ŞALAR GALMAZLAR

Gam çekme, garyp adam, 
Begler-şalar galmazlar.
Azym-azym şäherler,
Ak otaglar galmazlar.

Galsa sözden gyzyl dil,
Jan jöwherdir, ten bir gil,
Hezar mukamly bilbil,
Beýik daglar galmazlar.

Şuny kesipdir aklym,
Ýykylar ýedi yklym,
Ýer bolar büklüm-büklüm,
Erir, daglar galmazlar.

Hakdan ýetişse perman,
Ne çäre bar, ne derman,
Asman, Gün-u Aý lerzan
Hem ýyldyzlar galmazlar.

Ne ýer galar, ne ýurtlar,
Ne türk galar, ne kürtler,
Ne guş galar, ne gurtlar,
Perrendeler galmazlar.

Ne gert galar, ne gerdan,
Ne mert galar, ne merdan,
Pil, peşe-ýu kergedan,
Derrendeler galmazlar.

Magtymguly, ýaş süren,
Agyr heňňamlar guran,
Lemmer-lemmer möwç uran,
Şol derýalar galmazlar.

-Magtymguly Pyragy

168

12

1

7

0

Mowzugy VIP edenler: