Indi-hä şübhäm ýok, meni ahyryn,
Ýa eýläk, ýa beýläk etjek jenan sen.
Günümiz bir bolsa, urşumyz iki,
Haýsy günäm üçin çekýän jezam sen?

Wagtyndan öň ga:ra döndi saçlarym,
Maňlaý çyzyk-çyzyk, oý bolup barýar.
Walla, saňa duşamdaky gös-göni
Umydym egrelip ýaý bolup barýar.

Derdimizden gün ýok telefona-da,
Görmedigi görde galdy görgüliň.
Indi gorka basýan ädimlerimi,
Lokator gulaklym, gözi dürbülim!

"Häh" diýsem, "mäh"-läre taýynjak dursuň,
Ind-ä kaýyl üýtgetmeseň adymy.
(Owalynda zenan döräýen ýaly,
Ýigrim bäşde garratmaga adamy.)

Ýöne, läläm, duýgymyz-a arassa,
Bir-biregiň bagryn näçe ýaksagam.
Bize çydaýany üçin bu söýgä
Bolman durmaz ýadygärlik diksegem.


Sapa Hommadow

246

51

5

22

0

Mowzugy VIP edenler: