15:38 Mowzuk

Remezan (oraza) aýy bereketden doly bir aýdyr. Adamzadyň garaňkylyga bürenen gözýetimini aýdyňladan Kurany Kerim şu aýda inmäge başlapdyr. Yslam dininiň bäş esasyndan biri bolan orazanyň hem şu aýda tutulmagy emir edilipdir. Bu barada Kurany Kerimiň «Bakara» süresiniň 185-nji aýatynda şeýle diýilýär:
«Remezan aýy ynsanlara dogry ýoly (hidaýaty) görkezýän we dogry (hak) bilen egri ýoly (batyly) biri-birinden tapawutlandyrýan äşgär alamatlary (özünde jemleýän) Kuranyň inderilen aýýdyr. Kim bu aýa ýetse, onda agyz beklesin! Sizden her adam (bu aýda) hassa ýa-da ýolagçy bolsa, ol (tutup bilmedik) sanalgy günleriniň (kazasyny) başga günlerde tutar. Alla (ybadatlaryň) siziň üçin ýeňil bolmagyny isleýär, size kyn bolmagyny islemeýär. Bular siziň (oraza aýynyň) sanalgy günlerini doly tutmagyňyz we (Onuň) sizi dogry ýola gönükdirenligi üçin, Allany (hamdy-sena) bilen wasp we şükür etmegiňiziz üçindir».

Remezan aýy sogabyny Allatagaladan umyt edilip yhlas bilen köp ybadat edilýän aýdyr. Bu aýda käbir ybadatlary beýleki aýlardan tapawutly has köp ýerine ýetirmelidiris. Ol ybadatlaryň esasylary gysgaça şulardan ybaratdyr:

1) Oraza tutmak. Oraza tutmak dinimiziň esasy parz ybadatlarynyň biridir.

2) Terawih (Tarawa) namazyny okamak. Bu namaz remezan aýynyň gijelerini nurlandyrýan we metjitlerimiziň jemagat bilen dolup daşmagyna sebäp bolýan diňe remezan aýyna mahsus bolan bir namazdyr. Pygamberimiz Muhammet aleýhissalam:
«Kim remezan aýynyň artykmaç bir aýdygyna ynanyp we Allatagalanyň sogabyny bermegini umyt edip, terawih (tarawa) namazyny okasa, onuň geçmişde eden günäleri bagyşlanar» diýipdir (Buhârî, «Terâvih», 1; Müslim, «Salâtü’l-müsâfirîn», 25).

3) Kurany Kerimi hatym etmek. Her ýylyň remezan aýynda Pygamberimiz Muhammet aleýhissalam Jebraýyl aleýhissalama azyndan bir gezek Kurany Kerim okap beripdir. Biz musulmanlaryň hem Pygamber aleýhissalama eýerip azyndan bir gezek Kurany Kerimi hatym etmegimiz örän sogaply ybadatdyr.

Ubeýý ibn Kagb, Abdullah ibn Mesgud we Muaz ibn Jebel (Allatagala olardan razy bolsun) ýaly kary we alym sahabalar remezan aýynda Kurany Kerimi hatym eder ekenler. Kary bolmadyk sahabalar bolsa ýat tutan aýatdyr sürelerini okar ekenler.

Remezan aýynda metjitlerde Kurany Kerim okalmagy Pygamberimiz Muhammet aleýhissalamyň, sahabalaryň we uly yslam alymlarynyň durmuşlary bilen baglanyşykly örän sogaply ybadatdyr.