Deňiz uç-gyraksyz çaýkanyp ýatyr; Senem kenarynda saçyňy çöşläp,

Otyrsyň, bir özüň çümüp hyýala,

Ownuk pikirleri bir ýana taşlap.

Gara gözleriňden akýan ýaşlaryň,

Monjuk deý düzülýär kirpikleriňe,

Kelep deýin bulam-bujar pikirler,

Gurşun bolup agram salýar seriňe.

Deňiz şemalyna galgap saçlaryň,

Ünsüňi sowmaga jan edýär oýnap,

“Başyňy belent tut, gamlanma!”diýip,

Käte gül ýüzüňi örütýär aýnap.

Bile çekýän ýaly derdi-dagyňy,

Deňizem uludan dem alýar haşlap,

Gelip aýagyňdan öpýär tolkunlar,

Seniň däl, özlerniň göwnüni hoşlap.

Pikir ummanynda örtäp özüňi,

Içiňi hümledip otyrsyň sessiz,

Göwnüň deý arassa mawy asmana,

Mawy giňişlige bakyp höwessiz.

Näçe seretseň-de, näçe baksaň-da,

Köneje gaýygym ilmez gözüňe... Bararyn hasratdan halas etmäge,

Hemem teşne bolup şirin sözüňe.

Iru-giç bararyn, bararyn hökman,

Lagşan gaýygyma baglap küregim,

Ýetip bilmän gitsem ýagty jahandan,

Kükrekden sogrulyp barar ýüregim.
Tagandurdy Hojadow

211

17

2

11

0

Mowzugy VIP edenler: