Depe
Bu haraba undulan bir dünýädi,
Çar künjünde sowuk şemal iňleýär.
Düz ýaýlada gümmez ýaly ýatyşy,
Naýynjar, hamyla enä meňzeýär.
Beýle hasap dokuz aýda dolmaýar,
Sowup otyr bu ýyllary deňinden.
Solundan Gün dogdy gussasy bilen,
Gussa bilen kän Gün ýaşdy sagyndan.
Depä döndi ýuwaş-ýuwaş ýumralyp,
Açylmadyk näçe syrlar galandyr.
Muny ejem, kakam, ýene men bilýän…
Depe — meniň dogulmadyk agamdyr.
***
Giç düşündim şol gözleriň syryna,
Düşünmedik bolsam bolardy gowy.
Ýadymdan çykanok Ýagmyr daýymlaň,
Köne jaýyndaky gelinalyjy toýy.
Gör, niçiksi mekirligni ykbalyň,
Jäjegni üstüme seçip aldady.
Gözi çygly kän ahyry toý bolsa,
Eje, neçün sen üýtgeşik agladyň?!
Süýji-kemput.., çöpläp bilen zadymy
Torbaňa atamda sypap başymy,
Ýumrugyňda berk gysanyň ýadymda,
Atgulakdan gizläp alan aşygňy.
...Şol aşygy sarap alaja bilen,
Niçe ýyllar asyp goýduk gapyda.
Maňa şonda syrly bolan bu yrym,
Garaşylan oglan jigiň hakydy.
***
Myhman boldum dostum şo gün,
Giňden ýazan saçagyňa.
Syn etmändiň sen şol mahal,
Bar keýpimiň gaçanyna.
Çyn ýürekden hödür etdiň,
Ýöne ötükden ötmändi.
Şunça zadyň arasyndan,
Maňa birje zat ýetmändi.
«Toýdur bu gün, dost jan bize,
Seň üçin bary...» diýýärkäň.
Meni gysyp gowran sowal,
«Ejem şu wagt näm iýýäkä?!»
Çekip tomsuň jöwzasyny,
Geçirdi aňzagny gyşyň.
Göz öňüme geldi diňe,
Şu saçakdan tamşanyşy.
Dört diwar içre bir özüm,
Darykdym, hopukdum, eje.
Men şonda öz göz ýaşymy,
Dostdanam bukupdym, eje.
***
Saçlaryň agaryp ýetişmändirem,
Köne suratlarda galypdyr keşbiň.
Juda ir gidipsiň, gidipsiň juwan,
Atama galdyryp maşgalaň keşgin.
Ejem şeý diýýärdi: «Gaýnenem bolsa,
Aljyramda degerdi-le gözüme...»
Alty gyzyň birjesinem bir gezek,
Nesip etmändir-dä sylmak ýüzüňe.
Heniz çagajykdym, çagadym entek,
Joralarym: «Ene!» diýse owsunyp,
Aglardym tamarkaň burçuna geçip,
Enesiz öýmüzden juda kemsinip.
Jigimiň birine dakdyk adyňy,
«Ejem» diýip ýüzlenýärler ogullaň.
Ýok, bize pylanyň gyzy diýlenok,
Agtyklary diýýändirler Ogullaň!
***
Bu öýde seniň ysyň bar,
Gursagyma sorsam, ene.
Şazadaň öýlenşin aýdyp,
Gel, ýüregmi gorsa, ene.
Saçlarym togar-togardy,
Kä örüp, käte bogardyň.
Ýyllar bar zady sowurdy,
Dat edersiň görseň, ene.
Senden uzakda, alysda,
Men aşyk boldum arassa.
Içime urandyr gussa,
Ýürejigmi dörseň, ene.
Her aşyk söýmeýän eken,
Duýgular ölmeýän eken.
Nämeler bolmaýan eken,
Munda ýaşap ýörseň, ene.
Sered-ä pelek işini,
Gaýtaladym ýalňyşymy,
Gizläp döken göz ýaşyňy,
Gel, agyma garsaň, ene!

Degişme.
Bir agşam hemmäniň göwni çag wagty,
Kaka, sen nämäniň gamyny iýdiň?
Oýna salyp: «Durmuş ýolna gyzlarmy
Atarar-da, ynha, baýaryn» diýdiň.

Kesdiň soňam ýeke-ýeke nyrhlaryn:
«Sen-ä, gyzym, diňe atla bererin,
Seňem bahaň kyrk horjunlyk dür bolar…»
Ölçeýärdiň her çagaň nä degerin.

Aň ýeterden juda ýaşdym o günler,
Çaý içsem bes, öz paýyma düşenden.
Ilkinji gelnaljy ugranda bizden,
Kaka, saňa çynym bilen düşündim.

…Atlaram ýok, dürlerem ýok, şonda-da
Seň dürüňi apardylar öýüňden.
Gelen galyň dolap gyzyň daşyny,
Saňa diňe bergi galdy toýuňdan.

EJEM EKEN

Etmişim kän, ötmüşem sen, çagalygmyñ ýeñlesligni,
Öwredipdiñ has kiçikäm gyz görküniñ agraslygny,
On ýyl geýdiñ bir geýeniñ, maña tikdiñ köýnekligñi,
Joralarma güjeñlärdim, şonda aklym çatman eken,
Bir gülenmi dünýä deñän, görüp dursam, ejem eken.

Ýyllar göçýär, geçip barýar, başyñdaky çagalygam,
Köpelýändir durmuş hakda saña berýän soragymam,
Günler geçdi soñ ýat boldy şol çägeli Garagumam,
Talyp boldum, men özüme diýipdim-le «Bagty çeken»,
Ah, bu bagty gije-gündiz Hakdan dilän ejem eken.

Gara saçlañ aklygyna, düşünmedim ilki bada,
Jograndy-da ýürek şonda, atygsady, düşdi oda,
Bu dünýäde günäkär men bolan bolsam haýsy zada,
Maña goýman ýazygymy, bagry bilen süzüp çeken,
Indi bilýän, ejem eken.

Men özümi ýalñyz duýdym şu märekäñ arasynda,
Ne alamat, bu duýgulam, sakla özüñ goragyñda,
Özüme zor salyp gelýän, ýyly mähriñ ideginde,
Jandan geçip söýjek barmy, tapylarmy dyza çöken?
Bagra basdy bir tanyş el, ol ýene meñ ejem eken.

Söýen ýigdim, goýup gitdiñ, ýat bolduk biz bir-birege,
Men ýüregñe ýol salsamam, gapy tapmadym girere,
Alynmadyk myhman ýaly, duýgym tazykdy bir ýere,
Meñ seni söýşimden beter, menem biri söýýän eken,
Şol ynsanam ejem eken.

Gyssanyber, däli köñlüm, wagtyñ şol bolşy, tizlänok,
«Ah, bu durmuş ejeñ däl-dä», ejizleseñ, ezizlänok,
Hemme kişi bagt isleýär, güzaby ýok, azaby ýok,
Köp aýdardyñ, diñlemezdim, soñam boldum, derde çöken,
Awunybam arzyñ aýtsañ, ejeñ seni diñlär eken.

Ýeñil işe tiz ýapyşdym, kynlaryny soña goýdym,
Şänik ÿaryp, mañzyn iýdim, gabygyny saña goýdym,
Çaýlamaga jorañ gelse, sen ýene-de gyzyñ öwdiñ,
Gör-ä durmuş niçiksi zat, ýörãn ýoluñ hile-gapan,
Ýagşyñ ýaýyp, aýbyñ ýapjak, ilki bilen ejeñ eken.

Ogulnur ATAÝEWA.

181

26

7

16

0

Mowzugy VIP edenler: