04:09 Mowzuk

Gudraty güýçli Allatagala Muhammet pygamberiň, günden ýagty röwşenlik saçýan, bütin älemleri nurlandyrýan nuryny bir zada beresi geldi. Allatagala ähli älemlere jar çekdirdi. Hiç bir zatdan: “Men ony saklap biljek” diýip, ses çykmady. Netijede Allatagala nury saklap biljek kämil ynsany, ýagny Hezreti Adam alaýhyssalamy ýaratmagy ýüregine düwdi.
Haktagala perişdelere: “Men ýer ýüzünde özüme wekil ýaratmakçydyryn. Men ony özüme hemmeden eziz tutaryn” diýdi. Azazyl bu owazy eşidip, perişdelere: “Eý, perişdeler! Hudaýtagala ony ýaratsa, ol Benijandan hem agyrrak günä eder. Ondan köp bozuklyk ýüze çykar. Allatagala sizi oňuň hyzmatyna salar. Siz Taňra: “Eý, Hudaýymyz!” Eger sen ony tesbih we tehlil üçin ýaratmak isleýän bolsaň, bu işleri biz edeli. Eger biz tagat – ybadaty kem eden bolsak, ony köpeldeli diýiň” diýdi. Perişdeler: “Eý, Taňrymyz! Ony ýaratmagyň sebäbi nämedir? Günä işleri Benijan edýär, biz bolsa seniň ybadatyňa meşguldyrys” diýdiler. Allatagala olardan: “Men ony ýaratsam näme bolar?” diýip sorady. Perişdeler: “Sen ony ýaratsaň, ol ýer ýüzüni bozuklyk we günä işlerden doldurar. Onuň perzentleri biri – biriniň gybatyny ederler, şerap içerler, zyna ederler, nähak gan dökerler, ata – enelerine azap bererler, gaty – gaty gülerler, ýetimiň hakyny iýerler we biri – biriniň mallaryny ogurlarlar” diýip jogap berdiler. Allatagaladan: “Eý, perişdeler! Olaryň işlerini diňe meniň özüm bilýärin, siz bilmeýärsiňiz. Siz olaryň gan dökjekdigini bildiňiz, emma bu işden toba edip, göz ýaşlaryny dökjekdiklerini bilmediňiz. Olaryň günä işleri etjekdiklerini bildiňiz, emma munuň üçin ahy – pygan tartjakdyklaryny bilmediňiz. Olaryň biri – birleriniň gybatyny etjekdiklerini bildiňiz, emma olar bilen biziň aramyzdaky mähru – muhabbeti bilmediňiz. Olaryň şerap içjekdigini bildiňiz, emma olaryň bu günä sebäpli hunaba ýuwutjakdyklaryny bilmediňiz. Olaryň başga hem dürli günäleri etjekdigini bildiňiz, emma olaryň tagat – ybadata meşgul boljakdyklaryny bilmediňiz. Siz olaryň säwlik – hatalaryny bildiňiz, emma meniň hatalaryny bagyşlajakdygymy bilmediňiz. Eý, perişdeler! Meniň erk – islegime garşy çykdyňyz, indi goý siz meniň älemimden çykyň. Allatagala olara ýene: “Siziň ybadatyňyz galplyk we ikiýüzlülik bilendir. Adam oglunyň bozuklygy dönüklik we ejizlik bilendir. Meniň dergähimde galplyk hemme günälerden beterräkdir. Ejizlik we kiçigöwünlilik meniň üçin galplyk bilen edilen ybadatdan ýagşyrakdyr. Bu sözleri Allatagala şeýle gazap bilen aýtdy weli, hemme perişdeler gara döw dek bolup galdylar. Olardan perişdelik sypaty aýryldy we olar günäkär boldular. Olar aýdan sözlerine ýüz müň puşman etdiler. Emma bu ökünç olara hiç peýda bermedi. Olar ümsüm bolup, ýer dyrmalap galdylar.
Elkyssa, bu perişdeler günäleriniň şumlugyndan asy bolup, haýran we sergezdan bolup, umydygärlik bilen Kürse baryp, onuň töwereginden aýlanyp, ýetmiş müň gezek ötünç sorap, günäleriniň geçilmegini haýyşt etdiler. Ondan soň olar Arşy metjide gelip, oňa togap edip, Allatagala ýalbardylar. Allatagala bularyň ötünçlerini kabul etdi. Allatagalanyň olara rehmeti we şepagaty boldy. Allatagaladan: “Eý, perişdeler! Siz meniň razylygymy dileýärsiňizmi?” diýen owaz geldi. Perişdeler: “Eý, Taňrymyz! Biz biçäreleriň janyna aman berseňiz we bize rehim etseňiz, beren sowalymyz üçin bizi mundan beter ýüzügara etmeseňiz!” diýdiler. Allatagaladan: “Eý, perişdeler! Siz Arşyň astyna baryň. Ol ýerde bir derýa bardyr. Siz şol derýadan täret kylyň” diýen bir owaz geldi. Ol wagt perişdeler täret kylmagyň ugruny bilmeýärdiler. Allatagala: “Siz ýüzüňizi we iki eliňizi tirsegiňiz bilen ýuwuň, başyňyza mesh tartyň, iki aýagyňyzy topugyňyz bilen ýuwuň” diýdi. Perişdeler ýüzlerini ýuwdular, olaryň ýüzi agardy. Olar gollaryny tirsekleri bilen ýuwdular, olaryň gollary agardy. Olar başlaryna mesh tartdylar, olaryň başlary agardy. Olar aýaklaryny topuklary bilen ýuwdular, olaryň aýaklary agardy. Elgaraz, perişdeler päkize boldular. Ondan soň olar täretiň şükranasyna iki rekagat namaz okadylar. Olaryň hemme agzalaryndan garalyk aýryldy. Olar günälerinden halas boldular.