07:31 Mowzuk

Berdi Kerbabaýew. / ÝAZYJY KIM? OL NÄHILI BOLMALY?

Ýazyjynyň ýaragy galamy däl-de, dilidir. Kütek ýarag bilen nepis şkaf ýasap bolmaýşy ýaly, garyp dil bilen çeper eser ýazyp bolanok. Ýazyjynyň dili näçe ötgür, näçe baý, näçe şirin bolsa, sözlemini, bütin suratlandyrýan zadyny çeper gelniň keşdesi ýaly owadan düzýär-de, okyjynyň ýürek sandygyny açarsyz açýar. Nepis halynyň bir kwadrat metrinde milliona golaý çitim bar, şolaryň birje çitimi ýalňyş düşse, ekin arasynda gögeren ýandak ýaly, şikesi gözüňe dürtülip dur. Ýazyjy hem öz käriniň ussasy. Onuň hem her harpy halynyň bir çitimi ýaly. Eger ol sözlemi harsal düzse, ýa sözlem agzalarynyň birini öz ýerinde ulanmasa, ýa diliniň baýlygy ýetmese, ýa asyl sözlem düzmegi başarmasa, onuň eseri okyjynyň görejini çaşyrýar-da, pikirini şüdügär ýerde ýörän ýaly büdredýär...
Zehini, ukyby birsyhly ösdürmek, dili dynuwsyz syntgylamak, olary özüňe hemişelik wepaly dost edinmek, umuman ýazyjylyk borjuňy ödemek üçin, döredijilik üstünde üznüksiz, ýadawsyz zähmet çekmek zerur. Ekmeseň gögermeýşi, bejermeseň hasyl bermeýşi ýaly, oturmasaň, başyňy agyrtmasaň, ylham gelenok. Umuman, ylham diýilýän arzuw guşy ýaly bir zat bolup, sen indemeseň, ol seniň ýanyňa gelenok, ýönekeý dil ujy bilen çakylygyňa-da gulak asanok, ol saňa diňe gözüniň ýakymly gytagyny aýlaýar-da, kim özüne wepaly bolsa, şonuň goýnuna baryp girýär. Emma sen özüňe erk edip, döredijilik üstünde basa oturaňda, höwürtgesine dolanan guş ýaly, onuň özi gelip, seniň başyňa gonýar, diňe şonda ol seniň beýniňi özüniň ylhamly çeşmesi bilen suwarýar.
Ýazyjy kitaby özi üçin hem, öz garyndaşlary üçin hem, öz kabinetindäki kitap polkasyny golýazmasy bilen bezemek üçin hem, dostuna peşgeş bermek üçin hem ýa diňe bir at galdyrmak üçin hem ýazanok. Çeper sözüň eýesi öz kitabynyň üsti bilen halka özüniň ömür tejribesini, öz düşünjesini, pikirini hem duýgusyny hödürleýär. Ýazyjy ýönekeý howaýy zat barada gürrüň açman, özüniň hakyky ynanjyna görä öz okyjylaryna örän ähmiýetli hem derwaýys zat hakynda gürrüň berýär. Ol okyja şeýle diýýär: “Gadyrly dost, ynha, seret, durmuşda, gör, nähili zatlar bar, şolar saňa-da degişli, sen şol barada oýlan, sen ony öz duýgy tereziň bilen ölçäp gör, goý, ol seniň işiňe, döredijiligiňe, söýgiňe, bütin islegiňe kömek etsin, ähli halk bilen bile belent maksada ýetmek üçin goltugyňdan söýget bersin...
Hakyky ýazyjy belent maksat ugrunda okyjy bilen ýüzbe-ýüz, ýürekdeş, göwündeş sözleşmek üçin zähmet çekýär. Şeýle ýazyja mugallym hem terbiýeçi diýmek mümkin...