Assalamu aleýke ýa Rasulallah, Assalamu aleýke ýa Habiballah, Assalamu aleýke ýa Nebiýullah.

Bu hatymy, alamatlary bir eýýäm çykyp başlan ahyr zaman diýlip adlandyrylan, yman bilen ýaşamagyň kyn bolan, ganlaryň serap bolup akan, söýginiň ýat bolan, uryşlaryň adaty bolan, Gurhanyň garyp bolan, ynsanyň bagtsyz bolan, ümmetiniň matam günlerinden ýazýan. Özümi saňa hat ýazmaga mynasyp hem görmedim, seni döwrümizdäki bu gynançly ýagdaýymyz bilen gynandyrmak hem islemedim. Ýöne men ýaly bir gedaý üçin sultana bir hat ýazmak, iň uly bagtdyr. Aslynda bu hatymda saňa şu garyp döwrümizdäki doganlaryňy habar berip, azajyk bolsun seni begendirmekdi niýetim. Aslynda bolsa bulam meniň nadanlygym, seni dogry tanap bilmeýändigim sebäpli sarp edilen ýalňyş sözler. Seni däl belki saňa ýüzlenip hat ýazmak bilen özümi begendirýän, adyňy ýatlamak bilen ömrümiň şu kiçijek böleginde aýdyň bir nyşan, kiçijek bir bellik goýmak, we ahyretde ýanyňa bu ýatlamalar bilen çykmak niýeti.

Bir gezek mezarlaryň başynda oturyp aglapdyň, dostlaryň näme üçin aglanyňy soranlarynda, “doganlarymy göresim gelýär” diýp jogap beripdiň. Dostlaryň bolsa haýranlyk bilen “doganlaryň biz däl mi eýsem?” diýdiler, “ýok siz meniň dostlarym, doganlarym bolsa soň geler, meni görmeseler hem maňa ynanarlar” diýp doganlaryňa salam ugradypdyň näçe asyr öňünden.

Şu wagt, şol görmek islän doganlaryňy görýäs, olary seniň wasp edişiň ýaly sypatlary tanadýar bize. Men üçin olar taryhdan gelen, kitaplardan dirilen gahrymanlar ýaly. Olary her görenimde ýene bir gezek Sadakte ýa Rasulallah diýýän. Men olaryň käbirlerini Ebu Bekir-e, käbirlerini Omar-a, käbirlerini Osman-a, käbirlerini hem Aly-a meňzedýän. Sen olary ýüzlerinden hem tanaýandyrsyň, perişdeler suratlaryny ýetirýändir belki. Içlerinde Musab ýaly, Abdullah ibn Jahş ýaly dünýäniň ýalan ýüzine aldanmaýanlar, Nesibe ýaly Amr ibn As ýaly mertler bar (radiýallahu anhum ejmain). Olary göreniňde adamyň içine bir rahatlyk, bir umyt dogýar. Belki bu döwürde garyplyklaryny, ýalňyzlyklaryny duýmazlyklary üçin olary nurly öýlerinde, görüp gidýändirsiň.

Bu doganlaryň ýaly saňa mynasyp bir ümmet bolup bilmesem-de, olar bilen bir şäherde bir köçede, goňşy bolup ýaşaýan men hem seniň aý ýüziňi görmäne mätäç. Şu garaňky döwrüň ýaralaryndan aglaýan wyjdanymy rahatlatmak üçin, ýalançy ýarlar bilen kirlenen ýüregimi päk söýgiň bilen doýurmak üçin, her gün müň hili ýalanlar bilen bölünýän aklymy kristal ýaly tämiz düşünjeleriň bilen arassalamak üçin, ýa Rasulallah, meniň zulmatly dünýäme aýdyň yklymyň bilen myhman bolmagyňa teşne.

Dünýä Rähmet bolup iberilen Seniň köňül dünýäňde, perişdeler, sadyklar, faruklar, zinnureýnler, haýdary kerrarlar, abidler, alymlar, halyslar,hasbileriň ýanynda men ýaly gedaýlara hem orun beriljegine umydym bilen ýazan şu gysga hatymy we salamymy kabul et ýa Rasulallah.

Seni görmäge muşdak,
ahyr zamandaky ümmetiňden bir abdullah

Çeşme: www.ertir.com
@Free

129

11

1

5

0

Mowzugy VIP edenler: