"Saňa..."

Goý, begres atynsyn göwnüň galkynyp,
Men saňa sözleri üýtgedip aýtjak.
Agras pikirlerden ýiti, tagamly,
Özge netijeli, üýtgeşik aýtjak.

Kalba kerwen gurap giren gaýduwsyz,
Men saňa aýtjagym, hüýr edip aýtjak.
Dogry, sözler bolar käte, aýduwsyz,
Okara gözlerde köredip aýtjak.

Nur edip aýtjak,
Buz bölegi deý,
Kalba ornan gamy eretmek üçin.
“Nireden aýtdym men?” jümlesin bilmän,
Siňen gözlerime seretmek üçin.
Hem-de bu dünýäde ikimiz üçin,
Ýazylan sözlügi döretmek üçin.
Men saňa sözlerim üýtgedip aýtjak,
Ynamlylyk däbin ýöretmek üçin.
Üýtgeşik aýtjak.

Ýüregiňde men!
Ýalňyzlyk gujaklap pugta,
Bagtdan pytrabereninde,
Oň söýgüsi güýçli gelip,
Synam titräbereninde,
Meni tap!

Hiç goýberme onsoň elim,
Gyşda ellik alynmaýyn.
Tap meni, heniz ýitmänkäm,
Ýitjek bolup urunmaýyn.

Garratmasyn aýry ykbal,
Nazarlarmyz kütelmesin.
Meni tap Gün çoýup durka,
Asmanda Aý utanmasyn.

Bagtymyzyň birligine,
“Şaýat bolsun köpler” – diýseň,
Dyngy bilmän urup duran –
Ýüregiňde men,
Tap sen!

Üşärsiň!
Seni entek ýyladýandyr ýaşlygyň,
Gyşyň kyrk dür aýazyny syzmarsyň.
Göwräňi göterse bu goja zemin,
Göwnüň bir künjünde ýörendir Marsyň.

Ýalňyzlygyň çalýan ýiti sazyny,
Kütek görer lezzet doly akylyň.
Sebäp başyňdaky jahyllyk bilen,
Ýüzýänsiň tersine gerek akymyň.

Emma ýyllar ötüp, gara saçlaryň,
Seýrekleşip, reňki bolanynda ça:l.
Ýaşlygyň ýatlamaň bolar-da, aklyň -
goýberen ýalňyşyn alyp ýürekden,
Ony gam-gussanyň düýbüne oklap,
Hem çykaryp basarsyň-da alawa,
Gynarsyň, ahmal.

Ýok, ýok, ahmal bolmaz,
Anyk zad-a ol.
Harlap bir duýgyny, ýog-a begenen.
Daşyň ýaz bolsa-da, içiň buz bolar,
Üşärsiň!
Ýöne ol şoňa degerem.

GIDENIŇ ÜÇIN.
Dymyşlyga jora boldum bir sellem,
Ýüregim ynjady ýüreksizligňe.
Hiç öwrenşip bilmän hasrat kitabmyň,
Gaýta-gaýta bakdym gurak sözlügne.

Gaýrasyndan sil aýlandy kalbymyň,
Ilersinde alawlady ataşym.
Diňe özüm bilýän harasadymy,
Şol sil, şol alawyň basyş, tutuşyn.

Dymdy telewizor hem-de radiolar,
Dymdy köçedäki barýan adamlar.
Guşlar saýramady, gelmedi şemal,
Topuldy üstüme dymjygan gamlar.

Penjireden daşa çykmady asla,
Her güni bişirýän naharmyň ysy.
Diňe ýüregime ýetmedik ýaly,
Tyg goýdy bilekde gaharmyň yzy.

Ara wagt düşüp, aýlandy ýazlar,
Ýene peýda boldy ýürekde yşyk.
Düşündim kän zada, durmuş sagbolsun,
Iýdirse-de özüm özüme, kesip.
Dymyşlyga jora boldum bir sellem,
Ýüregim ynjady ýüreksizligňe.
Hiç öwrenşip bilmän, hasrat kitabmyň,
Gaýta-gaýta bakdym gurak sözlügne.
(näbelli awtor)

192

21

3

7

0

Mowzugy VIP edenler: