Tapsa maşgala üçin tüwi hem nany kişi,
Oňa ýeterlik bolar, bolmaz Dowzahda işi.
Takdyrda rysgal paýyn, Alla goýandyr oňa,
Özi gowy bilýändir, bendäniň halyn diňe.
Hak şadan alyp berer, dilenmese hem bendeden,
Dilenmek ýaman zatdyr, hiç dilenme bende sen.
Dünýä alyna düşüp, birden gaçma çukura,
Dünýä gyzmak beladyr, gitme beýle pikire.
Toprak bilmeýär asla, garyby ýa-da baýy,
Kim bolsa bolaýsyn ol, kabul etmek oň paýy.
Allanyň dergähinde, baý-garyp deňdir bary,
Adyldyr Alla bilseň, adyldyr Oň karary.
Baý ýa-da wezir bolsaň, mertebäň galsa ilde,
Garyba zulum etme, hetdiň-çeniňi bil-de.
Firgaun, Haman, Nemrud niçik şalardy bilseň,
Ejize zulum edip, boldy dowzahy onsoň.

YLYM ÖWRENMEK
Ylym talyby bolsaň, her haçan ymtyl oňa,
Takwalyk, ukusyzlyk, doýmazlyk gerek saňa.
Eý, adamlar, ot ýaly siz, geler bir gün orar ölüm,
Eken zadyň diri wagtyň, ormaz ölüm — muny biliň.


KANAGAT
Kanagat bir seýrek dürdür,
Kanagatly göterlipdir.
Mätäçlikden är darygar,
Kanagat bagta syrygar.


ÝAGŞY ADAMY SÖHBETDEŞ EDINMEK
Ýagşy söhbetdeş adam,
Saňa bolar ibn Keddam.
Mähriban, agras gepi,
Onda bar ylym ýüki.


GÜNÄ KALBY ÖLDÜRÝÄR
Günäleň ýürekleri öldürýänin gördüm men,
Yzyndan azaşmagyň gelýändigin gördüm men.
Günä üçin bary deň, şa bolsun ýa ruhany,
Hemmäň kalbyn öldürýär, sylamaz hiç ynsany.
Günä işi etmezlik, diriligi her kalbyň,
Nebse tabyn bolmazlyk, ýagşydyr şony kylgyn.
Şeýtana özün satan, baýamaz hiç bir zaman,
Şeýtanyň was-wasyndan, özüňi eýle aman.
Erkiňe et ygtyýar, ýagşy işlet aklyňy,
Diňe şonda taparsyň iki dünýä bagtyňy.


YLYM ÖWRENMEKDE UTANÇ ÝOK
Abdylla sowal berseň,
Jogapsyz goýmaz bilseň.
Jogap göwnejaý eger,
Taparsyň rahat, meger.
Jaý däldir jogap saňa,
Başgany tap, ber oňa.
Jogabyny tap hökman,
Utanjyňa hiç bakman.


YLMYŇ MIWESI
Ylym hormat alana,
Ýolunda sepil bolana.
Eger edep öwrenseň,
Ylymlar ýeňil onsoň.
Edepsiziň mysaly,
Egri bir agaç ýaly.
Egriligne öter ol,
Bu sebäpden edep al.
Näçe hormatly bardyr,
Ýöne edebe zardyr.


PESLIGIŇ HAKYKATY
Bilseň, tamakin bolmak,
Peslige özüň salmak.
Daýansaň öz güýjüňe,
Galarsyň beýge diňe.
Güýji bilen özgäniň,
Galmagyň mümkin seniň.
Guş näçe beýik uçar,
Galşy dek ýere gaçar.
Özge güýjünden galsaň,
Düşersiň pese, onsoň.


BELANYŇ ALAMATY
Belada alamat bar,
Nebsiň mydam zada zar.
Alamat bende bilse,
Nebis islegi gelse.


ŞÄGIRTLERIMIŇ BIRINE NESIHAT
Adamlar bilen eger,
Ýola çyksaň sen, meger.
Ýoldaşa bol mähriban,
Nesihatym eý, ynsan.
Gödeklik kalbyň aýby,
Hemme aýbyň ol düýbi.
Sen nebsiňi al ele,
Diý: «Gideli, ýör ýola».
Ýolda sen gödek bolsaň,
Ýeke galarsyň, onsoň.


AÝ ÝAGTYSYNYŇ SOŇY
Göreňde ol täze aý deýin bolýar,
Birbada çişýär-de, ýene ulalýar.
Içgin syn edäýseň dolan Aý ýaly,
Ýuwaşdan kiçelýär mertebe saly.


BENDÄNIŇ HAKY
Bilgin, bendäniň haky,
Iýseň, belanyň oky.
Bende özüň dek ynsan.
Niçik sütem edýän kän.
Dermany ýok bu derde,
Ýanaşaýmagyn bir-de!


RYSGAL ALLATAGALADAN
Tama edip, ýalbarmagyn hiç kese,
Bermegin özüň zyýanly işe.
Hak Alla berýändir rysgalyň saňa,
Hazyna-genç bary degişli Oňa.
Adamdan eger kişi umyt baglasa zady,
Garybyň ogly garyp, garypdyr onuň ady.


DOGRUÇYLLYK WE DYMMAK HAKDA
Bilip dymmak bir çäre,
Çünki bezeg ol äre.
Dogruçyllyk är görki,
Dogry söze ber erki.
Agraslyk zynat äre,
Seret maňlaýda nura.
Ýagşy ahlagy maňa,
Ber, ýalbarýan men Saňa.


ARASSA SÖÝGI
Her bir yhlas biderek, Senden özgä edilen,
Başlamasa apatdyr, her bir söz adyň bilen.
Söýgiň bilen bolmasa, her işiň soňy bozuk,
Diňlemek başga sözi gitmek ýoluňdan azyp.
Razylygyň gözlemän, ynsan ýörese öňe,
Bozuk her bir ymtylyş, ýaran bolmasa Saňa.

Arap dilinden terjime eden
Täjigül MYRADOWA

45

10

1

6

0

Mowzugy VIP edenler: