09:49 Mowzuk

Hamyry üçin:

100 gram mesge ýa-da margarin,
1 stakan şeker,
3 nahar çemçesi ary baly,
3 ýumurtga,
1 çaý çemçesi nahar sodasy,
Ýeterlik mukdarda un (hamyr gulak ujunyň ýumşaklygynda bolmaly, şonuň üçin hem uny özuňiz gözüňiziň çaky bilen ölçersiňiz).

Kremi üçin:

250 gram mesge,
250 gram şeker,
250 gram plitka şokolad,
4 ýumurtganyň agy,
100 gram owradylan hoz ýa-da pisse,
1 gap wanilin,
150 gram şeker tozy (şeker uny).

Taýýarlanylyşy:

Bir kiçiräk gazanyň ýa-da okaranyň içine 100 gram mesgäni, 1 stakan şekeri, 3 nahar çemçesi ary balyny atyp, ony içi suwly gaýnap duran başga ulurak gazanyň içine salmaly we hiç arasyny kesmezden bulap durmaly. Şekeri gowy eränden soňra, üstüne 3 ýumurtgany yzly-yzyna çakyp, çalt-çaltdan bulap durmaly. Çünki gyzgyn suwyklygyň içinde ýümurtga bişip, tokga tutmaz ýaly, näçe çalt bulasaň şonça gowy. Soňra ýene-de ýaňky kiçi gazany gaýnap duran içi suwly uly gazanyň içine goýmaly we içine 1 çaý çemçesi nahar sodasyny atyp bulamaly. Ýaňky garyndylar ak köpük bolup çişer welin, bulap-bulap suwly gazandan çykarmaly. Soňra ýaňky gyzgyn bulamagy hamyr ýugrulýan çanaga guýup biraz sowatmaly. Biraz gyzgyny barka, üstüne un guýup ýugurmaly. Bu hamyr gowy ýugrulandan soňra, birhili eliňde pytrap barýan ýaly bolar. Kän bir gaty hem bolmaly däl. Gulak ujunyň ýumşaklygynda bolmaly. Soňra ony hamyrçanakdan çykaryp, 10 bölege bölmeli we her bölegini tokgalap, soňra-da una bulap, saçagyň üstünde biri-birine degişdirip, öwrüp we üstüni ýapyp goýmaly. Edil şol arada duhowkany ýakyp goýmagy hem unutmaly däl. Soňra gapagyň üstüne un sepip, ýaňky hamyrlary bir-birden ýaýmaly. Hamyry ýaýan wagtyň, diýseň dykgatly bolmaly, çünki ahmal bolsaň, hamyr pytrap barýandyr. Hamyr göz çaky bilen “gowy ýukalanandyr-da” diýeniňden soňra, ýaýylan hamyrlaryň hemmesiniň ululygy birsydyrgyn bolar ýaly gyrasyny bir tarelkanyň ýa-da okaranyň kömegi bilen kesmeli. Onuň üçin ýaýylan hamyryň üstüne tarelka ýa-da okarany düňderip, onuň daş-töweregini pyçak bilen kesmeli. Soňra taýar ýaýylan hamyrlary bir-birden bişirmäge başlamaly. Bişirmek üçin duhowkanyň ýörite öz sajyny alyp, ýaňky ýaýylan hamyryň goýuljak ýerine gowy edip un sepmeli, onda-da gowy edip sepmeli. Şeýle edilende ýaýylan hamyr hem-ä ýelmeşmez hem-de ýanmaz. Ýöne duhowkanyň sajy welin gyzgyn bolmaly däl. Onuň üçin-de duhowka gyzdyrylmaga başlanmazdan öňürti, onuň saçlary daşyna çykarylmaly. Soňra tortyň bir tarapy bişenden soňra, beýleki tarapyna öwürmeli. Eger duhowkaňyz hem ýokarsyndan, hem aşagyndan gyzdyrýan bolsa, onda şol bir wagtyň özünde iki tarapy-da bişer, ýagny eýlesine öwürmegiň geregi-de ýok. Şeýdip ýaňky on bölegiň onusyny-da bişirip serip goýmaly hem-de mazaly sowatmaly, eger çalaja gyzgynlyk galsa, onda arasyna krem goýan wagtyň ol krem eremäge başlar. Onuň üçin hem hiç-hili gyzgynlyk bolmaly däl. Şeýlelik bilen “Karlowar” tortunyň hamyrly işi tamamlandy.

Kreminiň Taýýarlanylyşy:

Onuň üçin öý gyzgynlygynda biraz ýumşan mesgeniň üstüne şekeriň ýarysyny guýup bir gyrada goýmaly. Soňra 150 gram plitka şokolady ýaňky hamyryny taýýarlanymyzda edişimiz ýaly, bir kiçiräk syrçaly gabyň içine bölüşdirip atmaly we ol gaby içi suwly gaýnap duran başga ulurak bir gabyň iýine salyp eretmeli (Bu erediliş usulyna “benmari” usuly diýilýär. Şeýle edilen ýagdaýynda şokolad öz aýratynlygyny ýitirmeýär we sowandan soňra ýene-de öňki hilini we aýratynlygyny saklaýar.). Soňra üstüne şeker guýlan mesgäni eliň bilen garyşdyrmaly. Soňra owradylan maňyz ýa-da hozy içine atyp garyşdyrmaly we ýumurtganyň agyna ýuwaş-ýuwaşdan goşup gowy edip garyşdyrmaly.
Kremy ýasamak üçin hökmany suratda mikseriň bolmaly. Ýogsa krem göwün islegiňizçe bolmaz. Çünki mikseriň aýlanma tizligi uly bolansoň, ýaňky mynçgalanan garyndy çişip, 2-3 esse köpeler. Ondan soňra hälki bişirien çapady şekilindäki kökeleri bir-birden gatlak-gatlak edip goýup, hersiniň arasyna ýaňky kremden çalyp, onusyny-da örmeli. Iň soňunda galan 100 gram şokolady edil ýokarda edişimiz ýaly eretmeli we içine şeker tozuny 2-3 nahar çemçesi ýyly suw goşup, gowy edip garyşdyrmaly. Soňra ony iň üstki böleginiň üstüne we tortuň daş-töweregine çalmaly. Hormatly okyjylar, işdäňiz açyk bolsun! IMG]https://c.radikal.ru/c21/2103/a5/bb70133b34e6.png[/IMG]