03:40 Mowzuk

ŞÜKRANALYK. (rowaýat)

Bir patyşanyñ ýekeje gyzy bar eken. Bir gün ol gyzyñ gözi görmekden galypdyr. Patyşa ýeke perzendiniñ bu ýagdaýa düşenine gaty gynanyp, ähli wezir-wekillerini çagyryp: "Bir aýyñ dowamynda gyzymyñ gözi açylmasa, ähliñiziñ başyñyz ölümli" diýipdir. Bu habary eşiden köşk emeldarlary ýurduñ çar künjüne çapar iberip,
"men tebip" diýenleri çagyryp, gyzyñ gözüne şypa etmek isläpdirler. Emma olaryñ hiç biri-de bu gyza kömek edip bilmändirler. Patyşanyñ beren möhleti hem gutaryp barýarmyş. Köşk emeldarlary bir ýere jemlenip: "Indi näme etmeli?" diýip alaçsyz oturypdyrlar. Olaryñ içinde köpügören, parasatly, dana kişi bar eken. Ol: "Beýdip gama batyp, näme etjegimizi bilmän, alaçsyz otyrmalyñ-da, özümiz ile çykaly, ilçilikdir, senden-menden akylly, seniñ-meniñ bilmeýänimi bilýänler-de tapylar. Belkem, olar bir çykalga salgy bererler" diýipdirler. Otyranlar bu teklibi makul görüp, hersi bir ýere gidipdir. Olar ençeme adamlar bilen gürrüñdeş bolýarlar, ýöne göwne makul gürrüñ eşitmeýärler.
Bir gün emeldarlaryñ biriniñ ýoly çopanyñ üstünden düşýär. Ol oña ähli zady aýdyp berýär. Çopan: "Ol gyza şükrana kişiniñ donuny geýdirip hem görüñ, belki onuñ gözi açylyp gitse-de gider"
diýipdir. Muny eşiden emeldaryñ ýüzi ýagtylyp,ýüreginde umyt döräpdir. " Bu gaty kyn hem däl ekeni" diýip, begenip, ýoldaşlarynyñ ýanyna baryp, olary şükrana adamyñ gözlegine ýollapdyr. Emma olaryñ ýekejesem durmuşundan razy, Allanyñ beren gününe, rysgalyna şükür edýän adamy tapman, lapykeç halda yzlaryna dolanyp gezipdirler.
Emeldarlaryñ biri "Geliñ muny salgy beren çopanyñ ýanyna baraly, onuñ özi bize şükrana adamy tapmaga kömek eder" diýip, çopanyñ ýanyna barypdyr. Çopan olara: "Hawa, men birini tanaýan" diýip, şükrana adamyñ salgysyny beripdir. Köşk emeldarlary salgy berlen ýere barsalar, ýerkümeden: "Eý Alla, beren günüñe şükür, bermeseñ-de şükür, bihasap şükür!" diýen sözlerini eşidýärler. Emeldarlar bir-biriniñ ýüzüne seredişip ýylgyryp: "Şükrana adamy tapdyk öýdýän?!" diýipdirler. Olar çasly sesi bilen: "Habarlaşyñ" diýýärler. Içerden: "Habaryńy aýt" diýen ses eşidilýär. Olar: "Bize seniñ donuñ gerek. Dona isledigiñçe altyn berjek" diýýärler.
Içerden " Menden siziñ bu hyzmatyñyz bitmez "
diýen jogaby eşidýärler. Olaryñ ählisi birden:
- Näme üçin-diýip soraýarlar. Ol adam:
-Sebäbi meniñ donum ýok-diýýär.
Köşk emeldarlary gama batyp oturan patyşanyñ ýanyna baryp, bolan wakany habar berýärler. Özi ýerkümede ýaşap, egnine geýmäge dony bolmasa-da gününden nalamaýan adama patyşa haýran galyp "Meniñ giden köşki-eýwanym, hyzmatkärlerim, tükenmez baýlygym bar, sanyýetmez leşgerim bar. Şonda-da men Allanyñ berenine şükür etmän günümden nalaýaryn"diýip oýa batypdyr. Şondan soñ emeldarlaryna azar bermän, Alla şükür edip ýaşapdyr. Onuñ köñlüne giñlik aralaşypdyr. Bu wakadan köp wagt geçmänkä, bir gün gyzynyñ: "Kaka men görýärin"diýen begençli sesini eşiden patyşa:
"ALLA bereniñe şükür, görkezeniñe şükür!" diýip gyzyny bagryna basypdyr.

Taýýarlan: Ş.Aşyrowa.