09:27 Mowzuk

Ezraýyl alaýhyssalam ýene: «Eý, Allanyň resuly! Bize öýe girmäge rugsat barmy?» diýdi. Äşe (Allatagala ondan razy bolsun!): «Eý, Allanyň resuly! Bu çarwa araba: «Bu wagt girer ýaly wagt däldir. Çünki Resul alaýhyssalam emgenip ýatyr» diýip aýdyň» diýdi. Ezraýyl alaýhyssalam hormat-hezzet bilen ikinji gezek rugsat sorady. Resul alaýhyssalam hezreti Ezraýylyň sesini tanap: «Eý, Äşe! Bu kişi söz bilen yzyna gaýtmaz. Ol öz işini bitirmese, bu ýerden gitmez. Ol araby däldir. Ol Ezraýyldyr. Goýber girsin» diýdi. Ezraýyl alaýhyssalam öýe girdi we salam berdi. Resul alaýhyssalam: «Eý, Ezraýyl! Sen näme işe geldiň?» diýip sorady. Ezraýyl alaýhyssalam: «Allatagalanyň permany şeýledir: «Muhammediň ýanyna bar. Eger ol rugsat berse, sen onuň janyny al. Eger rugsat bermese, onda sen yzyňa gaýt» diýip aýtdy. Resul alaýhyssalam: «Eý, Ezraýyl! Sen meniň janymy bu gün almasaň, soň bir gün alarmyň?» diýip sorady. Ol: «Hawa, alaryn» diýdi. Resul alaýhyssalam: «Onda sen öz işiňi bitirmäge giriş» diýdi. Ezraýyl alaýhyssalam onuň janyny almaga girişdi. Resul alaýhyssalam sagdan sola, soldan saga togalanyp başlady. Onuň mübärek agzasy güýçsüz boldy. Gül ýüzi saraldy we şeker dek dili sözlemän galdy. Görkli ýaňaklaryndan ýaşlar damyp başlady we dilini gymyldadyp: «Eý, ýumşak ýerde ýatmadyk, ýüpek don geýmedik we doýup bugdaý ununy iýmedik adam!» diýip samrady. Resul alaýhyssalam Hudaýtagala: «Eý, Taňrym! Meni dünýäden gönülik (iman) bilen çykar, topraga gönülik bilen giriz we kyýamat güni toprakdan gönülik bilen turuz» diýip arz etdi. Adamlaryň hemmesi onuň degresinde ýyglaşýardylar. Hasan we Hüseýin (Allatagala ol ikisinden razy bolsun!) ýalaň baş bolup eňreşýärdiler. Patma (Allatagala ondan razy bolsun!) ýyglap: «Eý, ýumşak düşekde ýatmadyk, ýüpek don geýmedik we bugdaý çöregini doýup iýmedik atam!» diýdi. Öýüň muňuşyndan (burçundan) bir: «Resulallanyň aýralygyna nähili çydap bolar?» diýip owaz geldi. Resul alaýhyssalam her sagatda elini suwa degrip, elini göwsüne goýup: «Eý, Taňrym! Sen bu gün maňa ölüm ajygyny ýeňil et» diýýärdi. Onuň jany kükregine ýetdi. Pygamber alaýhyssalam: «Eý, Ezraýyl! Bir salym saklan. Maňa jan bermekligi ýeňil et!» diýdi. Resul alaýhyssalam ýene: «Eý, Ezraýyl! Bu günden kyýamata çenli meniň ummatyma jan bermeklik gatylygy bar bolsa, ol gatylygy maňa ýükle. Ol gatylyklar maňa bolsun, ummatyma bolmasyn» diýdi. Ezraýyl alaýhyssalam: «Eý, Allanyň resuly! Seniň ýassygyňda oturanymdan bäri Allatagaladan maňa: «Eý, Ezraýyl! Sen meniň dostum Muhammede ýumşaklyk et. Onuň janyny ýuwaşlyk bilen al. Onuň janyny beýlekileriň janyny alşyň ýaly alma» diýip, ýetmiş gezek perman geldi» diýdi. Şol wagt bibi Äşe ýyglap, Resul alaýhyssalama ýapyşdy we «Eý, Allanyň resuly! Sen näme üçin olar bilen sözleşýärsiň, bir zaman meniň bilen hem sözleş. Men ýedi ýaşymda saňa ulaşdym. Indi ýigrimi ýaşyma ýetmänkäm seniň mübärek jemalyňdan aýrylýaryn. Eý, eziz janym, seniň aýralygyň ajysy hemme aýallaryňa garanda meniň üçin has artykdyr. Galanlaryň etegi köýer. Meniň tenim hem janym köýer» diýdi. Şol halda Patma (Allatagala ondan razy bolsun!) Resul alaýhyssalamyň ýüzüne bakyp: «Eý, adamlaryň guwanjy! Eý, Allatagalany söýýänleriň söýünji! Eý, muştaklaryň ynanjy! Eý, ummatyň ynanjy! Eý, asylaryň (günälileriň) daýanjy! Eý, adamlaryň döwleti! Eý, älemdäkileriň rehmeti! Eý, Hakyň ýagşy gören dosty! Eý, halkyň şepagatçysy! Men mähraby we münberi sensiz nähili göreýin?» diýdi. Hezreti Aly ony aglamakdan saklap köşeşdirýärdi. Resul alaýhyssalam: «Eý, Aly! Sen ony saklama! Meniň ýaly atanyň aýralygynda