Eziz başym bendi bolup galaýdy

Obamyza ahyrzaman öwrüldi.
Eziz başym bendi bolup galaýdy.
Üstümize ajal ody sowruldy.
Eziz başym bendi bolup galaýdy.

Oglan-uşak gidip barýas eñşeşip.
Il-günümden aýra düşüp, ýol aşyp.
Ukusyz ýol aşyp, barýas enteşip.
Eziz başym bendi bolup galaýdy.

Niçelermiz bendi bolup sürüldi.
Ganymlardan görgi bary görüldi.
Niçelermiz namys üçin gyryldy.
Eziz başym bendi bolup galaýdy.

Är doganlar ilim üçin öldüler.
Ryswa bolduk, ar-namysy aldylar.
Çatyşdyryp at öñüne saldylar.
Eziz başym bendi bolup galaýdy.

Rehim etmez çagalaryñ sesine.
Bendi bolup düşdük ýagy pisine.
Gymmat diýer girsem ýeriñ astyna.
Eziz başym bendi bolup galaýdy.


Ilim aglap, duşman gülse nädeýin

Gülden näzik jandan eziz perzendim.
Pelek senden jyda kylsa nädeýin.
Gözümiñ guwanjy ol göwün bendim.
Alaçsyz çyrlaýyp galsa nädeýin.

Gurt, peleñ mekany - Köpetdag dere.
Çagamy çyrladyp zyñdylar ýere.
Aglaşar eneler, tapylmaz çäre.
Ýüzüñde jemalyñ solsa nädeýin.

Ýüregim gan öýer, gözlerim ýaşly.
Gollarym baglydyr, depäm gylyçly.
Galdy çaga bary bize degişli.
Ýüregim ot alyp ýansa nädeýin.

Naçar çeker perzendiniñ yzasyn.
Ganymyza ganym boýar naýzasyn.
Elimden aldyryp dünýä mazasyn.
Gunçalar açylman solsa nädeýin.

Ynsapsyz hunhorlar, zalym töresi.
Biçäreleñ paýy jebriñ seresi.
Gymmat diýer, bitmez jiger ýarasy.
Ilim aglap, duşman gülse nädeýin.

Gözi bagly guş bolup

Gözüm bagly mysapyr, bir zalymyñ öýünde.
Meniñ adym tutulmaz şagalañda, toýunda.
Hödür-kerem görmedim töresinde, baýynda.
Ýat illerde gezmeli, gözi bagly guş bolup.

Türkmen ilim - howandar, geler diýip tamaly.
Alabeder çit köýnek, endam-jany ýamaly.
Etim-ganym gurady öläýmäge çemeli.
Gezip ýörün bialaç jiger-bagrym baş bolup.

Ýylan ýaly şyr takyr, ýokdur odun- çöpleri.
Demirtiken mysaly her bir aýdan gepleri.
Keçe köpen dolanyp, göze gelmez köpleri.
Göwräm gitdi ereýip, görünýärin boş bolup.

Doýa garnym doýurmaz, birehimdir bu zalym.
Tende ganym guratdy, ýokdur ysgyn mejalym.
Hossarlarym gelmese ýeter basym ajalym.
Salgymlar-da giderin, gurap giden läş bolup.

Jemile-de görgüli, Jowasiriñ çorusy.
Önüp-ösdük bir ýerde, Gymmat gyzyñ jorasy.
Gaýdan ýerim görünmez, gara dagdyr arasy.
Watan saña intizar, gözüm doly ýaş bolup.



Biçäre men watanymdan aýrylyp

Jemile jan ilimize gaýdaýsak.
Bolarmyka hossarlara görünip.
Biygtyýar ar-namysy aldyrdyk.
Durup bormy, ýör diýseler, irinip.

Ýesir düşdük, ýat kesekä çory biz.
Sütem görüp bir ölmedik diri biz.
Daşdan görseñ gyrnaklaryñ biri biz.
Gezip ýörüs gara çadra bürenip.

Gije ýatsam ilim-günüm düýşümde.
Oýalykda gaýgy-gamlar daşymda.
Azabym köp, gamçy, taýak başymda.
Öläýemzok gezip ýörüs süýrenip.

Hyzmatyna ýetişme ýok ylgaýyp.
Awy dili jigerimi daglaýyp.
Gözýaşymy saklabilmen baglaýyp.
Gaýgy-gussa ýatabilmen urunyp.

