Şäher "Ýol gurluşygy"-nyň başlygy Hekim Hekimowiç ýaňy bir işden gelip gapydan ätledi welin, telefon jyryňlady.
- Diňleýän!
Aňyrdan kimdir biriniň aglamsyraýan owazy eşdildi:
- Ýagşymy siz hojaýyn. Işimiz gaýdandyr. Ýüzigara bolandyrys. Ýaşululaň biriniň kakasy ýogalypdyr.
Bu gürrüňe Hekim Hekimowiçiň gahary geldi. Ölse ministriň kakasy ölüpdir. Bu näme aglaýak-a.
- Alla rahmet etsin. Garry bolsa ölmelemdä elbetde, sen nämä aglaýaň. Ýa ol daýzaň ärimidi. Päheyt däninim, tapýan gürrüňini.

Garşy tarapdaky adam biraz özüni dürsedi. Emma barybir sesinden gorky syzylyp durdy:
- Hojaýyn, ýaşulyň kakasynyň jaýlanjak gabrystanyna "Dostluk" köçesiniň üsti bilen barylýar. Köçe gazylyp goýulan. Dyz boýy çukur bolup ýatyr. Häzirem howanyň tüýsi gowy däl. Hudaý urup, ýagyşam ýagaýsa, ertir tabydy batgalygyň içinden ýöräp geçirmeli bolar. Üstesinede merhumy jaýlamana "ýokarrakdan" hem adamlar geljekmiş. Maşynlary batyp galyp masgara bolaýsalar ikimizem tamam bolýas.!

Hekim Hekimowiç meseläň anygyna indi düşünen ýalak boldy. Biraz oýlanyp duranyndan soň, başga telefon belgä aýlady:
- Maňa seret Seýidow! Çaltlyk bilen "Zähmetkeş" köçesindäki aswalt düşeýän gijeki smeni "Dostluk" köçesine geçiriň!
- Ol köçe geçen aý bitirip tabşyrylmalydy. Men muny başarmaryn! - diýen ses eşdildi aňyrdan.
- Buýrugy berjaý ediň. Ýarym sagatdan özüm hem şol ýerde bolýan - diýip gürrüňi çürt-kesik etdi Hekim Hekimowiç.

Soňra inženere baglandy.
- Ýura, gepi eşit, çaltlyk bilen "Dostluk" köçesine goşmaça aswalt düşeýän maşynlar bilen prožektorlary iber. Adatdan daşary ýagdaý boldy. Köçe gyssagly remont edilmegi gerek. Berekella, düşünjeli ýigit sen. Onda neme-e, maşynyň bilen bize gelde menem alyp geç.

Daňa çenli köçe tekizlendi. Köçe gyrasyndaky baglaryň hem aşagy hek bilen aklandy. Ukudan oýanyp, daşaryk çykan Dostluk köçesiniň ýaşaýjylary öz köçesini tanaman, huşummy ýa düýşümmi diýip, özüni çümmükläp görenlerem tapyldy.

Işçileri hem aýaman, özi hem iş üstünden hiç ýere milt etmedik Hekim Hekimowiç, işi başga birine tabşyryp, tabyt alnyp geçilenden soň, haýal etmän özüne duýdurylmalydygyny sargady-da öýüne gaýtdy.
Ýaňy bir öýe girip, ýuwunyp, çaý içmekçi bolup duran mahaly "gopgunçy" jaň etdi.
- Alo, Hojaýyn. Planlar üýtgedi. Ýaşulyň kakasyny "Zähmetkeş" köçesinden alyp gidilmeli edipdirler.

Hekim Hekimowiç bu habardan bir böküp düşdi. Soňra, köwşüni hem geýmän köçä tarap atyldy...


1976 ý.

153

31

10

11

0

Mowzugy VIP edenler: