05:12 Mowzuk

2020-nji ýylda Portugaliýanyň paýtagty Lissabon “Ýewropanyň ýaşyl paýtagty” derejesine eýe boldy. Şeýle ada eýe bolmak üçin, Ýewropanyň 30 şäheri bäsleşdi. Ýewropa Bileleşiginiň daşky gurşawy goramak boýunça komiteti Lissabonyň Ýewropanyň köp sanly şäherleri üçin nusgalyk şäherdigini öňe sürdi. Bilermenler Lissabonyň ykdysady ösüş we durnuklylyk babatda deň derejede ösüş gazanýandygyny bellediler.

Bu at ugrundaky bäsleşikde Lissabon Belgiýanyň Gent we Finlýandiýanyň Lahti şäherlerinden öňe saýlandy. Lissabon gazanan üstünligine bagyşlap, şu ýylyň dowamynda şäherde agaçlary we ekologiýany goramaga gönükdirilen dürli çäreleri geçirmegi meýilleşdirýär. “Ýewropanyň ýaşyl paýtagty” derejesi her ýylda ilaty 100 müňden geçen Ýewropanyň bir şäherine ekologiýa, sosial we ykdysady durnuklylyk ýaly ýagdaýlary nazara alnyp, berilýär.

Lissabon Ýewropa Bileleşiginiň başlangyjyna goşulan ilkinji Ýewropa paýtagty bolup, 2016-njy ýylda howanyň üýtgemeginiň ýaramaz netijelerine garşy göreş we energiýa boýunça şäher häkimleriniň ylalaşygyna gol çekdi. Eýýäm şu döwre çenli Lissabon kömürturşy gazynyň howa zyňylmagynyň mukdaryny 50 göterim, energiýanyň sarp edilişini 23 göterim, suwuň ulanylyşyny 17 göterim azaldypdy. Şäheriň jemgyýetçilik ulagynyň 39 göterimi elektrik energiýasy bilen işleýär. 2019-njy ýylda “Ýewropanyň ýaşyl paýtagty” derejesine Norwegiýanyň paýtagty Oslo şäheri eýe bolupdy.