07:53 Mowzuk

AÝY DOSTLUGY (Tymsal)

Ir zamanlarda aždarha bir aýyny tutup iýjek bolupdyr. Şol barmana bir adam gelip, aždarhany öldürip, aýyny gutulgysyz heläkçilikden halas edýär. Aýy adamyň bu ýagşylygy üçin adam bilen dostlaşmak isleýär. Adam nirä gitse-de, onuň yzyndan galmaýar eken.
Bir gün adam keselläpdir. Aýy hem teý, onuň başujundan aýrylmanmyş. Ýoldan geçip barýan ötegçi biri bu adama şeýle diýýär: “Gardaş, sen öz kowumdaşlaňdan dost tutunsaň, gowy bolar. Aýy bilen nädip dost boljak, sen?!”
Adam aýy bilen bolup geçen wakany gürrüň berse-de, o kişi aýydan ynsana dost bolmajagyny aýdypdyr.
Adam bu ötegçä biçak gahary gelip:
– Sen, dostuma beýle zatlary diýmäge neneň het edýäň? – diýipdir.
Aradan birnäçe gün geçensoň, ol hassa adam surnugyp, uka gidýär. Wepaly dosty aýy bolsa, onuň başujunda otyrmyş. Onýança bir siňek gelip, wyzzyldap hassanyň ýüzüne gonupdyr. Siňegi gören aýy, ony kowalamaga başlaýar. Şonda-da, barybir, siňek ýene geläýýärmiş. Ol gelip, hassanyň burnuna gonýar.
Muňa aýynyň gahary gelipdir. Ol harsaň bir daşy alaga-da, adamyň burnundaky siňege zyňýar, siňek mynjyrap gidýär, heý, şundan soň adamyň diri galjak gümany barmy?!
Onsoň, şu tymsal akyldar şahyrymyz Magtymguly atamyzyň:
Bilgil, uzak gitmez aýy dostlugy,
Gahry gelse, depäň üzre daş döker
– diýen parasatly sözüni biygtyýar ýadyňa salýar.