19:42 Mowzuk

EBEDI YŞGYŇ ÜZÜLMEÝÄN HALKASY...

Saryýagyz, goňur gözli bu gyz gün geçdigiçe suslanyp başlady. Suslandygyça-da, onuň güler ýüzi saralyp, saryýagyzlygy has-da artan ýaly boldy. Dagy näme, salkynjak howa ýaly şadyýan, gülende-de çyny bilen gülüp, begenç gözýaşlarynam gizlemän, gaýta olary ýyljajyk ýagşa öwrüp seçeleýän bu gyz, gussasynam hiç kimden gizläp bilenokdy. Ene ýüregi wlin, barybir duýgur bolýar-a...Ýöne enäni oda goýýan zat, bu ahwalyň her ýyl şol bir wagtda gaýtalanyp durmasydy. Ol gyzynyň aşa duýgurlygyna hem päli pesligine her ýyl şu wagtlar juda örtenýärdi. ,,Görgülijigim!..” diýip öz ýanyndan pyşyrdaýardy. Ene haýsy ot-çöpüň nämäniň dermanydygyny bilýänem bolsa, gyzynyň bu derdine derman tapanokdy. Dogrusy...ol derman bardy. Ýöne onuň derman bolaýşyny diýsene! Ol derman, olara ýylda bir gezek gelýän enäniň daşgynrak ýegenidi. Geplemezek, akýagyz, agras bu oglan her gezek gelende enäniň kiçi gyzyny hassa halyna salyp, özüne baglap, asyl özüne tutuşlygyna öwrüp gidýärdi. Wah, baglanam hiç diýseň, onuň bu gyz bilen hiç hili seri ýokdy. Salamlaşarlar, (salamlaşan wagty gyzyň ýüregindäki tolgunma şemala öwrülip, howa ýaýrap gidýärdi), az-owlak gezim ederler (gezim edip ýörkäler bolsa, gyzyň kalbyndaky gyzgynlyk bilen oglanyň kalbyndaky sowuklyk utgaşardy-da, tutuş howa birhili düşnüksiz bolardy). Onsoň?! Onsoň, ene öz gyzyny kynlyk bilen tanardy. Gyzy onuň ýegeniniň heňinde gürläp başlardy, onuň endiklerini, hereketlerini gaýtalardy, garaz, başga bir adam bolardy. Özem ol aglaýardy. Nädip aglamasyn, gyz görgüli öz söýýänini duýşy ýaly, öz söýülmeýäninem duýýar ahyry. Bu oglan gelenden soň onuň aglamasam görnetin köpelýärdi...Gyz saralyp-solup, tutuş älemi saraldyp goýaýardy. Ýaprajyklar dagy gyza seredip, saralyp-saralyyyp, şahalardan üzülip gaçarlar. Käsi oýun eden bolup böker, käsi bolsa... biygtyýar. Olar gyzyň ýörejek ýoluny bezäp, nepis, sary düşek bolup ýatardylar. Gyzyň weli olarda gözem eglenenokdy...
Oglan her gelende on iki hepde dagy bolardy, kä ýyllar ondanam köpräk myhman bolardy. Onuň myhmançylygynyň möhleti enäniň uly gyzynyň geljek wagtyna baglydy. Enäniň ol gyzy daş ülkeleriň birinde ýaşaýardy. Enesiniň ýanyna bolsa, ýylda bir gezek gelerdi. Ol gyzy enäniň beýleki gyzyndan tapawutlylykda şadyýandy, buýsanjaňdy, alçakdy. Bu häsiýetleri ony has-da owadan edip görkezýärdi. Onuň aşygy ýetikdi. Aşyklaryň birem, enäniň şol ýegenidi. Ol enäniň uly gyzyna jan-dilden aşykdy. Şol gyz geldigi bes, onuň agras gylyklary ýeňläp, tutuksy dymmalygy zym-zyýat bolardy. Akýagyz ýüzi tiz-tizden gyzarardy. Gyzyň göwnüni tapjak bolup heläk bolaýardy. Ol gyza bolsa oýun gerek!.. Gyz oňa doňup ýatan çeşmeleriň doňuny, daglaryň depesindäki galyň-galyň garlary yşkdan tütäp duran demi bilen üfläp çözmegi buýurýardy. Buýruk berjaý! Soň gyz oňa özi hakdaky söýgi aýdymlaryny aýtdyrardy. Oglan söýgi aýdymyny aýdýan mahaly, garyň aşagyndaky güljagazlar başlaryny galdyryp, yranyp tans edýärdler. Oglanyň aýdymyndaky mähir tutuş howa ýaýrap, birhili heýjanelek duýgular oýanýardy. Howanyň süňňündäki bu täsin hal hemme adamlara ýaraýardy. Olar her ýyl bu pursatlara sabyrsyz garaşýardylar.
Haýp, enäniň uly gyzy ol akýagyz oglany söýmeýärdi. Oňa olaryň goňşulary, ýylda üç aý joşgunly, dynman meýdanda işläp, galan wagtyny öýde kitap ýazyp geçirýän çypar saçly, ýazyjy oglan ýaraýardy. Ol oglan ýiti sözli, düşbi hem jepakeşdi. Çalasyndy, ,,Ot ýaly” diýilýän oglandy. Işleýän döwri dagy ähli miweleri, ir-iýmişleri bal ýaly edip ýetişdirerdi, soň ony enäniň kiçi gyzy bilen bile ýygnardy. Eden işiniň ählije abraýyny diýen ýaly gyza goýup, ähli işi şol gyz eden ýaly görkezýärdi. Olar (göräýmäge) dostdular. Gyz özüni onuň bilen dost hasaplasa-da, goňşy oglan ony şeýle bir, şeýle bir gyzgyn söýgi bilen söýýärdi.
Wagt näme, serhet bilýärmi...Onuň döwülmezek arabasy tigirlenip-tigirlenip, enäniň ýegeniniň yşkdan eräp-akyp gitmeli wagtyna, enäniň uly gyzynyň äleme söýgi paýlaýan şadyýan gözlerini umytdan dolduryp öýlerine gezelenje gelmeli wagtyna, çypar goňşy oglanyň öz kalbynda ýaşaýan howurly hem ýagty söýgüsi barada täze bir kitap ýazmaly wagtyna, enäniň kiçi gyzynyň bolsa saralyp-solup şol köneje yşgyna ýene-de täzeden düşmeli wagtyna nobaty bilen ýetip durdy. Köpügören mähriban ene bolsa, bu ahwallary hut öz jigeriniň üstünden geçirýärdi. Bu hasap, bu düzgün dünýe döräp hiç uýtgemän gelipdir. Yşk derdiniň ezýetli lezzetini çekmek, adama däl, ilki bilen tebigata berlen bolarly...