Diňe beýik duýga ukyply ýürek giden bir milletiň öňüne düşüp, ony beýiklige ýetirip, külli adamzadyň ykbalyny kesgitläp bilýär. Gursagynda gurrumsak, pes ýüregi bolan kişi beýik işleri gaýryp bilmez.

Osman ÖDE.


***

Ol sazandady — diňe saz çalýardy. Sazandalygy bilen bolsa
halkyna özüni aldyryp bilipdi. Ýöne welin onuň ady il içinde «Şükür sazanda» diýlip ýöredilmän, «Şükür bagşy» diýlip ýöredilerdi.
Munuň özüne ýetesi sebäbi bardy.
Ol özüniň bütin ömründe iki sapar aýdym aýdypdy...

Nurmyrat SARYHANOW.


***

"Men juda gorkyaryn" diýdi.
"Näme üçin?" diýip soradym.
"Men şeýle bir bagtly welin, Resul doktor, şeýle ajaýyp bagt ynsana gorky berýär".
Men gaýtadan sebäbini soradym. Ol şeýle jogap berdi:
"Seň şeýle bagtly bolmagyňa diňe senden bir zatlar almaklarynyň öňüsyrasynda rugsat berýäler".

Halit Hüseýin


***

Söýginiň hakykylygy, beýikligi, duýgynyň hemişelikligi — söýginiň adamyň tutuş ömrüne barabarlygy. Beýle söýgi juda seýrekdir. Ol adam duýgusynyň wagtlaýynlyk, geldi-geçerlik häsiýetinden has ýokary galyp, düýpli bir zada öwrülen halatynda mümkin bolýar. Munuň juda seýrekligi bolsa duýgynyň öz tebigaty boýunça pursatlyk, wagtlaýyn närseligi sebäplidir.

Osman ÖDE.


***

...Ine, şeýdip, biz "enede surat bolup", "inip, jahana gelýäris. Herimiz öz ykbalymyz bilen ömür ýoluna gadam basýarys. Heniz oglankak, ol bize ene-atalarymyzyň sözi bilen gelýär. Soňabaka aýdymlara ulaşyp gelýär. Kitap-galam bilen bile gelýär. Soňra, ulalyp, bedenimiz hem ruhumyz kämilleşdigiçe, biziň özümiz onuň gujagyna dolýarys. Rus dilini eziz görýänleriň Puşkiniň gujagyna doluşy ýaly...

Hudaýberdi DURDYÝEW.


**

— Öýkünjeňligiň gutaran ýerinde şahyr başlanýar. Ol ýazýar, köpleriň aýtmagyna görä, oňat ýazýar, ony söýýärler. Ýöne günleriň biri, ol özüne öýkünip başlaýar. Düşünýärmisiňiz, bir wagtlar beýiklere öýkünen, indi alýar-da, özüne öýkünip başlaýar. Muňa çarhyň boş aýlanmagy diýilýär. Muňa öz şahyrçylyk talantyňa buýsanmak, tersine aýtsaň weli, öz zehiniň barlygyna "müñkürligiň" ýoklugy diýilýär.
Şahyr her gezek stoluň başyna geçende ýa-da her gezek täze goşga başlamazdan öň öz güýjüne müňkürlik etmese, goşgynyň şowly çykmajagy belli.
Öz-özüňe ynamyň başlanan güni şahyr gutarýar...

Gurbannazar EZIZOW.

***

...Aýbölegiň wagty bilen ukusy tutmady. Her gezek Akmyrat gaýdyp geler uçurlary ol birnäçe günläp oňly uklap bilmezdi. Häzirem ol hut şol pursady başdan geçirýärdi. Moskwa giden adamsy indi şu gije ýa-da ertiriň bir ýerlerinde gara bermelidi. Gije jemlendigiçe, töwerek suslanýardy. Ol birsalym Akmyrat bilen geçiren hoş günlerini ýatlap, onuň boý-syratyny göz öňüne getirip, oýurganyp ýatdy.
Hatda pikirinde onuň eli diplomatly, plaşyny eliniň egremçesine atyp, samolýotdan düşüp gelşini-de gördi. Ony aeroportdan, özüne golaý, gapynyň öňüne getirdi...
Ýüregimi elime alýan bolaýmaýyn diýip, öz bolşy hakynda oýlanansoň bolsa, ol uýalyp, öz-özüne käýindi.
— Ýaş gelin bol-a... Şu ýüregiň gizlin ýerde bolup, görünmeýänem bir gowy zat, ýogsam men ýalylar tüýs masgara bolaýmaly-da...

Agageldi ALLANAZAROW.



***

Sen şahyr! Dörediji! Hupbulwatan! Sen şu ýerde gerek. Seň egniňde tutuş il-günüň garamaty ýatyr. Öz göwnüň aramy üçin olar ýaly jogapkärli garamatdan gaçyp gitmäge seniň hakyň ýok!

