Soňky model gara "Prado" keselhanaň öňüne gelip togtady. Garawulhanaň içinden açylýan demir derweze berk ýapylandy. Içeride arkaýyn çaý süzüp oturan garawul "derwezäni açyň" diýmek üçin yzly-yzyna basylýan maşyn signalyna üns hem bermedi. Şondan soňra "Pradonyň" yzky gapysyndan orta ýaşlaryndaky murtlak, kamaty dik, ýeňi kelte köýnekli bir ýigit düşdi. Onuň yzýany ýene başga bir telohranitele meňzeş ýigit tirkeşip düşdi.
Maşyndan birinji bolup düşen ýigit garawulhanaň öňüne gelip, dyzyny dyzynyň üstüne goýup oturan ýaşula salam berdi.
- Gaýrat ediň, maşyn bilen giräýeli.
- Gadagan - diýdi garawul.
- Gaýrat ediň, diýýän.
- Menem ýok diýýän.
Ýigit jübüsinden bir ýigrimi manatlygy sogurup, tüýnükden içerik oklady.
- Gaýrat ediň, bizi göýberiň.
- Türkmençä düşünýäňizmi siz? Mümkin däl, gadagan diýdim ahyryn - ýaşulyň gahary geldi.
Ýigit ýene bir ýigrimligi öňki pulyň üstüne goýdy.
- Bäş minuda girip çykýas. Beýdip adamy kösemäň ýaşuly.
- Näme meni satyn aljak bolýaňyzmy! Pulyňy jübüňe salyp goý - diýip, garawul ýaşuly beter ters tarapa öwrülip oturdy.

- Özüňiz bilýäňiz agam, köp sagboluň size - diýip ýigit ýumşak äheňe geçdi we ýanyndaky ýoldaşyna ýüzlendi - Seret nähili halal adamlar bar.
- Bular ýaly halal, satylmaýan adamlar juda kem - diýip, ýoldaşy hem gepi makullady.
- Minnetdar size agam! Ömrüňiz bolsun! Aslynda siziň ýeriňiz däl bärsi - diýip, murtlak ýigit entegem ýaşulyň gulagyna ýag çalýardy. - Siz ýaly adamlaryň orny uly kärhanlaryň ýolbaşçylygy - diýip, hamala gudratly bir zadyň tarypyny edýän ýaly ýoldaşyna hem "şeýle gerek" diýen manyda baş yňrady. - Beýle kişileri ikirjiňlenmän uly wezipelere göterse bolar. Çünki olaryň gözi dok, duş gelen adamdan bir zatlar ýolaýyn diýip gözüni mölerdip oturmaýalar. Seret, nähili ýagşy adam ekeni. Arman, ýaşy bir çene barypdyr-da, eger ýaş bolan bolsady, şu güniň özünde gowy häsiýetnama ýazyp, gerekli resminalary üýşürip ýokary bir wezipä hut öz elim bilen teklip bererdim.

Murtlak ýigit ahyrky sözlerini has arşa göteriji äheňde aýtdy. Ony sessiz diňläp oturan garrynyň birden ýüzi ýagtylyp gitdi. Köpden bäri beýle ýakymly sözleri eşitmändi. Derwezäni açýan knopga eliniň nädip baranyny hem bilmän galdy.
- Bolýa, beýle zerur bolsa bäş minuda girip çykmana rugsat bereýin - diýip, ýigitlere mylaýymlyk bilen seretdi.
- Wah, şeýtsene ýaşuly - diýip maşyna tarap öwrülen murtlak ýigit, - Hany sen satylmaýadyň-la - diýip, içinden şywyrlady.

155

29

6

11

0

Mowzugy VIP edenler: