10:37 Mowzuk

BARY-ÝOGY BIR ÖMÜR»
Men halypa şahyr Atamyrat Atabaýew hakdaky makalama onuň kyrk ýaşlarynda çapdan çykan bir kitabynyň adyny ýörite sözbaşy goýdum. «Bary-ýogy bir ömür». Juda jüpüne düşen jümle! Her bir adama ýeke ýola ömür berilýär. Ýeke ýola berlen ömründe şahyr Atamyrat Atabaýew millionlarça ýyl ýaşan adamzadyň taryhyny, müňlerçe akyldarlaryň döredijilik mirasyny, döwrüniň, döwürdeş şahyrlarynyň ýazan tom-tom şygyrlaryny okap, ury-ury gor edinmegiň, müňlerçe diwan waraklap, geçmişden galan gyzyldan-gymmat şygryýet dünýäsini öwrenmegiň, gijesi-gündizi şygyr ýazyp, zamanamyzyň uly şahyry bolmagyň hötdesinden geldi.
Şahyr Atamyrat Atabaýew, şahyr hem terjimeçi Kakabaý Gurbanmyradow, şahyr, ýazyjy Agageldi Allanazarow dagymyz bir döwürräkde okadyk, paýtagtyň günortasyndaky belent baýyrlykda wagtlaýyn jaý salyp, ençe ýyl duldegşir goňşy bolup ýaşadyk. Öýümiz külberägem bolsa, seleň baýyrlykda ýerleşýärdi, daş-töweregimiz giden bagzarlykdy. Käte-käte birimiziň öýümizde üýşüp, iýip-içip, uly edebiýatyň gürrüňini ederdik, goşgy okaşardyk, her kim öz okan gowy kitabyny birek-birege okamagy ündärdi. Üstesine, biz neşirýatda bile işlärdik, garasaý, biziň gyzykly ýaşaýşymyz başga bir planetada — şygryýet, edebiýat planetasynda geçdi. Atly ýazyjy-şahyrlar Gurbannazar Ezizow, Italmaz Nuryýew, Hudaýberdi Diwangulyýew, Hojanepes Meläýew, Orazguly Annaýew, Atajan Annaberdiýew, Annaberdi Agabaýew, Italmaz Akmyradow, Ahmet Gurbannepesow, Amannazar Aşyrow, Ata Akbäbäýew, alymlar Muhammetguly Amansähedow, Ahmet Mämmedow dagy myhmançylyga gelerdi. Olar bilen bile oturmak, söhbet etmek, goşgy okaşmak biziň üçin bagtdy. Ondan bäri tas elli ýyl geçipdir, emma ömrümiziň şol döwri şindem geçmişimizden bize albaý bulaýar.
Şahyryň ury-ury gory bar, emma şoňa garamazdan, ol şindizem dünýäedebiýatyny, dünýä şahyrlarynyň goşgularyny okamak bilen çäklenmän, döwürdeşleriniň, şu günki ýaşlaryň şygyrlaryna çenli okaýar, sebäbi ol okamaýanadamyňdöwürbilen,dünýäbilendeňdeşpikirlenipbilmeýändigine düşünýär. Atamyradyň «Uçup gitdi Horasanyň durnasy», «Men seni söýäýdim-söýäýdim öýdýän», «Ýazlar gerekdir maňa», «Watan hakda oda», «Kerwen», «Gumsagat», «Ýok meniň», «Doga-dileg» ýaly goşgularyny owsunjaň, päkize ter duýgular, ýüregiň üstünden ýel öwüsdirýän aforizmler, uçgunlary çabrap duran jümleler bezeýär. Baky dünýä, pynhan syrly dünýä, owadan ýaşaýşa söýgüsi şahyr A.Atabaýewiň döredijiliginiň leýtmotiwi — ruhy akymy bolup, okyjyny özüne benduwan edýär. Onuň dürli döwürlerde ýazan goşgularynda öz ykbaly bar, şahyr Atabaýewiň bütin ömrüne döreden beýik ykbaly, şahyr ykbaly bar.
Dürli döwürlerde şahyr Atamyrat Atabaýewiň döredijiligi barada beýik ýazyjy-şahyrlar Kerim Gurbannepesow, Berdinazar Hudaýnazarow, Ata Atajanow, Gurbandurdy Gurbansähedow, Gurbannazar Ezizow, Allaberdi Haýydow, Italmaz Nuryýew, tankytçylar, edebiýaty öwrenijiler Saýlaw Myradow, Allamyrat Garaýew, Ahmet Bekmyradow, filologiýa ylymlarynyň doktory Muhammetguly Amansähedow, Ahmet Mämmedow, Amannepes Şyhnepesow dagy ululy-kiçili makalalar ýazyp, mynasyp baha berdiler. Geçen ýüzýyllykda beýik şahyrlar K.Gurbannepesow, G.Ezizow Atamyrat Atabaýewe ýazyjylar birleşigine agzalyga geçmäge teklip hatyny ýazdylar.
Atamyradyň hiç bir şahyryňka meňzemeýän öz stili, galam ýöredişi, beýan edişi bar, şygyrlarynda milli öwüşgin ummasyz güýçli. Onuň goşgulary ýeňil okalýar, dessine ýadyňda galýar. Ýarym asyr bäri şygryýetiň muşdaklary Atamyradyň pikirden, pähim-parasatdan, owsunjy duýgulardan bina bolan goşgularyny okaýarlar, ýatdan bilýärler, internetde öz pikirlerini aýdyp jedelleşýärler. Ýüregiň üstünden ýel öwüsdirýän, endamyňy dygladýan meşhur şygyrlarynyň ýazgylaryny telefonlarynda göterýärler. Atamyradyň terjime eden şygyrlaryny jemleseň, birnäçe tom bolar. Şahyr Tirkeş Sadykow uniwersitetde Atamyrat bilen bile okapdyr. Ol Atamyrat hakynda ýazan makalasynda şeýle mysaly getirýär:
«Atamyrat Atabaýew bilen uniwersitetde okap ýörkäk, ol bize — ýaş şahyrlara, talyplara: «Men kyrk ýaşymda Türkmenistanyň Ýazyjylar birleşigine başlyk bolaryn» diýýärdi. Diýseň erjel, maksada okgunly şahyr A.Atabaýew talypka aýdan sözleriniň yzynda durdy».
Ol kyrk ýaşyna ýetmänkä Türkmenistanyň Ýazyjylar birleşigine başlyk bolup, 10-12 ýyl işledi.
Türkmenistanyň halk ýazyjysy Atamyrat Atabaýew, türkmen edebiýatyny ösdürmäge goşan önjeýli goşandy göz öňüne tutulyp, «Galkynyş», «Bitaraplyk» ordenleri, «Gaýrat», «Watana bolan söýgüsi üçin», «Türkmenistanyň Garaşsyzlygynyň 20 ýyllygyna» ýubileý medallary bilen sylaglandy, Türkmenistanyň Prezidentiniň «Türkmeniň Altyn asyry» atly bäsleşiginiň ýeňijisi boldy.
Halypa şahyr Atamyrat Atabaýew ýetmiş ýaşy arka atdy, emma şoňa garamazdan, ol şindizem ajap goşgulary döredýär, ýazýar, işleýär. Galamyň ýiti, pikiriň algyr, ýollaryň rowaç bolsun, Atamyrat!