07:53 Mowzuk

Soňky döwürde göwnüme bolmasa gaýyn-gelin gatnaşyklary ýitileşdi birneme. Özümiň hem gaýyn bolanymdanmy nämemi durmuşda syn edip görýän welin gelininden hoşal gaýynlara sataşmak kynlaşan ýaly. Şu zatlary göz öňüne tutup baýdak ýaly gelinlerimize we indi gelin bolmaly gül ýaly gyzlarymyza käbir maslahatlary beresim gelýär.
1. Pylanyň gyzy " çykypdyr" diýilýär , (ýagny durmuşa çykanda gysgaça şeýle diýilýär) indi sen öz ataň öýünden çykdyňda öz hakyky öýüňe gaýtdyň,indi sen gelen ýeriňe goşul . Özüňi olardan aýra tutyp yzyňa öňki çykyp gaýdan ýeriňe seredip,eliňe telefony alyp " Eje,maňa ony et diýýärler,muny etme diýýärler,näme edeýin ?"-diýip çykyp gaýdan ýeriňden zat soramada täze goşulan ýeriň bilen boluber.
2. Geliniň çykyp gelen ýeri öz atasy öýünden ýakyn bolýandyr,seredip gör adatça ýogalan zenany atasy öýi dälde gaýynlary jaýlaýandyr.
3. Gaýynlaryňy özüňe duşmançylykly topar dälde,her ýagdaýda özüňi goldajak dostlukly topar diýip kabul et.
4. Hojalygyň her bir zadyny aýap sakla,zatlary dökän-saçan etme,isrip etme. Ýere gaçan ýekeje tüwi dänesi bolsada ýerden galdyr,isrip haramdyr.
5. Ýaşaýan otagyňy we jaýyň daş töweregini arassa sakla ,ýadyňdan çykarma şolaryň arassalygyna seredip seniň nähili adamdygyňy bilýändirler.
6. Gaýynlaryňa öz ata-eneňe hormat goýuşyň ýaly hormat we hyzmat et şonda olar hem seni öz gyzlary ýaly gowy görerler.
7. Adaty edilýän işlerden başga ýagdaýda bir iş etjek bolsaň gaýynlaryňa maslahat sal,belki ýagdaý seniň düşünşiňden başgaça bolup biler.
8. Gaýynlaryň halamaýan adamlary bilen gatnaşyk etme.
9.Her bir eden işiňi ak ýürek bilen et,minnet etme.
10. Gaýynlaryň saňa maslahat berse gulak as,ony özüňi kiçeldýäler diýip hasap edip ters dawa başlama.
11. Täze zat satyn almakçy bolsaň gelen ýeriň ýagdaýyna görä bol.
12. Hemişe ýagdaýyňa görä hojalygyň işlerine kömekleş.
13. Gaýynyň garyndaşlary bilen hem oňat gatnaşykda bol.
14. Hojalygyň zadyna tarhandökerlik etme.
15. Ataň öýüne ýygy-ýygydan gitme.
16. Her ýagdaýda göwnüňe geňeş,özüňe ýakmajak zady özgä etme.
Dogry,kä ýagdaýda ýaramaz ahlakly gaýynlar bolup olar öz gelinlerini öz gyzlary ýaly görmän,göýä satyn alynan gyrnak ýaly görjek bolýanlary hem durmuşda gynansakda bardyr. Ýöne,olar kän däldir,köpüsi gelin alyp guwanjak onuň az-kem hyzmatyny görjek bolýan gowy adamlardyr. Şonuň üçin birek-biregi goldap,düşünşip ýaşaň. Nebir durmuşyňyzy dawa-jenjeller,oňuşuksuzlyklar bilen kynlaşdyrmaň . Agzybir boluň şonda hemme taraplaýyn durmuşyňyz gowy bolar,Allahda sizden razy bolup berýän nygmatyny artdyrar.