ýyglasynlar. Atalar ýassygyna gyzlaryň agysy ýagşy rehmet bolar» diýdi. Ol halda hemme sahabalardan agy, perýat we zarlyk gopdy. Resul alaýhyssalamyň jany bogazyna geldi, ol gözüni açyp: «Eý, Ezraýyl! Bir zaman sabyr et. Meniň doganym Jebraýyl gelsin. Men ýene bir gezek onuň didaryny göreýin» diýdi. Jebraýyl alaýhyssalam ýetmiş müň mukarrap (Allatagalanyň ýakyn) perişdeleri bilen geldi. Resul alaýhyssalam: «Eý, garyndaşym Jebraýyl! Sen niredesiň? Garyndaşlar munuň ýaly günde bir-birine gerek bolar» diýdi. Jebraýyl alaýhyssalam: «Eý, älem-jahanyň guwanjy! Men ýedi asmanyň perişdeleri bilen hormat-tagzym edip saňa garaşyp durun. Resul alaýhyssalam: «Eý, Jebraýyl! Sen maňa näme futuh (muzd) getirdiň?» diýdi. Jebraýyl alaýhyssalam: «Eý, Muhammet! Gökleriň we uçmahyň gapylary açyldy. Hüýrler ýüzlerinden nikaplaryny aýryp, ellerine nurdan tabaklar alyp: «Seniň gutly janyňa tomaşa edeli» diýip, ýokaryňda durlar» diýdi. Pygamber alaýhyssalam: «Eý, doganym Jebraýyl! Men senden muny soramaýaryn. Menden soň meniň ejiz ýazykly ummatym bilen Allatagala näme iş eder? Men senden şony soraýaryn» diýdi. Jebraýyl alaýhyssalam Taňrynyň dergähine gitdi we bir sagatdan soň ýene gaýdyp geldi we: «Eý, mülkleriň patyşasynyň (Allatagalanyň) seýidi! Allatagala saňa tagzym bilen: «Eý, meniň dostum! Sen köňlüňi ummatdan faryg tut (rahatlandyr). Men seniň ummatyň erin tebretmegi bilen, Musanyň taýagy bilen Pyrgauna eden keramaty ýaly iş ederin. Musa taýagyny ýere taşlamak bilen küpürligi (Taňra ynanmazlygy), jadyny we bozuklygy ýok etdi. Bu gün erniňi tebretmegiň bilen seniň hemme asy (günäkär) ummatyň depderlerindäki günälerini gufran (ýalkaw) suwy bilen ýuwup bozaryn. Biz ol gün Musanyň enesine: «Musany derýa taşla. Sen mundan gorkma we ony gaýgy etme. Biz ony saňa ýene gaýtaryp bereris. Biz ony pygamber ederis», ýagny «Sen ony maňa çaga wagtynda tabşyr, men saňa ony pygamber edip gaýtaraýyn» diýip aýtdyk. Sen bu gün bir owuç toprak ýaly günäli ummaty bize isbarla (tabşyr), ertir (kyýamat güni) biz olaryň hemmesiniň günäsini geçip, päkläp saňa bereli» diýip aýdýar» diýip aýtdy. Äşe (Allatagala ondan razy bolsun!) şeýle aýdypdyr: «Resul alaýhyssalam dilden-agyzdan galdy. Men baksam, onuň agzynda dili tebrenýär. Onsoň men gulak tutup diňledim. Ol: «Namazy taşlamaň we golastyňyzdakylary ýagşy tutuň» diýip samraýan eken». Şu sözler onuň ahyrky wesýeti bolupdy. Ol dünýäden ötdi. Oňa kyrk ýaşynda wahy (Allatagaladan gizlin habar) geldi. Ol altmyş üç ýaşynda, rabygylowwal aýynyň on üçünde Başgüni öldi. 66 Ony Sogapgüni topraga duwladylar. Aýat: «Biziň hemmämiz Allatagalanyň mülküne degişlidiris we biz oňa dolanyp bararys». Maksat. Allatagala Muhammet alaýhyssalama bolan dostlugy üçin älem-jahany ýaratdy. Bu söze şu hadys delildir: «Eger sen bolmadyk bolsaň, men älem-jahany ýaratmazdym». Bu aýat hem şol mazmuny tassyklaýar: «Biz seni älemjahandakylara rehmet üçin iberdik». Ol Taňrynyň dosty, ýazykly iliň tebibi, Arşa ilkinji bolup aýak basan, Köwser onuň ýoly, Ryzwan (Jennetiň patyşasy) onuň gapy garawuly, Jebraýyl alaýhyssalam onuň habarçysy, mukarraplar (Allatagalanyň ýakyn perişdeleri) onuň hyzmatkärleri, köp gudratlary görkezen, sekiz uçmahyň hojalary-onuň iki gaýyny Abu Bekr we Omar, yslamyň beýikleri onuň iki giýewsi Osman we Haýdar. Ine, şunuň ýaly beýik mertebeli kişä ötegçi dünýä wepa bermedi. Onuň bilen ýaraşmady. Onsoň, ol seniň bilen ýaraşarmy? Sen bu dünýäden köňlüňi üz we ahyret işine yhlasly ulaş. Ötegçi dünýäden geç. Uçmaha tarap uç, päk hüýrleri guç, Köwser şerbetini iç we uçmah Byragyny mün.