Hojaýynmyz tüsse çeker şireläp.
Gamçy iýdim Gülnahaly aralap.
Gymmat gelin ýürek bagryn paralap.
Biçäre men watanymdan aýrylyp.


Gülhanym

Gyzylbaş gyrnagy öwer şäheri.
Dogrusyn aýdaýsam geler gahary.
Nan ornuna iýip gezer zäheri.
Ýagşy şäher biziñ ilde Gülhanym.

Ortasynda doñuz ýatan töweçge.
Töweregi towuk ketek, höwürtge.
Ýürekgysgynç, ýok-la munda ugur-utga.
Ýagşy şäher biziñ ilde Gülhanym.

Şäherinde şaýymezhep ulama.
Ýesirleri duçar etdi ölüme.
Örän ökde zyndan bilen zuluma.
Ýagşy şäher biziñ ilde Gülhanym.

Garyba sütemkär şäheriñ şiri.
Laýdan gurulypdyr, yşyksyz bary.
Salypsyñ zyndany, gurupsyñ dary.
Ýagşy şäher biziñ ilde Gülhanym.

Türkmenleriñ ak üzükli şäheri.
Al-elwandyr ýada salar bahary.
Palaw, kebap, ter waharman nahary.
Ýagşy şäher biziñ ilde Gülhanym.

Göwnüñ galkar, haly düşek öýleri.
At çapylar, ýaryşlydyr toýlary.
Gymmat gelin, altyn-kümüş şaýlary.
Ýagşy şäher biziñ ilde Gülhanym.


Joralaryñ aýdyşygy

Gymmat

Ýagşy habar getirdiñ, gutly bolsun Jemile!
Indi basym gaýdarys watanmyza-zemine.
Ýüreklermiz şat bolup gaýgy gitsin gümüne.
Hossarlary gördüñmi, habar beräý Jemile?

Jemile

Hossarlarmyz gelipdir, otyr eken gepleşip.
Hojaýynmyz "ber" diýip, azym urýar dikleşip.
Baha üçin gelen zat ýatyr eken sepleşip.
Hossarlarmyz gelipdir, gözüñ aýdyñ Gymmat gyz!

Gymmat

Jemilejan doganym, hossarlary gördüñmi?
Görüp özüñ ýitirip ýa-da aglap durduñmy?
"Gymmat joram bar" diýip, menem habar berdiñmi?
Hossarlary gördüñmi, habar beräý Jemile!

Jemile

Hossarlary gördüm men, doñan ýürek eredi.
Sag-amanlyk soraşyp, mähir bilen garady.
Halyk diýen doganyñ derrew seni sorady.
Doganlarmyz gelipdir, gözüñ aýdyñ Gymmat gyz!


Kabul eýle jan watan

Şagal, böri penjelän dagy sähra maraly.
Men bir ejiz naçaryñ kabul eýle jan watan.
Neneñ ýaşym saklaýyn men bir hossar höreli.
Ütelgiler tawusym eýledi gyzyleten.

Dilim çykmaz galypdyr, ýürek doly gorkudan.
Galmaz edip göwrämi, ganym hussa merk eden.
Umyt baglap gelenim, agzym zäher, zirk eden.
Men bir ejiz naçaryñ, kabul eýle jan watan.

Gülhanymyñ kesewisi tagma meniñ tenimde.
Göbek ganym daman ýer, ýatsam höwür ýanymda.
Arzym diñle aýdaýyn, jeza çekdim ganymda.
Men bir ejiz naçaryñ, kabul eýle jan watan.

Hazan ýeli solduryp, hara dönen gül boldum.
Hatyralyñ hezzeti, ahyr ite ýal boldum.
Zalym ganym elinde, otsuz ýanyp kül boldum.
Men bir ejiz naçaryñ, kabul eýle jan watan.

Ýat ýigrenji elinde, jazbalady bu başym.
Garry gyýak mekejin - kepdirmedi gözýaşym.
Diriligme sebäpkär - Jemile jan boýdaşym.
Men bir ejiz naçaryñ, kabul eýle jan watan.

Garry Gowak jülgesi - ir-iýmişli, sapaly.
Gymmat gelin Börmeli, öz iline wepaly.
Pelek aýra salany neneñ eýläp tapaly.
Men bir ejiz naçaryñ, kabul eýle jan watan!

296

34

14

11

0

Mowzugy VIP edenler: