13:31 Mowzuk

Gadym döwürlerde iki sany jana-jan dost bolupdyr. Olaryñ ikisi hem belli söwdagär ekeni. Bir gezek olar argyşa gidip barýarkalar, tüsse ýaly uzap ýatan, Günüñ tylla şöhleleri bilen ýakyp-ýandyryp barýan ymgyr çölde azaşypdyrlar. Az wagtdan bolsa olaryñ azyk-suwluklary hem gutarypdyr.
Birdenem olaryñ öñünden iki sany sarymytyl-gyzyl
uzyn jürnükli küýze çykypdyr. Görseler ol küýzeleriñ birinde öwüşgini gözüñi gamaşdyryp barýan altyn-kümüş, beýlekisinde hem durnañ gözi ýaly dury suw bar eken.
Dostlaryñ biri çaltlyk bilen içi altyn-kümüşden doly küýzäni alypdyr-da, ony goltugyna salyp, hamana elinden biri alaýjak ýaly berk gysypdyr. Beýleki ýigit bolsa, gapdalynda duran içi suwly küýzeden birki gezek owurtlapdyr. Altynly küýzäni göterip durşuna ony synlap duran dosty:
- Ahow, dost edýäniñ näme? Küýzäni goýma, entek suw gerek bolar-a?! -diýip ýañsyly ýylgyryş bilen ońa ýüzlenipdir. Şonda dosty:
- Bilýärin. Ýöne bu gazaply çölüñ içinde suw altyndan hem gymmatlydyr. Bu galan suw, biz ýaly azaşyp, suwsuz galan adamlara-da gerek bolar ahyry-diýipdir-de, suwly küýzäni alman, ýoluny dowam etdiripdir.
Bularyñ ululy-kiçili gum depelerinden aşyp baryşlaryna, altynly küýzäni göterip barýan ýigidi aýdyp bolmajak derejede agyr ýadawlyk basypdyr.
Onuñ suwsuzlykdan ýaña aýaklaryny ätmäge mejaly galmandyr. Suwdan ganan dosty bolsa gujurlanyp öńe gidipdir. Ol arman-ýadaman ýol ýöräp, ahyry bir uly kerwene sataşypdyr we dostuny-da kerwene tarap alyp gaýdyp, şol içen bir owurt suwy bilen hem-ä öz janyny, hemem dotunyń janyny halas edipdir.
Kerwendäki adamlar olary suwdan-çaýdan tagamly naharlardan mazaly doýrupdyrlar. Altyna kowalaşyp kösenen ýigit ýadawlygy aýrylyp, özüni dürsänden soñ, başdan geçiren wakalaryny töweregindäkilere birin-birin gürrüñ beripdir. Gürrüñiniñ soñunda bolsa: "Wah men ýalñyşdym, baýlyga kowalaşyp, men-menlik etdim. Suw diýlen mukaddesligiñ gadyryny bilmän, ony şaññyrdap ýatan altyn-kümüşe çalyşdym" diýip, öz eden işine ökünýändigini ak ýürekden boýun alypdyr.

Özünde uly manyny jemleýän bu tymsaldan hem görnüşi ýaly birje owurt suw, dünýäniñ ähli baýlyklaryndan dür-merjenlerinden gymmatlydyr.