14:26 Mowzuk

Hat

Harplar el tutuşdy, a sözler bolsa
"Men-de-men" boluşyp gopgun döredýär.
Sözlemlere näme diýjek diýsene,
Bir-birine gyýa bakyp seredýär.

Özgelere öz bagtyny bagş etjek
Ynsan üçin näme sözler ýazsamkam?
Bu süýji gijede, sen bir bilsediň,
Maňa ýoldaş boldy asuda asman.

Hakydama çozuş edip ýatlama,
Meni ýene hyýallara çykarýar.
Ynanýaňmy, häzir ýoly külterläp,
Ikimiz şol öňki ýodadan barýas.

Gözleriňde gussa däl-de, nusga bar —
Okap bilýän siňe-siňe seretsem.
Sen aglama, eger aglaýaňda-da,
Bagt ýaşlaň doňan buzy eretsin!

Meniň güýjüm ýetjek ýeke dilegim:
Janyň-a sag bolsun, bolsun hoşbagtyň.
Arasynda jaň edip dur, işlerňi
Gyra goýup, dynç alaňda boş wagtyň.

28.08.2018ý.

* * *

Ýyllar geçýär. Köp ýatlaýan geçeni.
Başaramok çagalykdan gaýdyp men.
Ýagyşly howada kimdir birini
Gözleýän gussaly aýdym aýdyp men.

Şu ýaşymda äýnek dakdym gözüme,
Müňkürligim mejbur etmedi muny.
Dünýäde barlygmy unutdym, bilseň,
Garalan gijeden gözleýän Seni.

Ýagyş gelse, ýalňyzlygym terk edýär,
Soň teselli tapýar naçar ýüregim.
Ine, şeýdip men özüme erk edýän,
Hut Seni dünýäniň ýitiren ýerin
gözleýän, görejim hanama sygman.
Penjelenmez pikrim başga bir zada,
Çünki men gözleýän eziz birini,
Şu aýazly hem ýagyşly howada.

03.01.2019ý.

* * *

PIDA

Ýerleşmese göwnüm içre hasratym,
Harasatym hakydama ýaň salsa,
Görejim gamaşsa ýagtylykda
Ýa
tümlügiň içinde gözüm baglansa,
Ynsabyma dogry gelse edýänim,
Ynsabymy başa geýen täç saýsam,
Çola ýerde umyt bilen oturyp,
Bulam-bujar pikirlerden saplansam,
Ýatlamany ýagyş kimin ýagdyryp,
Halas bolsaň tupan içre gaýykda,
Dünýä arka diräp ýeňleseň,
Onsoň
Jahana nazarňy salsaň beýikden,
Özüň kiçi saýsaň daglara garap,
Bagt seçseň goşawuçlap her kime,
Özüňçe hiňlenseň ýumup gözlerňi
Älemiň owadan, näzik heňine...
Eýse, diňe asmanda däl, gözde-de
Uçgunly ýyldyrym çakýan ekeni.
Men şeýlebir haýran galdym düşünip:
Asmany owadan görkezmek üçin
Ýyldyzlar özüni ýakýan ekeni.

01.01.2019ý.

* * *

Dönüpdir gözleriň bagtyň öýüne,
Garaşan günleriň garşy alsyn seni.
Geçen günleň girdabyna eýerme,
Sen geljek günlerden gözle hemdemi.
Şol ýigidiň haýsy sogaby üçin
Alla seni ýazgydyna ýazdyka?
Ýer ýüzünde eger melek bar bolsa,
Sen şolaň birisiň, ynanýan şoňa.
Günleriňe gussa dilämok, ýöne
Kalba gubar dolsa, çagyr şol bada,
Ýeterin ýanyňa nirde bolsamam.
Häzir-ä toýuňa garaşyp ýörün,
Nesip bolsa, jemleneris Jumada.

* * *

On iki synamyň biri
(Ýürege)

Ne beýle dymma bolupsyň?
Aňşyramok sebäbini.
Ýene jogapsyz goýýarsyň
Bu irginsiz sowalymy.
Kimler saňa ak niýetde
Bakdy, özüňem bilýänsiň.
Kimler üçin garalama
Bolanyň üçin dymýarmyň?
Goý, özgeler güjeňlesin,
Täsirlere berme eliň.
Aýdaý ahyr ýekeje zat,
Däl-ä sen ýaşmakly gelin!
Mundan öň-ä syrdaşdyk biz,
Wepasyz boldummy ýa-da?
Ýa-ha ýere çöküpsiň sen,
Ýa gaýyp ýörmüň howada?
Sözler seni eljiretmän,
Wagtyňy egläp güýmäpdir.
Bilmänim üçin bagyşla,
Gelen-geçen, ýakyn-u-ýat,
Saňa näçe çüý çüýläpdir.
Ünsem berme bu zatlara,
Eý, on iki synamyň biri!
Meni şu güne getirdiň
Hemem men seň bilen diri.

* * *

Möwritini ötüripdir agaçlar,
Olaryň gözýaşy saraldýar ýeri.
Güýz gussa çümüpdir, göýäki ony
Terk eden deý iň bir ýakyn hemdemi.

Lezzet alýar çaga bary basgylap
Ýapraklaryň naýynjarja sesinden.
Ah, olar näbilsin şu ýapraklaryň
Gaçýandygny iň soňkuja nepesden.

Sowuk şemal üşetse-de baglary,
Nämüçindir, gyzgylt ýaprak ot alýar.
Şowhuny sowulan bazara meňzäp,
Seýilbaglar ýuwaş-ýuwaş boş galýar.

* * *

Günler sowapdyr ýene-de,
Goýalypdyr asman reňki.
Gulagyňy deşip barýan
Ses bilen şemal şuwlap ýör.
Çünki
Ýüregine ýel düşüpdir,
Galan deý kalbynda arman.
Ol derdine nirelerden,
Haýsy ýerden tapsyn derman?!
Aýnalaram bugaryp dur,
Jaýlaň howruna çydaman.
Pitikleseň pagyş-para
Bolaýjak ýaly hamala.
Gelipdir bar işin taşlap,
Ýetensoň gyşa jarnama,
Şeýdip ýene günler sowap,
Goýalypdyr asman reňki,
Ýyldyzlary tapmak çetin,
Olaryň agypdyr eňki.
Sowuga çydamy ýetmän,
Dim-dik bolan agaçlaryň
Başyna geldi bir möwsüm.
Her gezek possun geýinip,
Ýola rowana bolamda
Ýalaňaç galan baglara
Agyrýar nebsim...

* * *

Kandidata hat

(Sapa Hommadowa bagyşlanýar)

Hany, geç stola, kandidat dostum,
Öňküleriň ýaly goşgy ýazsana!
30-njy güni buşlugy bilen,
Bu ömüri sowgat bermiş ýaz saňa.

Ýasamalyk duýulmady sözleňde,
Ýaz ýaly ýylgyrdyň ýylgyran çagyň.
Sen şeýle bir bina gurun özüňe —
Goý, boýy ýetmesin hol Köpetdagyň!

Durmuş duşuşyklaň mesgeni, ýöne
aýralygam gapdalyndan goýanok.
"Her bir işde haýyr bardyr" diýsene!
Şol söz bize sogap berýär diýmesek,
Özümiz-ä hiç zat ýitiremizok.

25-de gussallarňy terk edip,
26-a şatlyk bilen goşul sen!
Bagt bagyň guramasyn hiç haçan,
Ömrüňe ýene kän ömür goşulsyn!

Janyň-a sag bolsun, dik bolsun başyň,
Arzyly menzilleň öňüňde häli.
Gyýylanňa degenog-a bu jahan,
Dünýe görnüşinden owadan, hä-mi?!

Hanha, seret, galam, kagyz hem stol
Saňa garaşyp dur, kandidat dostum!
Bagyşla, dagynyk boldy setirlem,
Uzak ýaşa!.. Jemläýin bu goşgymy.
Geçäýmesin 26 setirden.

30.03.2018ý.

* * *

Käte kalbym ýersiz-ýere darygýar,
Ýer ýüzünden tapylmajak deý emi.
Eje, dileg etmegiňi goýmawer,
Meni şu ýaşyma şolar getirdi.

"Başga zat däl, iki barmak maňlaýyň
daşy ýarjak bagty bolsun" diýýärsiň.
Bir gün şowlulyklar kakar gapymy,
Bilýän, hiç dert döremändir dermansyz.

Gussalar gursagma ataş düşürmez,
Bagtly ynsan gussa çümer ýörermi?!
Sen bir gün görersiň, ynanaý maňa,
Bu durmuşyň kynçylygny ýeňenmi.

Goýmaweri, eje, dileg etmegňi,
Şolar ahyr bu ýolumyň şuglasy.
Men görerin erteki deý dünýäniň
Bagtdan bezelen gözel tugrasyn.

* * *

Möwsüm

Möwritini ötüripdir agaçlar,
Olaryň gözýaşy saraldýar ýeri.
Güýz gussa çümüpdir, göýäki ony
Terk eden deý iň bir ýakyn hemdemi.

Lezzet alýar çaga bary basgylap
Ýapraklaryň naýynjarja sesinden.
Ah, olar näbilsin şu ýapraklaryň
Gaçýandygny iň soňkuja nepesden.

Sowuk şemal üşetse-de baglary,
Nämüçindir, gyzgylt ýaprak ot alýar.
Şowhuny sowulan bazara meňzäp,
Seýilbaglar ýuwaş-ýuwaş boş galýar.

Gülnar GELDIMYRADOWA