Juma Hudaýguly.



***


Bagtly maşgalalaryň hemmesi biri-birine meňzeš bolýar. Betbagt maşgalalar özüçe şumbagt bolýar.

L.N.Tolstoý.


***

...Ýol gyrasyndan bulanyk suw akyp başlanda, erkek adam has-da howatyrlandy, ol durara amatly ýer gözläp, maşyny ýene az-kem öňe sürdi. Şonda sag çetden görnen gerişdäki öwsüp oturan güllere gözi düşdi. Bi jelegaýlarda gülleriň hem her toparynyň öz mülki, öz welaýaty bar bolara çemeli. Gyzyl gülli baýyrdan sary gül gözleme, sary gülli baýyrda gyzyl güller bitmez, bitse-de ösmez. Gözellere hem gabanjaňlyk, belki, güllerden geçendir...

Oraz Ýagmyr.


***

Ýaşuly bir zatdan bady gaýdan ýaly, elini terslin salgap goýberdi-de, gürrüňini dowam etdi:
- Ertekileri toplanyň gowy. Olary dessan aýdýan bagşylar bilegen bolýandyr. Onsoňam, hakyky bagşyny tap. "Indi saz özüme galdy. Muny menden başga bilýän ýokdur" diýip, döşüne kakyp ýören oglanlaryň ýanyna barma. Olar onlugyň ýerine ýigrimi bäşlik tutduraýsaň, gyzyp "Balsaýady" aýdyp otyrkalar, ony taşlap, "Ýarawjana-da" gygyryp bererler. Birneme düşjegini bilseler, çalyp oturan dutarlarynam satyp giderler. Bu nähili bolýar? Munuň özi urşa barýarkaň, gylyjyňy satan ýaly bir zat ahyryn! Onsoň masgara bol-da, gaç yzyňa. Emma bularyň gaçaslary ýok. Ol dutary satsalar, ýene birini ýasarlar. Çaý ýaşşik bilen panar tagta gytmy näme...

Halyl Kulyýew.


***

Kim bolsa bolubersin, her adamyň mugallymy bolýar. Onsoň şol mugallymyň hem mugallymy bolýar. Beýik alymlaram, görnükli akyldarlaram alymdyr akyldar bolup ýetişmezlerinden ozal öz mugallymlarynyň okuwçylary bolupdyrlar. Hiç kim hiç haçan we hiç ýerde öz-özünden alym, parasatly adam, hudožnik bolup ötägitmändir... Her bir nesliň özünden öňki ýaşap geçen mugallymlaryndan öwrenen ylmyna, özüniň özleşdirýän islendik hünärine we sungatyna hökman nähilidir bir täze zat goşýandygy, şunuň bilenem indiki nesil üçin mugallym bolup çykyş edýändigi adamzat nesliniň iň ajaýyp sypatlarynyň biri bolup durýar. Şeýdip, adamzadyň dünýä düşünişi ösýär we çuňlaşýar. Şeýdip, adamzat siwilizasiýasy kämilleşýär. Şeýdip, adamzat öz progresine tarap barýar.

Jalol Ikramy, täjik ýazyjysy.

***


— Dostlarymyň haýsydyr biriniň şu ömrümde, hiç bolmanda, bir gezek: "Osman, ýagdaýyň nähili? Näme kemçiligiň bar?" diýip, ýürekden soramagyny isleýärin. Soraýan ýok. Içki dünýäň, aladaň, begenjiň-gynanjyň bilen hiç kimiň işi ýok. Her kimiň öz aladasy. Ýanyma gelen diňe öz aladasy, öz bähbidi bilen gelýär.
Adamlar käte, hawa, käte öz aladalaryndan birje gez ýokary galyp, gapdalyndakylaryň aladaly dünýäsine seretse, kömegi ýetmese, hoşamaý söz bilen goldaw berse, gör, nähili gowy bolardy!

Osman ÖDE.


***


— Halk şahyrylyga çytraşýan şahyrlar öňki döwrem bolupdyr, häzirem näçe diýseň bar. Olar alajyny tapsa döredijiliginiň içini köne sözlerden, şiwe sözlerinden gyrmalaýarlar. Göçgünli äheňde çowdaryly meýdanlary tüýs ýürekden söýýändiklerini, özleriniň hem şu topraga jany-teni bilen baglydygyny aýdyp, goşgyny galplaşdyrýarlar. Dünýä edebiýatynyň, milli edebiýatyň läheňleriniň oran bugdaýlarynyň diňe hoşasyny çöpleýändiklerini aýdyp, mysapyrsyraýarlar...


Hamad Ybrahym Mustafa Hamad, yrakly ýazyjy

237

31

6

16

0

Mowzugy VIP edenler: