HALAS BOLMAK

(1948-nji ýylda Aşgabat ýer titremesinde bolan waka)

Ýeriň aşagynda bir güýç müňzeýär,
Üstünde bir adam —
şerapdan gammar.
Ýeriň teýi boş küýze dek güňleýär,
Güýç duýanok,
ses hem eşdenok zaňňar.

Şäher uka gitdi
Meýhana boşap,
Soňky müşderini çykardy köçä.
Ol şerapdan doýgun,
dünýäden hoşal.
Köçede adam ýok,
uludan kiçä
dünýäniň düýşlerin görüp ýatyrdy.
Ol barýar,
öýi hem indi ýakyndy.

Öýüne ýetmäge bolman kuwwaty,
gyşardy dünýäniň kölegesinde.
Duýanok asmandan gelýän haýbaty,
Eşdenok ol ýer teýiniň sesin-de.

Ýer teýinden müňzeýän güýç — nägehan
Şäheri sarsdyryp, çykdy ornundan.
Tisgindi düýş görýän müňlerçe ynsan
Aýylganç bir sesden — dünýäň oýnundan.

Aşgabat ýykyldy —
kyýamat gopdy
ynsana dahylsyz bu hyýanatdan.
Kim ýitirdi,
kimse ýitigin tapdy...
Serhoş bihabardy bu kyýamatdan.

Säher halasgärler ýaralylary
Ýygnap,
mündürdiler uçara, otla.
Mary, Lebap kabul etdi olary,
ulag gitdi gündogara, günorta...

Balkanda — Hazardan ugran gämiler
ençeme sagatlap ýüzdüler suwda.
Biziň «gahrymanmyz» näme-nämeler
bolanyn bilenok,
görse Bakuwda
birgiden ýaralyň içinde ýatyr.
Lukmanlar her kimsä edýärdi emi.
Gözi tegelenip dursa-da ýaňkyň,
Zerur däldi oňa dünýäň melhemi.

Başga sarsgyn bardy onuň başynda,
Nepi ýok dermanyň,
sanjym almagyň.
Pelegiň biz bilen oýun gurşunda —
Her hili ýoly bar halas bolmagyň

107

17

4

7

0

Mowzugy VIP edenler: