Bu jandarlar pil ýaly äpet bolmasalar-da, adaty pyşbagalara garanyňda gabarasy uly bolýanlygy üçin pil pyşbagalary diýlip atlandyrylýar. Äpet pyşbagalara bütin dünýä boýunça iki ýerde — Galapagos adasy bilen Seýşel adalarynyň çäginde ýerleşýän Aldabara adasynda duş gelmek bolýar. Emma Aldabara adasyna barmagyň kynlygy sebäpli, Galapagos bu pyşbagalara tomaşa edip bolaýjak ýeke-täk künjekdir. Aslynda, bu ada XVI asyrda ispan deňizçileri tarapyndan açylansoň, «Islas Galapagos», ýagny «Pyşbagalar adasy» diýlip atlandyrylýar. Bu pyşbagalar ýüzmäge gaty bir ökde bolmasalar-da, suwda uzak saklanmagy, bir ýyllap azyk-suwsyz oňňut etmegi başarýarlar. Şonuň üçin hem olary gadymy döwürlerde deňizçiler taýýar azyk hökmünde gämilerde saklapdyrlar. Adamlar bu ýere gelmezinden ozal adadaky pyşbagalaryň baş sany takmynan 250 müň töweregi bolupdyr. Galapagos pyşbagalarynyň agramy 417 kilograma, uzynlygy 1,87 metre, ortaça tizligi sagatda 300 metre deňdir. Çarlz Darwin bu jandarlary ylmy taýdan öwrenen ilkinji alymdyr. Häzirki wagtda Santa Krus adasynda ýerleşýän Galapagos pyşbagalarynyň baş sanyny köpeltmek maksady bilen döredilen ylmy-barlag merkezi hem bu beýik alymyň adyny göterýär. Bu jandarlar 170-200 ýyl töweregi ýaşamaga ukyplydyr.

186

18

13

5

0

Mowzugy VIP edenler: