03:59 Mowzuk

EJE WE DURMUŞ

Durmuş gurdy ýazyň ajap gününde
Bir-biregi söýýän iki ýaş juwan.
Bagt tapdylar il bagtynyň deňinde,
Etmediler aýralyk hakda guman.

Bagtlaryna bagt goşulup bularyň
Dünýä indi iki sany çagasy.
Diýdiler:"Balalam tizjek ulalyň,
Siz bolduňyz geljegmiziň manysy"

Ýer ençe aýlanyp Günüň daşyndan,
Ýyllar geçdi hemme üçin deň bolup.
Bu maşgalaň bagty uçup başyndan,
Aýlganç ses eşdildi oba ýaňlanyp.

Maşgalaň diregi, gojaman dagy
Ajal hilesiniň gurbany boldy.
Şondan soň olaryň bagt ysly bagy,
Küle dönüp hemme gülleri soldy.

Emma dowam edýär durmuş diýen zat,
Birgün meýlis bolýar, bir gün ýas bolýar.
Ejä galdy ähli çekmeli azap,
Onuň çagalaram barha ulalýar.

Bir ogly gygyrýar:"Eje, meň ejem"
Beýleki aglaýar:"Ýok eje meňki"
Bularyň jedelne geläýende çem,
Agarýardy ejäň ýüzünüň reňki.

Durmuş dowam diýdi, ýyllar ýör diýdi,
Ene çagalarny söýdi, ulaltdy,
Olara köp berdi, özi az iýdi,
Geýdirdi, öz geýimlerni kemeltdi.

Ilden kem etmedi okuw okadyp,
Unutdy geçmişiň jebir jepasyn.
Oglanlary okuwyn tamam edip,
Uly kärde sürdi hezil sapasyn.

Şäherli owadan gyzlary saýlap,
Öýlendiler jaý aldylar şäherden.
Ejesi obada olary oýlap,
Her gün ir örýärdi saba säherden.

Obadan hat geldi ikisine-de:
"Biz diňeje şertnamany bileris,
Karzyňyz şu görkezilen sene-de,
Tölenmese öýňüz elden alarys."

Ol karzy üzmek dym kyn däldi, ýogsa
Olaň artyk pulam eýýäm jem boldy.
Ýöne öň, "-meň ejem -meň ejem" bolsa,
Indi "seň ejeň - ýok seň ejeň" boldy.

Karz üzülmän, eje daşarda galdy,
Bir aý ýaly boldy goňşularynda.
Soňraky bir aýda doganda boldy,
Ýagdaýy bolmady soň bularyňda.

Şäherde köpeldi ýygnaklaň sany,
Gelinler başlykdy ähli ýygnaga.
Ejeň gelse alyp geler obany,
Bu dar jaýa köp adamy ýygnama

Diýip gelinlerden soňky söz geldi,
Baş egdi oglanlar gürrüň gutardy.
Olara aýtmany kiçi perzendi,
Ejesin garrylar öýne ýatyrdy.

Şeýdip şol aýlandy durdy pasyllar,
Eje hem garrady, kazasy doldy.
Ýüreginde kändi ullakan syrlar,
Ol syrlar mydama şol ýerde galdy.

...Ýene-de gün ýaşdy, iňrik garaldy,
Goja Şar bir aýlaw aýlandy ýene.
Dogry ýollar köpkä, tersden ýöreldi,
Şoň üçin aglady, aglaýar ene.
Şoň üçin giň kalbyn daglaýar ene.

Şatlyk ESENOW