Gadymyýetde bolupdyr,
Tekepbir bir şagyzy.
Kösäpdir ol birnäçe
Öýlenmedik jahyly.

"Kimde-kim talyp bolup,
Islese men perini.
Berjaý etsin, öñünde,
Goýjak her bir şertimi.

Bolsa eger edermen,
Ony ýarym eder men.
Ýöne ýokdur şu çaka,
Kalbymy awlan mergen".

Diýip, gözel perizat,
Goýupdyr synaglaryn.
Ýöne geçip bilmändir,
Hiç biri oglanlaryñ.

Başarmandyr hiç kimse,
Berjaý edilmez şertin.
Berjaý ediläýende-de,
Beripdir olañ merkin.

Ýurdundan ençe ýigit,
Ters oturyp eşege.
Kowlupdyr meñzäp olar,
Kenek degen aşyga.

Ol tekepbir şagyzyn
Söýüpdir bagban ýigit.
Yşkyñ çogly alawna,
Bagryny daglan ýigit.

Yşk ugrunda perwana,
Galmaz ýaly armana,
Ýaýdanmandyr ol ýigit,
Şerti berjaý kylmana.

Saklamakçy bolupdyr,
Ony garry enesi.
Özelenip ýaş döküp,
Zaryn çykypdyr sesi:

"Ýeke balam, jan guzym,
Ol gözeliñ ugrunda
Gör, näçe aşyk ýigit
Ýurtdan kowulýar günde.

Senem olaryñ biri,
Bolup ne öli, diri,
Ölmezden öñ görersiñ,
Dünýä içinde göri".

"Aşygyñ gözi kördür"
Diýlişi ýaly ýigit,
"Ene maña-da indi,
Bagtyma geldi wagyt.

Söýýärin men ol gyzy,
Goýber meni, jan ene.
Razylyk ber, mähriban,
Baraýyn oñ ýanyna.

Ýazgytda näme bolsa,
Barybir men görerin,
Takdyrda ölüm bolsa,
Gitmesem-de ölerin,
Belki Huday oñlasa,
Gyzy alyp gelerin".

Balasy ne islese,
Garşy çykmaz eneler.
Olañ näzik ýüregi,
Keramata deñeler.

Razylygny beripdir,
Ahyr ene ogluna.
Sagbollaşyp ugrapdyr,
Aşyk ýigit ýoluna.

Şeýdip ol bagban ýigit,
Düşüp gyzyñ yşkyna.
Ýöränden soñ bir sellem,
Barypdyr şa köşgüne.

Onam öñküler ýaly,
Garşylapdyr şa gyzy.
Oglan sözün gatypdyr,
Öñünde epip dyzy:

"Eý, göwnümiñ soltany,
Eý, ömrümiñ soltany!
Sorasam sensiñ mydam,
Ýüregimiñ magtany.

Geldim ine, sen diýip,
Geldim, diñe sen diýip,
Armanym ýokdur gitsem,
Dünýäden seni söýip.

Kalba alaw berdiñ ýar,
Artýar barha derdim ýar.
Indi karar tapamok,
Ber sen ähli şertiñ ýar!"

Öñündäki aşyga,
Gitse-de gyzyñ göwni,
Çözülmändir birjik-de,
Tekepbirligiñ düwni.

Buýrupdyr gyz üç sany,
Iñ bir agyr şertlerin.
"Göreli hany seniñ
Edermenlik, mertligiñ!"

Ozal başarylmadyk,
Şertleri bagban ýigit,
Başarypdyr dessine,
Çigitlän ýaly çigit.

"Meniñ serim sämeden,
Jadygöými näme sen?!
Ýaradanda Ýaradan,
Ýaradypdyr nämeden?!"

Diýip, için gepledip,
Bakypdyr ýigde siñe.
Soñra bolsa beripdir,
Başga soragy oña:

"Aýt, sen oglan başga-da,
Täsin näme başarýañ?
Aýan edermiñ ýene,
Ussatlygyñ ýaşyrman?!"

Oglanam bagbanlygyn,
Aýdypdyr ol gözele,
Söýgi doly kalp bilen,
Görk berýänin bezege,
Çöllerde bitmez güli,
Bitirýänin sözene.

"Bolýar, söýgiň çyn bolsa,
Ýene saña şertim bar.
Şu takyran mekany,
Eýle maña lälezar.

Bu ýeri gül-gülistan,
Etseñ bag bilen bossan,
Ýetersiñ arzuwyña,
Ýüregiňde höweslän"

Diýip, şert üste şerti,
Goýupdyr ol bagbana.
Başarmasa bu ýigdi,
Kowjakmyş beýewana.

Ýigit işe başlapdyr,
Wagt ýitirmän dessine.
Söýgi, mähir tohumyn,
Ekip ýeriň astyna.

Yhlas bilen söýgüden,
Ýetişipdir bag Erem.
Jennet küýsemez eger,
Görküni birje gören.

Hakdan berilse söýgi,
Gudrat çöli gül eder,
Çyn aşyk Perhat deýin,
Dagy-daşy kül eder.

Şagyzy görse gelip,
Bu owadan mekany.
Bilbil guşlar saýraşyp,
Çalýarmyşyn mukamy.

Galyp şagyz haýrana,
Ýüzlenipdir bagbana:
"Duşmandym men kalbymda,
Güneş bolup dogýana.

Seniñ yhlasly söýgiň,
Çözdi kalbymyñ düwnin.
Awladyñ kaddyñ bilen,
Awlanmadyk bu göwnüm.

Aýaz içre buz kalbym,
Öwürdiñ sen bahara.
Indi ýokdur başgaça,
Söýmezlige bahana.

Döreden bu bag-bakjañ,
Seniñ kalbyñ aýnasy,
Senli indi bu ýerler,
Maña jennet ýaýlasy"

Şeýdip iki ýaş juwan,
Şagyzy hem-de bagban.
Ömür durmuş ýoluny,
Biri-birine baglan.

Seýtmämmet BERDIMÄMMEDOW

199

55

9

17

0

Mowzugy VIP edenler: