Seniň aýdymyň

Söýgi bilen dolumydy kükregiň
Ýa-da özüň durşuň bilen söýgümi
Ygşyldadyp gülälekleň ýapragyn
Durmuş berdi maňa seniň aýdymyň.

Hasrat bilen dolumydy gözleriň
Ýa-da özüň doňup galan gaýgymyň?
Ygtyýarym elden alyp sözleriň
Meni derde goýdy seniň aýdymyň.

Ýa şatlyga ýugruldymy ýüregiň
Ýa baharlar joşup akýan derýamyň?
Seni diňläp hem söýgüden, hem gandan
Hem şatlykdan doldy meniň çar ýanym.

Göý, ýaşsyn aýdym!-Seniň aýdymyň
Ömrüm boýy, gel, çalaýyn sazy men
Diňe seniň aýdymlaryň özi üçin
Bu dünýäden müň bir gezek razy men.



Aýdylmadyk sözler


Seniň ýok wagtyňda seni taryplap
Gijeler ýatmadym goşgular goşdum
Sen maňa mydama bolsaňam ýakyn
Seniň yanyňdakam sen maňa daşdyň

Zöhre ýyldyzy dek alysdyň menden
Mawy gözýetimden salardyň ýerden
Yzrlap,yzarlap, barsamam, ýene
Güýçlenerdi derdim
Gowşardy erkim

Ýygralyk boldumy, ýaşlyk boldumy
Sadalyk boldumy...bir zada boldy
Ýyllar boýy ýüregimde ýer eden,
Aýdylmaly sözler aýdylman galdy

Aýdylmadyk sözler bilen ulalyp,
Aýdylmadyk sözler bilen söýdüm men
Ahyr olar böwsüp çykdy ýüregmi
Ýasadym olardan ajap aýdym men

Ol aýdymy diňläp görseň her haçan
Bagt dumany gaplap alar seriňi.
Aýdylmadyk sözler aýdarlar saňa
Bir ýürek däl, ýüz ýüregiň syryny

Söýmeseň-de alabahar gary dek,
Pagyş-para eräp, dişlärsiň barmak
Meniň üçin ajaýyp bir ýeňişdir.
Daş dek bir ýüregiň ereýşin görmek.


Şol gözele duşanymda şu gezek:
- Sözüm diňle – diýdim.
- Sözlegin – diýdi.
Diýdim: – Gülüm, beýle örteme uzak.
-Gülüňi daşrakdan gözlegin – diýdi. Diýdim: - Sen görküsiň ähli gülleriň.
-Sen nämeler diýýäň, goý, oglan – diýdi.
Diýdim: - Sagym sagýan akja gollaryň…
-Diýjegiňi açygrak diý, oglan – diýdi.
-Sen meni söýermiň, perizat – diýdim.
Gyz ýaýkap başyny: - Söýmerin – diýdi.
Bu ýöne bir söýgi däl, bu bir ot – diýdim,
Gyz çytyp gaşyny – Köýmerin – diýdi.

Diýdim: - Ýürek joşýar misli bir derýa,
Gyz oýnap saçyny: - Ýüzmerin – diýdi.
Diýdim: - Bar umydym inçelip barýa,
Gyz dişläp dilini:
-Üzmerin – diýdi.



Göwnüm seni küýseýär


Käte ýalňyzlykda otursam özüm,
Käte gaharlanyp, çytylsa ýüzüm,
Käte ukym gelip, ýumulsa gözüm,
Teşne ýürek jemalyňa suwsaýar,
Gara gözlim, göwnüm seni küýseýär.

Gäreşlerde gujur bilen baglansam,
Üýşmeleňde alkyş bilen ýatlansam,
Arzuwlarym göge galyp şatlansam,
Ýa-da hasrat ýürek-bagrym gyýsa, ýar!
Gara gözlim, göwnüm seni küýseýär.

Bahar geler, güller bilen şaýlanyp,
Seýran etsek baýyrlary aýlanyp,
Akja bulut «Ýagsammy» diýip oýlanyp,
Çagba gelip suw –sil edip guýsa, ýar,
Gara gözlim, göwnüm seni küýseýär.

Meýdana ýazylypdyr bahar halysy,
Gel, bile keşt etsek ýakyn-alysy,
Maňa at goýdular: «Yşkyň dälisi».
Men nädeýin ýürek şeýle söýse, ýar!
Gara gözlim, göwnüm seni küýseýär.



Degişme


Taryplap bir gyzyň ap-ak ýüzüni,
-Aý aýdyň agşamlaň aýy-diýdiler.
-Göwnüň göge galar, görseň gözüni,
Gaşy Göroglynyň ýaýy-diýdiler.

-goýny baharmyşyn, güller açýarmyş,
gepe çepermişin, dürler seçýärmiş,
kirpigi ýürekden parran geçýärmiş,
boýuna mynasyp buýny-diýdiler.

-Erk edip ýanyna barardym-diýsem,
-Aý dek jemalyny görerdim-diýsem,
-Mežnun dek ugrunda ýörerdim-disem,
-Ol hem Leýli gyzyň taýy-diýdiler.

-Gül açan bagynyň nary bar eken,
Ak altyn öndürýän käni bär eken,
Şahyr Halyl atly ýary bar eken,
Şu gün şol gözeliň toýy-diýdiler.



Hat


<<Hat gelmedi>> diýip çekmegin gussa,
Gaýtam garaş öňküdenem on esse.
Mendirin- şol alabahar günleri
Agaçlar pyntyklap,
Şemal öwüsse.

Oglanlaň köpüsi barandyr gaýdyp,
Sorasaň, salamym bererler aýdyp,
Bardyryn men,
Ýaşap ýörün sag-aman
Göwnüňe getirme ýokduryn öýdüp.

Ýalňyz günüň sora ýalňyzlygyňdan,
Gamgyn günüň sora gamgynlygyňdan,
Güneşden, ýeňişden , aýdymdan sora,
Olar saňa habar ýetirer menden...

Ýene- de nämeler aýtsamkam saňa,
Şeýle bir gürrüň kän aýdyp-diýere,
...Gije ornun berip gyrawly daňa,
Ýene bahar geldi biziň bu ýere.

Yranyşyp berýozlaň şahasy,
Aýdyma başlardy telleri bilen,
Örtüldi üstümiz al-elwan bolup,
Eneleň getiren gülleri bilen.

Boýny galstukly sakçylar gelýär,
Gülleň terligini saklamak üçin.
Ter gülleri-ter dünýäni syn edip,
Aýlanyp ýörüs biz älemiň üçin.

Gursagy nygma\tly pasyllar
Gelýär,
Ilkinji sowgadyn bagryna basyp,
Ine, şeýdip ýaşap ýörüs müdimi,
Dünýäniň sesine biz gulak asyp.

Bilýän hat gelmesi kesildi diýip,
Gijeler, gündizler garaşansyň sen,

Berjaý edip ýörkäm soňky
buýrugy...
bu haty ýazmaga ýetişmedim men



Ýürek hem orak hakynda


Bagda sataşamda ýüpekçi gyza:
-tut kesiş… - diýip, haýyşt etdi näz
bilen.
Kalbymy dönderip gül açan ýaza,
Köýdürdi gyma gaş, güler ýüz bilen.

Gara gözler mende şatlyk döredip,
Ygtyýarsyz aldym onuň oragny.
Gyz hem mähir bilen ogryn seredip,
Synamdan sogurdy joşan ýüregmi.

Ir bilen seýil edip bu gözel baga,
Misli tapan ýala bir geregimi,
Şaha kesýän ýönekeý bir oraga,
Men şelyşdym men öz ýüregmi



ALYSLARDA GALAN ÝAR



Ýalňyz bolsaň ýetişerin ýanyňa,
Seni ýeke goýman – diýen sözüň bar.
Ýatlamalaň dumanyndan çykda gel,
Alyslardan alyslarda galaan ýar.

Söýgiň bilen derýa bolup joş-da gel,
Öňkiň ýaly gyz juwanlyk ýaşda gel,
Gaýalardan gaýalara aşda gel,
Goja daglaň aňyrsynda galan ýar.

Tapyşýan ýerinde ýer bilen gögüň,
Her gün saňa garaşaryn intizar.
Gün doganda, gün içinden çyk-da gel,
Uzak ýollaň aňyrsynda galan ýar

Men henizem öňkim ýaly bisabyr,
Ýürek şindem öňküsi dek bikarar.
Uzak ýyllaň örtügini serp-de gel,
Uzak ýyllaň aňyrsynda galan ýar


Gündogar bulwary


Ýene nurun seçdi synsyz yşyklar,
Ýene öwşün atdy Gündogar bulwar.
Gysmyljyrap otyr juwan aşyklar,
Hersiniň elinde bir desse gül bar.

Menem peýwagtyma aýlanyp ýörün,
Tutup oguljygmyň akja elinden.
Ýöne gözlerimi aýryp bilemok
Gyzlaň elindäki bahar gülünden.

Şeýle ter gülleri, elwan gülleri
Bir mahal maňa-da beripdi bir gyz.
Eý, ilkinji söýgiň ajap ýyllary,
Unudup bilmeýän men seni hergiz?!

... Student ýigitdim. Gymmat bahaly
Sowgatlar äbermek meň üçin ýatdy.
Gijeler döredýän goşgularymdan
Başga bir ullakan baýlygym ýokdy.

Men goşgy ýazýardym, sen bolsaň her gün
Bahar güllerinden baglardyň çemen.
Gör, neneňsi gözel,
Gör neneň ter gül!
Synlap, sil suwy dek joşardym menem...

Ýürek bardy bu gülleriň içinde,
Posa bardy bu gülleriň içinde,
... Şeýdip ilki söýgiň gudratyna men
Göz ýetirdim bu günleriň içinde.

Indi näme?..
Geçip giden ýanwarlar
Doňdurypmy ýürekleriň gabygyn?
Posa bilen ýaňlandyrlan bulwarlar,
Sizden maňa orun ýokmy ýa bu gün?

Zyýany ýok. Goý bolmasa bolmasyn,
Aşyklara orun berseň, bes maňa.
Ynha meniň eziz oglum jonkuldap,
Ýetip barýar ýigitligiň paslyna.

Baýyrlardan ýygyp bahar güllerin,
Ynha ol-da gurup berer toý bize.
Ilkinji söýginiň ajap ýyllary
Ýene gaýdyp geler biziň öýmüze.

Ýene nurun seçer sansyz yşyklar,
Ýene öwşün atar Gündogar bulwar.
Ynsan garrasa-da, garramaz göwün,
Baglar garrasa-da, bahar bar, gül bar...



"ÝAŞLYK DRAMASY"

Sana gowşurmaga niyetlenen hat
Saraldy jubimde bolup gatbar-gat,
Şol haty bermage tapmandym pursat,
Gözeller icinde lälezar wagtyñ.

Gara sacyn gūl döşūnde towlandy
Başyndan on sekgiz bahar sowlan gyz
Howlukma howlukma biraz eglen gyz
Alayyn zūlplerin bir darar wagtyn.

Yap yanam oglandyk yetişdik eyyam
Gara gözler bilen bagrymy gyýýan
Gol gerip gygyrdym: "Men seni söyyän!"
Gyş pasly älemin ala gar wagty..

Şonda men diyipdim: "Bagtly adam,
Bally leblerinden bir gezek dadan,
Hoş bolup dolanar yagty dunyaden
Saçlarny boynuma bir orar wagty".

Şonda ekabyrdyk ūmsūm bolardan
Gursagmyz dolduryp ymtylmalardan
Garaşdyk: "Toy gūni hacan geler sen"?!
Asmanda ay bize hyrydar wagty.

...Birden aramyzda ayralyk salgym,
Senä mensiz galdyn men sensiz galdym,
Görūp galdym ak gollaryn salganyn,
Ayagmyn ustunde bikarar wagtym.

Alyslarda galgap galdy goşarlan
Diyme läläm:" Garaşmagy başarman!"
Aylar-aylanarlar, gūnler - yaşarlar,
Yolumda gözlerin intizar wagty..

Hoş gal, ilki söygim!
Hoş gal Gyzgūzer!
Oylanma, ezizim: Tamasyn ūzer
Aşygyn sen hakda goşgular dūzer
Unutmaz gursakda urgy bar wagty.

uzaklarda esger yaryn söyūp yör
Aglama aglama, juda ayyp bor!
Şonda menin būtin ömrūm hayp bor
Watanyn önūnde bergidar wagtym..

menden uzaklarda yöreyşin messan
Arada ayralyk, yūrekde gussam
Bar arzuwym sendin, bir sana yetsem
Iki yyllap bir görmäge zar wagtym.

Obama dolandym
Döwrūm ajayyp
Garşylarsyn öytdūm islegme layyk
Arman arzuwymdan bolupsyn gayyp
Özganin öyūnde özgä yar wagtyn...

Bu gūn gördūm gollaryn ak bäbekli
Yūzlerin öcūgsi solan yalakdy,
Sen nicik gözeldin badam gabakly
Lebin hurma yanaklaryn nar wagty

Gözlerinde gördūm merjen däneler
Olar mana bakdygynca käneler
Ah, ukusyz gijelerdey kän olar....
Şoldy bagta mätäc wagtyn zar wagtyn.

Yuwaşja ses bilen didin pyşyrdap:
"Atamdan il gūnden söygim yaşyrdym.
Unut meni unut meni başarsan
Baryna baryna gūnakar wagtym.."

Diydin: bar geceni edip owarram
Mähirli gatnaşyk edeli dowam,
Sen maña yar diyme, diy mana dogan,
Bu gūn menin ūcin cyn hossar wagtyn..

...Gözlerne zar gara gözli perimin,
Yandym yanşy yaly şahyr Kerimin,
Bir etjek alajym yeke delilim:
Unutman halymyn bir mydar wagty....



Hoşlaşyk


Soňky gezek gygyrdy-da parawoz,
Gök wagonlar gobsundylar haşlaşyp,
A sen bolsaň... a sen bolsaň garagöz,
Ak ýaglygyň bulap dursuň hoşlaşyp.

Bu nähili beýle bolýar, aýtsana,
Indi şeýdip galjakmy sen daşlaşyp.
Dymyp durun penjiräniň öňünde,
Doňup durun penjiräniň öňünde,
Ýüz müň hili pikir bilen baş goşup.

Seniň bagtyň üçin, eý, göwün şadym,
Men-ä uzak ýola bilim baglaýan.
Sen nämüçin ugradaňda soldatyň,
Aman baryp, aman gel diýip aglaýaň.

Zyýany ýok. Aýralykdyr, geçer bu.
Ýüregiňi daglamaly bolma sen.
«Gitdi» diýip, aglamaly bolsaň-da,
«Gelmedi» diýip, aglamaly bolma sen.

Halyl KULYÝEW.

151

10

1

5

0

Mowzugy VIP edenler: