07:53 Mowzuk

KAKMAÇ

Goýnuň çylka ýerini (artky aýagyn, döşün bölekleri) 80-100 gram agramdaky, 1,0-1,5 sm. galynlykdaky böleklere bölmeli, biraz ýençmeli, duz, burç sepip, gyzyp duran tabada 12-15 minutyn dowamynda iki tarapyny gowrup almaly. Kartoşkany aýratyn gowurmaly. Munuň üçin kartoşkany süýri görnüşinde dogramaly, duz sepip, ýaga atyp gowurmaly. Nahar äberilende onuň üstüne gowrulan kartoşka goýulýar, töweregine etin bölekleri ýerleşdirilyär, dogralan gök otlar sepilyär.
Taýýarlamak üçin:
1 kg çylka et,
3 nahar çemçe sary ýag,
2,5-3 kg kartoşka,
gök otlar,
islege görä duz we hoşboý ys we tagam beriji zatlar gerek bolýar.
Kartoşkany gowurmak üçin ulanylýan ýag bu düzüme girizilmedi.

KÜLÇE

Undan, ýagdan, şekerden, süýtden, suwdan we duzdan hamyrmaýasyz gatyrak hamyr taýýarlamaly, ony 30-40 minut basyryp goýmaly we 50-70 g. agramda böleklemeli. Hamyryn böleklerini çalarak ýaýyp, tegelek görnüşe getirmeli. Külçe tamdyrda bişirilyär, ýüzüne ýanan ýag çalynýar.
Taýýarlamak üçin:
2 kg. una
1 bulgur ýag,
0,5 bulgur şeker,
2 bulgur süýt we
1,5 nahar çemçesi duz gerek bolýar.

«GÜLÜSTAN» IŞDÄAÇARY

Etin iri bölegini gowurmaly sowadylandan soň böleklere bölmeli. Kartoşkany daşy bilen gaýnatmaly we sowadylandan soň gabygyny aýyrmaly hem-de kubiklere bölüp kesişdirmeli. Hyýarlary hem dörtburç görnüşinde kesişdirmeli, sogany we gök otlary maýda dogramaly. Kesişdirilen gök önümleri gaýmak bilen garmaly işdäaçar üçin niýetlenen tabaga ýerleşdirmeli, ýüzüni ýumurtganyn, etin, pomidoryn bölekleri we gök otlar bilen bezemeli. Gaýmagyn ýerine maýonez ýa-da gaýmak bilen maýonezin garyndysyny ulanmak bolýar.
Taýýarlamak üçin:
0,5 kg. et,
0,5 kg. kartoşka,
4 sany hyýar we 4 sany pomidor,
3 sany ýumurtga,
1 bulgur gaýmak ýa-da 0,5 bulgur maýonez,
gök soganyň bir dessesi,
islege görä duz we hoşboý ys we tagam beriji zatlar gerek bolýar.

GAWUN ŞERBEDI

Aşa bişmedik ter gawunyň paçagyny we çigidini aýyrmaly, soňra owunjak dograp, üstüne şeker sepmeli we salkyn ýerde 2-3 sagatlap goýmaly.
Gaýnap duran suwa gawuny we şekeri atyp, pessaýja otda ýene-de 2-3 minut gaýnatmaly we sowatmaly.
Taýýarlamak üçin:
1 kilogram arassalanan gawuna
1 bulgur şeker,
2 litr suw gerek bolýar.