. Aşygyň nalasy.

Bu düýş diýip, bu bir oýun,.
Gözlerden öňe ädeýin
Bagtym gülse-de, nädeýin
El üzüp bilmedim senden.
Düşünemok täleýime,
Düşüp oň yzyna, ine,
Gelen ýerim sensiň ýene,
Gije aýry däldir daňdan.
Iňleýän-ä, iňleýän-eý,
Güýz ýeliniň nalasy deý,
Yşk bu dünýäň aýnasydyr,
Çykdyk, gör, setirden, heňden.
Gorjala, ömrüm gorjala,
Sönüp, aw bolýan ajala,
Ak ýüpek däl, saçyň sara,
Gije uklap galsam birden.


Myhman
Dostum mydam dymyp gidýär,
Törümde goýup ykbalyn.
Ýollar ony ugradansoň,
Ýüregime salýar talaň.
Biz bu daglaň bürgüdi deý,
Çykyp Zeminiň çakyndan–
Ak säherde ýola düşdük,
Arşy görmäge ýakyndan.
Uçýan guşlar hor bolmazmyş,
Uçup bilseň at alarsyň.
…Dost öňküden dolup gider,
Sen özüňden azalarsyň.


Parižli oglanjyk(Wiktor Hýugonyň “Ýekerilenler” romanydaky hossarlaryny
gözleýän oglanjyklara.)
Şowhundan hem galmagaldan
Garran gadymy Parižiň
Aýasynda bir oglanjyk
Ýaşaýar, ol nämedigin
Bilenok arzuwyň, düýşüň.
Diňe garaşmagy bilýär,
Bilmez nirde, haçan geljek.
Kim güler ol degişende,
Kim oňa göwünlik berjek?!
..Alnyndan däl aýagyndan,
Öpýär goňşym çagalaryň.
(Täleýinde ýok ekeni,
Ogşamak öz çagalaryn)...
...Uzaklarda penjireden,
Başyn çykaryp bir gende:
Kowýar bagtly körpeleri:
“Gidiň, oýnaň başga ýerde!”
Sebäp olaň gülki sesi,
“Dynç almaga” maý berenok.
…Oglanjygy söýýär dünýä,
Ýanyna baryp bilenok.



Gözleg
Eje, nämüçin agladym,
Alnymdan öpeňde ilki?!
Senden uzaklaşyp, saňa
Goýýanym üçinmi “Belki!..”
Eje, nämüçin agladym?!
Aýt ahyr, neçüýn aldadyň?!
Barmagyma batsa tiken
Sogrardyň, gözüm ýumduryp.
Günler ertekiň däl eken;
Aýt ahyr, neçüýn aldadyň?!
Her gülene ynandym men,
Ýürekden bakyp her göze.
Diňe daşa däl, käteler
Büdrelýän eken hoş söze.
Her gülene ynandym men.
...Eje, nämüçin agladyň?!
Günäm, sogabym üçinmi;
Seni däl, ili güldürip
Beren jogabym üçinmi?!
Eje, nämüçin agladyň?!


Çykalga.
Köçäňizden «waz» ýasaýan oglan men,.
Siziň köçäňizde köwşüm tozdurdym
Seň ugruňda müňläp-müňläp ýigitleň,
Seni jandan söýşünden-de ozdurdym.
Işigňizden ýygnanmady aýaklam,
Her gün siziň gapyňyzda «gögerdim».
Bahanady, bir owurt suw içmegem,
Seň şanyňa suwy meý deý kän urdum.
Kowman, yzyma bir it saljakdylar,
Näler ýürekleri gynapdy olar.
Ahyry dynybam bilmän,
hut meni
Körekeni edip dynypdy olar.

135

11

3

5

1

Mowzugy VIP edenler: