18:18 Mowzuk

Bagtly bolmak

Kiçijik gyzjagaz bagtly bolmak isleýärmişin. Ony islemeýän barmy näme?! Ol bir gün mydamalyk bagtly bolmak üçin näme edip biljekligi hakynda pikir edipdir. Näçe pikirlense-de, gelen netijesi bolmansoň, tamdyra nan ýapýan ejesiniň ýanyna barypdyr-da:
Eje, hemişe bagtly bolmak üçin näme etsemkäm? – diýip sorapdyr.
Ejesi gyzynyň bu sowalyna ýylgyrypdyr-da, oňa mähir bilen bakyp, şeýle diýipdir:
Içiň gysýar öýdýän gyzym! Şu gün öýleden soň ikimiz gezelenje gideli, şonda bagtly bolarsyň.
Gyzjagaz öz ýanyndan “Ejem maňa dünmedi” diýip pikir edipdir. Sebäbi ol diňe bir pursatlyk däl-de, hemişelik bagtly bolmak isleýärmişin.
Öýleden soň ejesi ony otag gülleri satylýan dükana äkidipdir. Ol ýerde güldanda ýap-ýaşyl bolup oturan owadan bir gül satyn alypdyrlar. Öýe gelenlerinde ejesi :
Gyzym, ine, bu gül seňki. Oňa ynjykgül diýýändirler. Gowuja seretginiň – diýipdir.
Gyzjagaz gülüni juda halapdyr. Güldany otagynda goýupdyr. Güli şeýle bir näzijekmişin. Şahajyklaryna degseň, ýygrylýarmyşyn, bir gün suw bermeseň, bada-bat süllerip başlaýarmyşyn. Gyz gülüni bagtly etmek üçin oňa wagtly-wagtynda suw berýärmişin, ýaprajyklaryny, şahajyklaryny ynjytmaýarmyşyn. Şeýlelikde, ynjykgül hemişe bagtly görünýärmişin.
Ol ejesine:
Güljagazym bagtly boldugyça menem özümi bagtly duýýaryn – diýipdir.
Ejesi mähir bilen ýylgyryp, şeýle diýipdir:
Hemişe bagtly bolmagyň bir ýoly-da özgeleri bagtly etmekdir.
Ine, şeýdip, şol gün gyzjagaz hemişe bagtly bolmagyň ýoluny öwrenipdir.