Özüniň öwünip bilşine görä synaglaryny "pul bilen bir ýüzli edip" okuwyny tamamlap oba gelen Tenäýew çagalar lukmany bolup işe ýerleşdi. Bu gün birinji gezek kömekçi şepagat uýasy bilen, çagyryş boýunça näsag çagany barlamana geldi. Agşamdan bäri mazasy bolmaýan üç aýlyk çagany gorka-gorka eýlesine-beýlesine agdaryp gördi, sypalap gördi, фонендоскоп bilen döşüni, ýüregini we garnyny eşiden boldy.

Maňlaýyny der basyp uzak wagt oýlandy. Okan kitaplaryny göz öňüne getirip, ýatlamaga çalyşdy. Emma içigaragalmyş kelle bom-boş, suwkädi ýalydy. Maňlaýyna elini diräp bytnaman oturyberdi. Çaganyň ene-atasy onuň bu bolşuny syn etmekden ýadap, sorag bermäne mejbur boldular:
- Dogtor, oglumyza näme bolupdyr? Ýagdaýy nähili?
Tenäýew jogap bermän ýene biraz öýüň diwarlaryna, pataloga seredip oýlanyp durdy-da, soň birden:
- ÇanÇuw - diýdi, tötänden kellesine gelen pikire guwanyp.
- Näme? - çaganyň ene-atasy gorkup gitdi. Täzeden soradylar:
- Näme diýdiňiz?
- ÇanÇuw. Çan-çu-uww... - diýdi Tenäýew olardan nazaryny sowup. Öý eýeleri biri-birine seredip eginlerini gysdylar, emma gaýtadan soramana milt etmediler.
- Siz çaga özüni dürsär ýaly bir ukol urup goýuň... Men bolsa ikinji çagyryş boýunça nobatdaky näsaga tiziräk barmasam bolmaýar. Oň ýagdaýy agyrrak diýdiler. Men gitdim. Siz bolsa yzymdan baryberiň... - diýip Tenäýew şepagat uýasyna tabşyryp howlukmaç öýden çykyp gitdi. Gyssagarada derman-däri ýazyp bermegi hem ýadyndan çykardy. Wraç gidenden soňra, öý eýeleri şepagat uýasyna:
- Dogtor näme diýdi? Düşünmedik. Çang Çung diýdimi?
Köp ýyllardan bäri işläp gelýän şepagat uýasy wrajyň aýdanyny sadarak düşündirip berdi:
- Wrajymyz çagaňyz synçgylawuk bolupdyr, ýagny biraz dümewläpdir diýdiler. Synçgy diýdigi bu ýaponça kesel anyklaýyş.
- Hä-ä. Synçgy diýiň. Haýran galdyrdyňyz. Biz bolsa oglumyzda agyr bir kesel anyklandymyka diýip gorkdyk. Bu ýaponça sözlerem özümiziňkä meňzeş eken-ow asyl?! Çan-çuw - Synçgy. Synçgy - Çan-çuw... - diýip, gülenini bilmän galdy kakasy.
- Edil özi, edil özi... Çançuw diýdigi synçgylawuk diýdigi - diýip, şepagat uýasy hem öz bilşiçe çaga birinji kömegi berdi we ýene bir zady soraýmasyn diýip howul-hara wrajyň yzyndan çykyp gitdi. Ony derwezäň gapysyna çenli ugradyp duran öý eýesi entegem:
- Çan-çuw - Synçgy, çan-çuw - Synçgy.. Bäh, nähili meňzeşligini görsene bu ýaponça sözüň - diýip, kä haýran galardy, kä gülerdi. Kalbynda bolsa çagasyny ýene başga bir lukmana görkezäýsemmikäm diýen oý-pikirler geçýärdi.


1978ý.

196

35

9

8

0

Mowzugy VIP edenler: