Bir gurply adamyň ýalňyz perzendi – ýeke ogly bar eken. Ol “ýurduny täzelemeginiň” öňýany ogluny ýanyna çagyryp, şeýle diýipdir: “Men saňa üç sany pent bereýin, sen ömrüň boýy oňa berk eýermelisiň: hiç haçan birinji bolup salam bermegin, her gün agşamlyk süýji tagamlar iýginiň, günde irden öýden çykanyňda, täze köwüş geýip çykgynyň”.
Şondan soň uzak gitmän, kakasy “amanadyny tabşyrypdyr”. Ogly bolsa atasynyň wesýetini berjaý edip ugrapdyr. Ýöne geň galaýmaly zat, oba adamlary onuň bilen salam-helikden ýüz öwürüp başlapdyrlar, ähli puly hem süýji tagamlary we aýakgap satyn almaga gidýärmişin.
Günleriň birinde ol ejesiniň ýanyna barypdyr-da, şeýle diýipdir: “Eje, men kakama näme ýamanlyk etdimkäm, näme üçin ol maň duşmanymyň etmejegini edip, beýle öwüt-nesihat berdikä?”.
Şonda ejesi şeýle jogap beripdir: “Kakaň tä özüň soraýançaň, seniň işleriňe goşulmagy maňa gadagan edipdi. Onuň “Hiç haçan birinji bolup salam bermegin” diýen pendi – “Hemmelerden ir tur-da, meýdan işe çyk, gabadyňdan geçip barýan adamlar, goý, saňa birinji bolup salam bersinler” diýen manydady. Ikinji – “Her gün agşamlyk süyji tagamlar iý “ diýen pendi. Uzynly gün meýdanda der döküp işläp, aryp öýe gelseň, agşamlyk naharyň juda tagamly boljaklygyny aňladýardy. “Her gün irden täze köwüş geý” diýmegi bolsa “Üst-başyňy, aýakgabyňy tämiz saklagyn, her gije ýatmazdan öň egin-eşigiňi, köwşüňi arassalagyn” diýdigidi. “Şeýle etseň, her gün irden öýden çykanyňda, aýakgabyň täze ýaly ýalpyldar durar” diýip tabşyrdygydy.
Şol günden başlap, ol ýigit ähli zady ejesiniň aýdyşy ýaly berjaý edipdir. Biraz wagtdan soň ol gurplanypdyr, görmegeý bir gyza öýlenip, maşgala bolupdyr, atasynyň bendini bolsa çagalaryna hem öwredipdir.

187

31

6

9

0

Mowzugy VIP edenler: