Käbir adamlar bolýar: olaryñ saña hiç hili ýamanlygam ýokdur welin, şonda-da olary sulhuñ almaýar. Biriniñ gürleýşi ýaranok, biriniñ käbir hereketleri ýaranok, käsiniñ haýsydyr bir häsiýeti ýaranok, garaz, ugruny tapsañ şolardan gaçarak durasyñ gelýär. Şeýle adamlar bilen bir işiñ başyna barmaly bolsañ dagy, edil ýaga depjek ýalydyr. Uzak ýola ýoldaş bolsañ, asla ýol önmänjik geçer. Ýöne nähilem bolanda, olary sulhuñ almaýanyny aýdyp bilmersiñ. Şonuñ üçinem näçe ejirem bolsa, başyña dûşen wagty bile işleşersiñem, ýolda ýoldaşam bolarsyñ. Ol seniñ özüni halamaýanyñy bilmez, şonuñ üçinem öz bolşy ýaly bolar, saña ýaramasa-da gürlär, öz öñküje hereketlerini eder. Sen bolsañ oña sulhuñ almaýanyny aýdyp bolmaýşy ýaly, onuñ ähli hereketlerine kaýyl bolup, ýakymsyz gürrüñlerine "hä, hawa" berip ýörensiñ.
Gepiñ keltesi ol-a öz bolşuna bolar, senem oña görä bolarsyñ. Köplenç edýän işiñem bitmän galmaz, barýan ýoluñam ahyry barmaly menziline elter. Ýöne ýürekdeş, sulhuñ alyşýan adamyñ bilen iş eden, uzak ýola ýoldaş bolan ýaly däldir, güzaplyja geçer. Emma sulhuñ almaýan kişiñ seniñ özi bilen iş edeniñe ýa-da ýoldaş bolanyña senden hoşaldyr. Ana, şo-da seniñ üçinem, onuñ üçinem bähbitdir. Sebäbi sen ony sulhuñ almaýanyny duýduryp göwnüne degmediñ, şonuñ üçinem ol senden hoşal boldy.
Aslynda sulhuñ almaýan adama ony duýdurup, göwnüni ýykmak hökmanmy?! Özem onuñ saña hiç hili ýamanlygynyñ ýok wagtynda. Men-ä şeýle adama öz saýhally hereketiñ, sûýji sözlüligiń, mylakatlylygyñ bilen görelde bolmak peýdalymyka öýdýärin.
Şu ýerde sulhumyzyń almaýan adamlara ony duýdurmaýanymyzyñ gowy taraplary barada ýene-de käbir zatlary aýdasym gelýär. Diñe öz peýdasyna çapyp ýören, gepi-sözi köpler tarapyndan halanmaýan, meniñ-ä asla sulhum almaýan käbir adamlara işim düşüp, haýyş etmeli wagtym bolupdy. Olar barada iliñ edýän gürrüñine seretseñ-ä, meniñ haýyşym bitmeli däldi. Emma olar höwes bilen haýyşymy bitirdiler. Käsinden-ä özüm garaşman durkam ýagşylygam gördüm.
Ine, şeýle ýagdaýlardan soñ eger kimdir birini sulhuñ almasa-da, eger onuñ saña, jemgyýete zyýanlygy ýok bolsa, ony aýdyp ýörmegiñ wajyp däldigine dûşündim. Onsoñam, bir adamyñ sulhy almadygy onuñ ýaramaz adam boldugy däldir-ä. Belki, biziñ özümizi-de käbir adamlaryñ sulhunyñ almaýan bolmagy ahmal. Olaram "Seni sulhum alanok" diýip ýüzümize aýdyp ýörenoklar. Diýmek, sulhuñ almasa-da, juda wajypdyr öýtmeseñ diliñe alyp ýörmegiñ özi edepsizlik hasaplanybam bilner. Eger biz şol edebi saklap bilmesek, biziñ özümiziñ şol sulhumyz almaýan adamlarymyzdan näme tapawudymyz bar?!

Awtor: Nurberdi Dädebaýew.

349

65

15

11

0

Mowzugy VIP edenler:

— 10 sagat vip etdi.01.07.2020 / 11:38:46