15:19 Mowzuk

OGULTÀÇ ORAZTAGANOWA

Ôzûmem bilemok munuň sebäbin...

Bu nämüçin beýle bolýa, bilemok,
Gözýaş bilen bagly bolýar ýazanym.
Ýok, men birçak özümdenem geçerdim,
Eger-de bar bolan bolsa ýalanym.

Şoň üçin ýalandan gülüp bilemok,
Aglabam göremok, ýalan gurasyn!
Işim ýok ýamanlaň ykbaly bilen,
Ýagşylary Hakyň özi gorasyn!

Bu nämüçin beýle bolýa, bilemok,
Aglamaga mejbur edýär ýazanym.
Düýnümden ertäme çenli uzaýyp,
Maňa indi sapak bolýar ýananym.

Soň üçin men ýanman ýazyp bilemok,
Ele galam alsam, çyglanýar gözüm.
Bir gün şol gözleriň süzülen wagty,
Galar diňe aýdyp ýetişen sözüm.

...Ýek gördügim, gaçdygym gam,
şu wagt hem
bagtdan ýaňa al öwüsýär ýaňagym.
Özümem bilemok munuň sebäbin,
Gussalyrak bolup çykýar ýazanym.

Heÿ-de, "ýalan ýaly" diýip bolarmy?!

Içimdäki harasatlar, pikirler,
Bu dünýäniň rahatlygyn bozarmy?
Düýnki öwsüp giden mymyk ýellere,
Hem açylan elwan, sary güllere,
Heý-de, "ýalan ýaly" diýip bolarmy?!

Dileglerim bilen tirkeşip barýan
arzym Hakyň dergähine bararmy?
Gögüň yşky bolyp ýagan ýagmyra,
Hem gözlemden akyp duran ahmyra,
Heý-de, "ýalan ýaly" diýip bolarmy?!

Bir-de aglap, bir-de hoş bolup ýazýan
goşgularym kalba aram berermi?
Wah, bagryňdan geçip barýan sözlere,
Hem söýgüden ýanyp duran gözlere,
Heý-de, "ýalan ýaly" diýip bolarmy?!

Gaşym çytman hyzmatyny etdigim,
Dirilikde gadrymy bir bilermi?
Ojagyma bolan ýyly mährime,
Hem kämahal gelip-gidýän gahryma,
Heý-de, "ýalan ýaly" diýip bolarmy?!

Dirilik ynsana Hakyň peşgeşi

Adam şoňa aýdar eken arzyny,
Golaý-goltumynda bolsa dertdeşi.
Käte onuň bilemzogam gadryny,
Dirilik ynsana Hakyň peşgeşi.

Ýaşaýyş özgermez gazabym bilen,
Bezesedim ony galamym bilen!
Duýýan muny häzir ýüregim bilen,
Dirilik ynsana Hakyň peşgeşi.

Durmuş ölçär, dogrumyň ýa ogrymyň,
Istärin men tör bolmagyn ornumyň,
Elinden gelmeýän adam oglunyň,
Dirilik ynsana Hakyň peşgesi.

Elimden düşmesin durmuş küregim,
Jan saglykdyr munda diňe geregim,
Makullaýar muny şahyr ýüregim,
Dirilik ynsana Hakyň peşgeşi.

Gynanman, "Ýaşaýşyň düýni men"diýip,
Kelle döwmäň, "Eýýäm daýy men" diýip,
Şeýle bir begenýän, "Diri men" diýip,
Dirilik ynsana Hakyň peşgeşi.

Sôÿÿán sary gülleri

Hyýallam gujagma gysylyp otyr,
Ýapraklar baglardan asylyp otyr,
Görsene, kän güller açylyp otyr,
Şonda-da söýýän men sary gülleri.

Geler, "Giden gelmez" diýip oýlama!
Bolmaz bizde telek işi oňlama,
Olar hakda ýazyp ençe oýlanma,
Nämüçindir söýýän sary gülleri.

El galdyryp bolmaz, dyzy epmezden,
Hasyla garaşma, ony ekmezden,
Aýralyk hakynda pikir etmezden,
Söýýärin men, söýýän, sary gülleri.

Daglara meňzetdim ýaryň syratyn,
Uçup gitdi, kişňedip ol gyr atyn,
Ýüregime çekip olaň suratyn,
Nämüçindir söýýän, sary gülleri.

Diýip biljek, "Aňzakda-da buýamok",
Yşkyň ýok ýerinde göwün beremok,
Kim nähili güli söýýär, bilemok,
Söýýärin men, söýýän, sary gülleri.

Meni saňa bolan yşkym ýaşadýar

Men belki-de bir wagt çöküp giderdim,
Dert baryny çekip-çekip giderdim,
Dünýäňdenem birçak çykyp giderdim,
Meni saňa bolan yşkym ýaşadýar.

Men bir uçup ýören bilbil saýylam,
Ýöne yşka duşan çagym säginem,
Eý, gözleri ýanyp duran saýylym!
Meni saňa bolan yşkym ýaşadýar.

Bagtyn diläp ýörmüşem men dirileň,
Yşkyň bar ýerinde ölmen - direlem,
Saralyp gidenem bolsa didelem,
Meni saňa bolan yşkym ýaşadýar.

Porhan boldy gam üstüme dökülip,
Onki süňňüm barýar barha sökülip,
Ýaş dökenem bolsam bu gün ökünip,
Meni saňa bolan yşkym ýaşadýar.

Begenjimden gözýaş döksem paýradyp,
Duýgularym goýbär meni saýradyp,
Zeminiň ýüzünde tug deý parladyp,
Meni saňa bolan yşkym ýaşadýar.

Elbetde, bolasym gelenok gülki,
Duýguçyl bolýa-da, wah, şahyr halky,
Juwanlanyp barýan ýaly men, çünki
Meni saňa bolan yşkym ýaşadýar.

Kenarda dörän goşgy

Köşeşip bilşim deý ençe ýyldan soň,
Tolkunlaram aram tapar, köşeşer.
Gider olar agşamara gol salgap,
O kenarda başga ykbal garaşar.

Şeýle ykbal ýardyr adamlara-da,
Dörär ertir ýaňaklarda ýylgyryş.
Güllärsiň sen, ölüm bilen bu ömrüň
bolsa-da arasy ýekeje garyş.

Hemem duýup bilersiň sen özüňi,
Bu owadan dünýä baky gelen deý.
Ýaşym näçe, wah, ony-da unudyp,
Näzirgäsim gelýär täze gelin deý.

Gol salgasym gelýär käbir zatlara,
Hak -oňup biljegim meniň olarsyz.
Öz agramym özüm götär ýörerin,
Diýilmese bolýa ýöne ugursyz.

Tolkunlar deý golum salgap durun men,
Giden gitsin, hökmanam däl dolanmak.
Wysala ýetirip biljek bir zat bar,
Olam diňe öz-özüňe daýanmak.

...Köşeşip bilşim deý ençe ýyldan soň,
Tolkunlaram aram tapar, köşeşer.
Özi adam bolan umytdan düşmän,
Tä gözleri umulýança göreşer.