-ojak berdiñ, nan berdiñ mańa.
Şatlyk, şöwket senden bolsun, Ýaradan,
Hiç nadyl däldirin, kän berdiñ maña.
Oglum mert bol, bolma göwnüçökgün sen,
Gözleriñde ýyldyrymlar çaksyn señ!
Durmuş hergiz peselmegi halamaz,
Menden ýokardaky basgançaksyñ sen!
Güller öser otlañ aralaryndan,
Suwlar akar köne hanalaryndan.
Agajy ýykdylar. Ýöne bireýýäm
Bag döredi köki-dänelerinden.
Eger-de otursañ körzehin bilen,
Giñ jaýyñ deñ bolar kapas-hin bilen.
Gyljyk sözler gaýar, taýar, çapyşar,
Ýüregiñe gussa bolup ýapyşar.
Pul bilen alymlyk aýry bir kärdir,
Puly söýse, alymlygy bikärdir.
Emma ylma berlen alym kişini,
Har etmezlik, hor etmezlik derkardyr.
Eger giñ dünýäni eýlemeseñ dar,
Öýüñ kapas bolmaz, durmuş-boş humar.
Gümürtik geplere berilme zynhar,
Haka beril, onda şükranalyk bar.
Güni hiç zat bilen örtüp bolmaýar,
Günüñ şöhlesini ýyrtyp bolmaýar.
Ýetibem bolmaýar duran ýerinde,
Ýa oña gara-da sürtüp bolmaýar.
Panydyr ki, ýalan däldir bu dünýä,
Niýetiñe görä saldyr bu dünýä.
Haýsyndan ýöreseñ, şońa ýetersiñ
Akly hem garaly ýoldur bu dünýä.
Dil etdendir, gardaş, ýüregem etden,
Ikisi-de bir zat ýaly seretseñ.
Emma bir ýaman dil zäherin pürkse,
Posly demir bolup sokýar ýürekden.
Eger çawuş çaksa gulagña biri,
Diý: "Beýle zat gorkaklaryñ dessury".
Sözüñ açyk bolsun,işiñem pugta,
Şeýle etmek mert kişileń täsibi.
Gulagma bir habar eşdildi daşdan,
Soñam ýitip gitdi ýuwaş-ýuwaşdan.
Owal mugt berleni ańyma alman,
Indem gözleýärin ýelden, ýagyşdan.
Kimse akyllydyr, kimse akylsyz,
Kimse ýakymlydyr, kimse ýakymsyz.
Eý, akylly, eý, ýakymly kişiler
Ýaşaýyşa ýaraşyk siz, ýakym siz!
Sürüdir elbetde agsagam bolar,
Dälidir, derdine ýansagam bolar.
Müń gepi telekdir, bir gepi gerek,
Ine, şol birini alsagam bolar.
Ýagşy sözüñ höziri-ýaz gününiñ ertiri,
Ýaman sözüñ täsiri gijä öwrer gündizi.
Çykman dört diwaryñ içinde ýatan:
"Waý, dünýä dar!" diýip, galmagal tapar.
Uçgun diýermişin: "Menem bir ýyldyz!"
Çyra diýermişin: "Menem bir gündiz!".
Daglaryñ, ummanlaryñ parhyn,nyrhyn bilen kim?
Daglar hem beýik welin, ummanlar hem juda çuñ.
Bir adamyñ güýji bir adamlykdyr,
Iki adamyñ güýji bir dünýälikdir.
Ýaman-ýaşryk pikir eden perýada ýeter,
Ýagşa ýorup, şükür eden myrada ýeter.
Awtor: Akmyrat Hojanyýaz.
Ejiz kişilere giñ dünýä dardyr,
Gaýratly adama üstünlik ýardyr.
Synyñyzdan asylşyarmy görüpler,
Diýmek il içinde abraýñyz bardyr.