Mámmet Seÿidow / ***


Diýýärler, tokaýa düşenmiş eşek,

Aňňyranda tokaý gelýär lerzana.

Kimkä bu aýylganç sesli gelmişek?

Jandarlar hopugyp gaçýar her ýana.

Tokaýyň häkimi gazaply şirem

Gelmişegiň kimdigini tanaman,

Özüniň mülküne soragsyz giren

Eşege baş egip dilänmiş aman.

Bolýandyr aldanýan wagty şiriň-de,

Ýöne galp ömürler uzaklaşmaýar.

Eşekdigin tanap, günleň birinde

Ony bir zarbada tüýdüp taşlaýar.

***

Itlere-de aňsat däldir dünýäde,

Gara görnen ýerde üýrüp ýörmeli.

Müň adama ýigrendirip özüni,

Diňe bir adamyň göwnün görmeli.

Ýoly saklap jabjynsa-da, üýrse-de,

Olara biz bakmaýarys kineli.

Ýaly eýesiniň elinde itiň,

Ol şoňa ýaranyp, bir zat iýmeli.

***

Pöwrizäň bezegi, eý, belent çynar,

Eý, sen asyrlaryň düzen aýdymy,

Haýsy näkes seni persala edip,

Ýonuşdyryp ýazyp gitdi adyny.

Onuň üçin günäleme sen meni,

Onuň üçin kine etme döwrüme.

Şöhrat üçin, dostum, şöhratparazlar

Şeýdip pyçak çekýär özgäň böwrüne.

***

Gara gazan, gara däldiň aslynda,

Ak çoýundan ýasapdyrlar ýasanlar.

Ýyllarboýy ojar ýakyp astyňda

Sende nahar bişiripdi ynsanlar.

Hiç bir kine getirmegin göwnüňe

Aklygyňdan galmasa-da nyşanlar.

Hatar durup gaýnaryňa garaşýar,

Gara diýip göwni ýetmedik jamlar..

290

48

6

14

0

Mowzugy VIP edenler:

— 1 sagat vip etdi.23.02.2019 / 18:26:21