Nobatguly Rejebowyň "Serwi agajy" poemasy-ha ýadyňyzdadyr-la! Şol poemada oglan gyzy ýaşlygyndan söýýär. Söýüşýälerem. Ýöne bir zat-bir zatlar bolup, gyz oglandan ýüz öwürip, başga birine durmuşa çykýar:

Meni barmagynda aýlady ykbal,
Nirä barýan?
Neçün?
Nädersiň bilseň!
Barýan taýak degen ýaly kelläme...
Selbim, Selbim, saňa duşmajak bolsam,
Ýeri, onsoň nirä gidemde näme?!

Ýumruklarym düwýän, gözlerim ýumup,
Gazaba çydaman çatlaýar dişim.
Şumat gök ýüzünde görünsedi Aý,
Ýekeje ýumrukda görerdim işin.
(Aýda seniň keşbiň görünýär çünki).
Saçym penjeleýän, ýanýar gözýaşym,
Damarlar dartylyp ýetipdir çäge.
Şu mahal ýeterlik bir jynssyz gülki,
Bir jynssyz gykylyk—däliremäge!

Boýnuma kerep deý oraşýar şemal.
Demigýän, darygýan tütün deý tümden.
Müňde bir ýerinden ot berlen asman
Ýanyp gelýär, Inip gelýär üstümden...

Ýanyp, ýakyp gelýär ot berlen asman,
Ol meniň kalbym deý eleme-deşik.
...Men bir ýola aglap gördüm ýürekden
Hem bir ýola bilmedim men köşeşip.

Oglan ony 30-35 ýyllap gözleýär:

"Belkem, gidip...
Basyp ony bagryma
Soňky gezek çekip söýgimiň zaryn,
«Serwi agajym» diýip...
Gara bagtyma
Şol ýaşajyk oglan bolup aglaryn..."

" — Aglama, ezizim, geldim men ynha,
Men şol ýaş şahyryň,
Şol köne şeýdaň.
Ynha, gursagymda seniň söýgiňden,
Seniň gözleriňden sanjylan peýkam.

Men ýaradar gezdim ençe ýyl bäri,
Aýlandym kän ýeri sarkdyryp ganym.
Hiç bir gyz bolmady derdime däri
Hem dözmedi gözelleriň hiç biri
Şol peýkamy sogrup
almaga janym...

Bilýämiň, men sensiz bölündim ikä,
Des-deň ikä böldüm ähli zadymy:
Maňa huşum bile gam-gussa ýetdi,
Saňa berdim düýşüm bilen ýadymy.

Ýöne soňy nähili bolýar diý?! Oglan iň soňunda gyzy tapanyna gynanýar:

"Men durmuşda gaty kän zat ýitirdim,
Ýitirdim ýaşlygym—ömür ýazymy.
Ýöne seni göterdim men kalbymda
A sen welin, ýitiripsiň özüňi...
A sen, ynha, ýitiripsiň özüňi...

Maňa öýlänçi deý duşmarsyň gaýdyp.
(Şu güne çen bagtly ekenim ýansam-da.
Çünki ynanýardym, ýoluksam saňa,
Ýene-de jadylap goýbärsiň öýdüp)

Aýna deý söýgimi,
Aý deý söýgimi
Neçün kül-pagş etdiň?
Köne sowaly
Telim ýyldan soňra saňa berdim men.
Başyň egip sorag belgisi ýaly
Aglaberdiň sen..."

Asyl görüp otursa, o gyzy gözläp ýörenine degenogam eken. Seret, şu setiri okap gör gaýtadan:

"Maňa öýlänçi deý duşmarsyň gaýdyp.
(Şu güne çen bagtly ekenim ýansam-da.
Çünki ynanýardym, ýoluksam saňa
Ýene-de jadylap goýbärsiň öýdüp)"

Hawa, şeýdibem liriki gahryman magşugyny tapmadyk bolsa gowy boljak eken diýen netijä gelýäň, isleseň-islemeseň...

Bu nähili beýle boldy?
Düşemok!
Kemmagalmy?
Mydam tersine meňki.
Meni bir bakyşda otlap goýberen
Dodakdan meý beren,
Jadyly Selbi,
Pynhan syrly Selbi,
Gel, gel, şu senmi?

Ysganymda garpyz kimin burk uran,
Telim ýyl dilimde eremän duran,
Ajy ykbalyma süýjüsin beren
Hany şol göreç?
Hany şol posa?
Hany şol Selbi?
Hany gözlerdäki jadyly oduň
Eredip goýberýän täsin şöhlesi.?
Ynandym men: eger söýgi bolmasa,
Meňzeş eken zenanlaryň ählisi.

284

23

9

11

0

Mowzugy VIP edenler: