Allatagala, Ezraýyl alaýhyssalamyň getiren topragyny Mekge bilen Taýyfyň arasynda Hanna diýen ýerde goýdy. Ol topraga Bahrul – ahzan diýen derýanyň suwundan biri kem kyrk ýyl gam ýagmyry, bir ýyl şatlyk ýagmyry ýagdy. Şol sebäpden adam perzendinde gaýgy – gam köpdür, şatlyk azdyr. Kyrk ýyldan ol toprak palçyk boldy. Ondan soň Allatagala Adam alaýhyssalamyň şekilini döretmegi maksat edindi. Ol kyrk säherde ol palçygy eýledi. Kyrk säher diýilýän wagt bu dünýäniň kyrk müň ýylyna deňdir. Ol bu işi hiç mahluga buýurmady. Ol bu işi diňe öz gudratly goly bilen etdi. Allatagala hezreti Jebraýyl alaýhyssalama perman berdi: “Biziň mähribanlygymyzyň we merhemetimiziň, enaýaty – mähnetimiziň ýelinden şemaly getir” diýip, hezreti Ysrapyl alaýhyssalama: “Biziň rehmet ýabymyzdan suwy getir” diýip, hezreti Mikaýyl alaýhyssalama: “Biziň bela – apat butamyzdan ot getir” diýip buýurdy.
Elkyssa, olaryň her biri özüne buýrulan zady getirdi. Allatagala bu zatlaryň hemmesini palçyga aralaşdyryp reňbe – reň topraklardan taýýar etdi. Şonuň üçin adamlar dürli reňkli we dürli häsiýetli boldular. Ol adamyň mertebesini we jemalyny ýerbe – ýer etdi. Onuň nuruny ýüzünde goýdy.
Ol adamlaryň göwresinde dört zady ýaratdy: biri akyl, biri ruh, biri nebis, biri köňül. Olaryň her haýsyny bir zatdan aldy. Köňli suwdan aldy, şonuň üçin köňül sap we röwşendir. Ol adamyň içini görkezýän aýnadyr. Ruhy şemaldan aldy. Ruhy Gaýypda özüne bendeçilik etmek üçin goýdy. Akyly toprakdan aldy. Allatagalanyň Adamyň topragyny dürli reňkli edip alşy ýaly, adamyň akyly hem dürli röwüşde boldy. Akyla nämäni öwretseň, ol şony hem öwrener. Nebsi otdan aldy. Şonuň üçin kim nebsiň küýüne girse, nebsi onuň ahwalyna ýol tartar. Ol munuň üçin azaba duçar bolar.
Elkyssa, Allatagala Adamyň her agzasynyň etmeli işini bölek etdi. Gözi görmek üçin, gulagy Hudaýtagalanyň kelamyny eşitmek üçin, burny Hudaýtagalanyň muhabbet ysyny almak üçin, dili Hudaýtagalanyň zikrini etmek üçin, goly Hudaýtagalanyň işini kylmak üçin, aýagy Hudaýtagalanyň ýolunda ýöremek üçin, maňlaýy sežde etmek üçin, arkany şerigat ýüküni götermek üçin, garaz her bir agzany bir işe buýurdy. Bir agzanyň işini beýleki agza etmeli däl boldy.
Elkyssa, Adam alaýhyssalamyň şekili kyrk ýyl bu ýerde ýatdy. Bu şekile perişdeler topar – topar bolup görmäge geldiler. Olar onuň kämil ýaradylandygyny görüp haýran galdylar. Çünki olar mundan öň munuň ýaly ajaýyp şekilli zady görmändiler. Bir gün Azazyl birnäçe perişdeler bilen Adam alaýhyssalamyň şeklini görmäne geldi. Azazyl hemme asmanlarda, jennetde, dowzahda, Arşda, Kürsde, Lowhda we Galamda gören ajaýyp zatlaryny bu şekille gördi. Ol muňa haýran galyp şekili goly bilen urdy. Ol şekilden bir sesi eşitdi. Ol hemralaryna: “Eý, perişdeler! Gan iýmäň, bu şekil bir boş gowakdyr. Gowak bolan zat aýyplydyr hem kemlidir” diýdi. Ol öwrülip – çöwrülip onuň agzyny, burnuny, gulaklaryny, garnyny görüp: “Eý, perişdeler! Munuň içine girip, ser salyp göreli. Biz onuň içine häzir girip görmesek, ruh oňa girenden soň girip bilmeris” diýdi. Azazyl şekiliň içine girip gördi. Ol şeýle arassa ymaraty heniz görmändi. Ol iki dünýäniň hemme zatlary özünde taýýar edilen hazyna ýaly eken. Ol bir beýik we ajaýyp köşk ýaly eken. Azazyl hernäçe hyýal kylsa hem bu öýüň köňlüniň içine girmek miýesser etmedi. Hudaýtagala ony köňül hakykatyna girmäge rugsat bermedi. Azazyl mahrum we näumyt boldy. Ol köp gamgyn bolup, ol ýerden çykdy. Onuň hemralary Azazyldan gören zatlary barada soradylar. Ol hakyky köňüle girip bilmändigini aýdyp, gören zatlaryny birin – birin beýan etdi. Azazyl: “Eý, ýaranlar! Eger Allatagala bu toprak göwräni bizden artyk kylyp, hormatlasa we ýagşylasa siz näme edersiňiz?” diýdi. Perişdeler: “Biz diňe Hudaýtagalanyň permanyny berjaý ederis” diýdiler. Azazyl: “Eger Hudaýtagala ony menden ýagşy etse, men oňa boýun sunmaryn. Eger Hudaýtagala meni ondan ýagşy kylsa, men ony öldürmän goýmaryn” diýip, ant içdi. Şol zaman ol mürted boldy. Her kişi: “Men bu işi kylmasam” diýip ant içse we ony ýerine ýetirmese ol günäkär bolar.
Wagty gelende bedeniň galyby taýýar boldy. Allatagala gudraty bilen kinesiz syna imany bent kyldy. Ony beýik derejeli tagtda görner ýaly edip oturtdy. Ondan soň Allatagala ruha: “Gel” diýip bir owaz geldi. Ruh bu owazy eşidip, müň tizlik bilen gelip: “Baş üstüne, eý, Perwerdigärim!” diýdi. Allatagala ruha: “Eý, ruh! Sen meniň kyrk säherde gudrat golum bilen ýaradylan we ýugrulan jesedime gir!” diýdi. Ruh görse, bu göwräniň içi garaňky boşluga meňzeýär eken. Ol muňa girmäge wehm etdi. Ol hiç haçan şeýle gorkmandy. Ol: “Eý, Taňry! Ol ýer maňa ýüz müň ýylan – içýan, mör – möjek agzyny açyp duran ýaly bolup görünýär. Meniň gorkudan ýaňa tab – u –takatym galmady. Gireýin diýsem ondan, girmäýin diýsem senden gorkýaryn. Men: “Nebis bilen aramyzda jedel – dawalar peýda bolar” diýip hatyr edýärin. Olar köpdür, men ýalňyzdyryn. Ahyrynda men niçik bolaryn?!” diýdi.
Elkyssa, Allatagala ruha üç mertebe: “Gir” diýip emr etdi. Ruh her gezek gorkup, dogrusyny aýtdy. Ahyrynda Allatagala: “Eý, ruh! Sen bu göwrä tiz gir we tiz çyk” diýdi. Ondan soň ol göwrä Muhammet alaýhyssalamyň nuruny goýdy. Bir röwşenlik peýda boldy. Ruh parlak gün ýaly şöhle saçýan bu toprak bedene uly şatlyk bilen onuň kellesinden girdi. Ol näçe wagt kelle käsesinde durdy, onsoň damaga geldi. Ruh nirä barsa, şol ýerde et –deri peýda boldy we ol ýer ýumşady. Ol göze gelende onuň bäbeneginde durdy. Bu gaýgyly çukur ýaly toprak Allatagalanyň gudratyny bildi. Ruh Allatagalanyň mähribanlygyny, aýş – eşreti, nazy – nygmatly, hüýr – gulmanly, ryzwanly jenneti, daş – töweregi, asmanlary, Arşy, Kürsi, Lowhy, Galamy – bu gam – gaýgyly toprak bedeniň içinde gördi. Ol Pygamber alaýhyssalamyň: “Kim özüni tanasa, ol Taňrysyny hem tanar” diýen sözüniň manysyna düşündi we: “Bu göwre durşuna syrlardan doly eken” diýdi.
(Hezreti Adamyň derisi köp görklüdi, ýagny tutuş bedeni dyrnakdandy. Ol günüň ýagtysyndan hem röwşenräkdi. Ruh nira barsa şol ýerde et – deri peýda boldy. Ol deriniň nyşanasy diňe barmaklaryň ujunda galdy. Adam dyrnagy şol bedendendir. Adam alaýhyssalamyň bedenine ruh girende juma güni öýle namazynyň soňraky wagtydy.)
Ruh Adam alaýhyssalamyň gözlerine gelende, onuň nazary Arşa düşdi. Görse, onda: “La ilähe illalla, Muhammet resulalla” we onuň ýanynda: “Günäli ummat we rehimdar Taňry” diýip ýazylypdyr. Ol muny görüp haýran galdy we “Lä ilähe illalla” Hudaýtagalanyň adydyr. Emma “Muhammet resulalla” diýleni niçiksi zatdyr. Ol näme üçin Seniň mübärek adyň bilen ýazylypdyr?” diýip sorady. Allatagaladan: “Eý, Adam! Ol seniň perzentleriňden we meniň pygamberlerimdendir. Eger seniň keramat aýagyň zalalat batgasyna batsa, ol saňa şepagat eder, men seniň günäňi geçerin” diýen owaz geldi. Adam alaýhyssalam köňlünde: “Eger men ata bolsam, ol maňa perzent bolsa, men günäkär bolsam, ol maňa şepagat etse, onçakly ýagşy görünmez. Eger perzent günäker bolsa, men oňa şepagat kylsam, bu örän ýagşy bolar” diýen hyýal peýda boldy. Şol wagt Jebraýyl alaýhyssalama: “Bu bendäniň köňlündäki bozuk hyýalyň ýarysyny kesip al we ony jennetde göm!” diýen perman boldy.
Hezreti Jebraýyl Adam atanyň ol bozuk hyýalyny alyp, baryp jennetde gömdi. Ol ýerden bir daragt gögerip çykdy we ol miwe berdi. Onuň ady Şejeraten memnuga boldy. Hatalar we kemsinmeler bu sebäpli dörändir. Ol bozuk hyýalyň galan ýarysy Adamyň bedeninde galypdy.

43

7

2

4

0

Mowzugy VIP edenler: